پاڪستان ڪنهن به قسم جي دهشتگردي کي برداشت نه ڪندو ۽ دهشتگرد ڪاررواين جو ڀرپور ۽ موثر جواب ڏنو ويندو: بئريسٽر دانيال چوڌري

راولپنڊي – 12 نومبر (اي پي پي) اطلاعات ۽ نشريات واري وفاقي پارلياماني سيڪريٽري بئريسٽر دانيال چوڌري چيو آهي ته پاڪستان ڪنهن به قسم جي دهشتگردي کي برداشت نه ڪندو ۽ دهشتگرد ڪاررواين جو ڀرپور ۽ موثر جواب ڏنو ويندو، جيڪي عنصر ٻاهرئين مدد يا پراڪسيز جي ذريعي پاڪستان کي عدم استحڪام جو شڪار ڪرڻ جي ڪوشش ڪري رهيا آهن انهن کي منهن ٽوڙ جواب ڏنو ويندو. اهڙن خيالن جو اظهار هن لياقت باغ  اسپورٽس ڪمپليڪس ۾ نئين سوئمنگ پول ۽ رانديگرن جي هاسٽل جي افتتاح جي موقعي تي ڪيو. افتتاحي تقريب ۾ راندين ۽ ثقافت واري صوبائي وزير ملڪ فيصل ايوب کوکر، اسيمبلي ميمبرن، ڊپٽي ڪمشنر، راندين سان واڳيل شخصيتن، رانديگرن ۽ راندين واري کاتي جي عملدارن شرڪت ڪئي. بئريسٽر دانيال چوڌري چيو ته پنجاب حڪومت وزيراعليٰ مريم نواز جي هدايت تي نوجوانن جي لاءِ صحتمند سرگرمين جا موقعا وڌائي رهي آهي. انهي سلسلي ۾ جديد سهولتن سان ليس سوئمنگ پول ۽ هاسٽل جو قيام راولپنڊي جي رانديگرن جي لاءِ قيمتي سرمايو ثابت ٿيندو. منصوبي جي مجموعي لاڳت اٽڪل 60 ڪروڙ رپيا ٻڌائي وئي آهي. هن چيو ته پهريون ڀيرو ان ڪمپليڪس ۾ رانديگرن جي رهائش جي لاءِ هاسٽل تعمير ڪيو ويو آهي جنهن سان قومي ۽ عالمي ٽيمن جي ميزباني ممڪن ٿيندي ۽ ايونٽس دوران خرچن ۾ گهٽتائي ايندي. هن ٻڌايو ته پنجاب جي وزيراعليٰ جي خصوصي هدايت تي عورتن جي لاءِ جدا جِم قائم ڪيو ويو آهي. اهڙي طرح ماضي ۾ اسان جي حڪومت عورت هاڪيءَ جي فروغ جي لاءِ وومين هاڪيءَ گرائونڊ ۾ جديد آسٽروف وڇايو ته جيئن عورتون آساني سان راندين ۾ حصو وٺي سگهن. هن چيو ته مسلم ليگ (ن) سدائين راولپنڊي جي ترقي ۾ اڳ کان اڳري رهي آهي. شهر جي بنيادي ڍانچي ۽ ٽرانسپورٽ جي منصوبن خاص طور تي ميٽرو بس سروس شهرين کي نمايان سهولت فراهم ڪئي آهي. دانيال چوڌري منشيات وڪرو ڪندڙن ۽ قبضا مافيا جي خلاف کنيل قدمن کي ساراهيو ۽ چيو ته انهن عنصرن جي خلاف ڪارروائي جاري رهندي. هن چيو ته جڏهن مسلم ليگ (ن) حڪومت سنڀالي ته پاڪستان انتهائي مشڪل حالتن ۾ ورتل هو، ملڪ ڊيفالٽ جي خطري ۾ ورتل هو ۽ عالمي سطح تي اڪيلائپ جو شڪار هو، ڪو ملڪ اسان سان هٿ ملائڻ يا ڳالهه ڪرڻ جي لاءِ تيار نه هو جڏهن ته اڄ صورتحال بدلجي چڪي آهي، پاڪستان عالمي برادري ۾ پنهنجي ساک بحال ڪري ڇڏي آهي. هن ان ڪاميابي جو ڪريڊٽ وزيراعظم محمد شهباز شريف ۽ فيلڊ مارشل سيد عاصم منير جي اڻٿڪ محنت ۽ جذبي کي قرار ڏنو ۽ چيو ته انهن جي ئي گڏيل ڪوششن سان پاڪستان هڪ ڀيرو ٻيهر ترقي ۽ استحڪام جي راهه تي گامزن ٿيو آهي. تازي دهشتگردي جي واقعي تي افسوس جو اظهار ڪندي هن چيو ته پاڪستاني قوم متحد آهي ۽ ماضي وانگر دشمن جي ارادن کي ناڪام بڻائيندي رهندي. هن چيو ته اسان جي فوج ۽ سيڪيورٽي ادارن جون قربانيون رائيگان نه وينديون. هن چيو ته نه سرحدي علائقن ۽ نه ئي شهرن ۾ دهشتگردن کي آزاد ڇڏيو ويندو، اسان اڳ ۾ به ڀارت کي ٻڙي جي مقابلي ۾ ست تان شڪست ڏني ۽ جتان به اهي سازشون ٿي رهيون آهن انهن جو سخت جواب ڏنو ويندو. هن ٻڌايو ته عالمي برادري به تازي دهشتگردي جي واقعن جي مذمت ڪئي آهي ۽ ڪيترن ئي ملڪن جي سفارتي نمائندن پاڪستان سان يڪجهتي جو اظهار ڪيو آهي. ان موقعي تي راندين ۽ ثقافت واري صوبائي وزير ملڪ فيصل ايوب کوکر چيو ته پنجاب حڪومت جي اولين ترجيح نوجوانن جي ڀلائي ۽ راندين جي فروغ کي يقيني بڻائڻ آهي. هن چيو ته حڪومت پنهنجي ترجيحن جي حوالي سان انتهائي سنجيده آهي ۽ ان ڳالهه جو عملي ثبوت اهو آهي ته مسلم ليگ (ن) جي موجوده حڪومت مخالف دور جي منصوبن کي به مڪمل ڪري عوامي مفاد کي مٿانهون رکيو آهي. هن چيو ته ماضي ۾ جڏهن به حڪومت تبديل ٿي هئي ته اڳوڻي دور جي منصوبن کي روڪيو ويندو هو جنهن سان نقصان رڳو عوام جو ٿيندو هو جڏهن ته مسلم ليگ (ن) جي روايت آهي ته هن سدائين عوامي منصوبن کي سياسي وابستگي کان مٿانهون ٿي مڪمل ڪيو. صوبائي وزير چيو ته شهباز شريف جي وڏوزارت جي دور ۾ سڄي پنجاب ۾ جديد اسپورٽس ڪمپليڪس تعمير ڪيا ويا پر گذريل حڪومت جي دور ۾ اهي منصوبا کنڊرات جو منظر پيش ڪرڻ لڳا. هن چيو ته گذريل 98 اسپورٽس ڪمپليڪسز جي پيڙهه جو پٿر رکيو ويو جيڪي هن سال مڪمل ٿي ويندا. صوبائي وزير چيو ته پي ٽي آءِ جي اڳوڻي حڪومت نوجوانن جي لاءِ ڪو مثبت ڪم نه ڪيو پر انهن کي احتجاج، جلاءُ گهيراءُ ۽ انتشار جي ترغيب ڏني. پنجاب جي وزيراعليٰ مريم نواز شريف جي ترجيحن ۾ عورتن جي ڀلائي، تعليم جي فروغ ۽ راندين جي موقعن جي فراهمي شامل آهي. هن ٻڌايو ته ايندڙ مهيني لاهور ۾ پاڪستان جي سڀ کان وڏي اسڪواش ڪمپليڪس جو افتتاح ڪيو ويندو جيڪو 1991ع کان التوا هيٺ هو. هن اعلان ڪيو ته راولپنڊي جي نوجوانن جي لاءِ هڪ جديد ملٽي پرپز گرائونڊ تعمير ڪيو ويندو جتي مختلف راندين جون سهولتون فراهم ڪيون وينديون.