پاڪستان ۾ توانائي جي شعبي کي مضبوط بڻائڻ ۽ سيڙپڪاري کي هٿي وٺرائڻ لاءِ مڪمل حڪومتي وابستگي ضروري آهي: قيصر احمد شيخ

اسلام آباد-19 نومبر (اي پي پي) سيڙپڪاري بابت وفاقي وزير قيصر احمد شيخ اسلام آباد ۾ پاڪستان انرجي اينڊ ايگزيبيشن ڪانفرنس جو افتتاح ڪري ڇڏيو. ان موقعي تي هن ميڊيا سان ڳالهائيندي پاڪستان ۾ توانائي جي شعبي کي مضبوط بڻائڻ ۽ سيڙپڪاري کي هٿي وٺرائڻ لاءِ حڪومت جي مڪمل وابستگي تي زور ڀريو. هن چيو ته جديد ٽيڪنالاجي ۽ حڪمت عملي تي ٻڌل سيڙپڪاري پاڪستان ۾ توانائي جي سيڪيورٽي کي يقيني بڻائڻ لاءِ اهم ڪردار ادا ڪندي آهي. هن چيو ته پاڪستان توانائي جي پاليسي، ريفائننگ ۽ ايڪسپلوريشن ۾ هڪ نئين دور ۾ داخل ٿي رهيو آهي، جيڪو ملڪي ۽ عالمي سيڙپڪارن لاءِ پاڪستان کي پرڪشش سيڙپڪاري جو مرڪز بڻائي ٿو. هن چيو ته عالمي توانائي ڪمپنين سان مضبوط ڀائيواري حڪومت جي حڪمت عملي جو اهم حصو آهي ۽ پاڪستان توانائي جي شعبي ۾ بي پناهه صلاحيت رکي ٿو. جنهن ۾ ايڪسپلوريشن، ريفائننگ ۽ ڊائون اسٽريم صنعتن ۾ سيڙپڪاري جا موقعا شامل آهن. هن چيو ته وزيراعظم محمد شهباز شريف جي قيادت ۾ حڪومت صنعتي چٽاڀيٽي کي وڌائڻ، ريفائننگ جي صلاحيت ۾ اضافي، توانائي جي بنيادي ڍانچي کي مضبوط بڻائڻ ۽ سيڙپڪارن لاءِ سازگار ماحول فراهم ڪرڻ لاءِ فعال قدم کڻي رهي آهي. بورڊ آف انويسٽمينٽ، سيڙپڪاري واري وفاقي وزير قيصر احمد شيخ جي قيادت ۾ سيڙپڪاري کي هٿي وٺرائڻ، ملڪي ۽ پرڏيهي سيڙپڪارن جي مڪمل معاونت لاءِ پرعزم آهي.