اسلام آباد-31 آڪٽوبر (اي پي پي) بورڊ آف انويسٽمينٽ واري وفاقي وزير قيصر احمد شيخ اسلام آباد ۾ بورڊ آف انويسٽمينٽ ۾ آسيان ملڪن جي سفيرن ۽ هاءِ ڪمشنرز جي گڏيل وفد سان اعليٰ سطحي ملاقات ڪئي. وفد ۾ ٿائلينڊ ۽ چيئرمين آسيان ڪميٽي اسلام آباد رنگوڌي ويرابتر، انڊونيشيا جي سفير ايڇ اي ليفٽيننٽ جنرل (ر) چندرا واستنانتو سڪوتجو، ملائيشيا جي هاءِ ڪمشنر داتو محمد اظهر مزلان، ويٽنام جي سفير …
وفاقي وزير قيصر احمد شيخ سان آسيان ملڪن جي سفيرن ۽ هاءِ ڪمشنرز جي ملاقات
مزید خبریں
اسلام آباد-31 آڪٽوبر (اي پي پي) بورڊ آف انويسٽمينٽ واري وفاقي وزير قيصر احمد شيخ اسلام آباد ۾ بورڊ آف انويسٽمينٽ ۾ آسيان ملڪن جي سفيرن ۽ هاءِ ڪمشنرز جي گڏيل وفد سان اعليٰ سطحي ملاقات ڪئي. وفد ۾ ٿائلينڊ ۽ چيئرمين آسيان ڪميٽي اسلام آباد رنگوڌي ويرابتر، انڊونيشيا جي سفير ايڇ اي ليفٽيننٽ جنرل (ر) چندرا واستنانتو سڪوتجو، ملائيشيا جي هاءِ ڪمشنر داتو محمد اظهر مزلان، ويٽنام جي سفير فام آن توان، فلپائن جي سفير ايمانوئل آر فرنينڊيز، ميانمر جي سفير ووناهان ۽ برونائي جي هاءِ ڪمشنر ڪرنل (ر) پنگيرن حج ڪمال بشاپنگيرن حج احمد شامل هئا. ملاقات ۾ بورڊ آف انويسٽمينٽ جو سيڪريٽري ۽ ٻيا سينيئر عملدار به موجود هئا، جنهن سان ظاهر ٿئي ٿو ته پاڪستان آسيان ملڪن سان اقتصادي لاڳاپن کي قدر جي نگاهه سان ڏسي ٿو. ملاقات دوران وفاقي وزير آسيان ملڪن جي پاڪستان جي لاءِ اهم حصيدار هئڻ تي زور ڀريو ۽ وفد کي اسپيشل اڪنامڪ زونز ۽ فيسليٽيشن سينٽر جي ڪردار بابت تفصيلي آگاهي فراهم ڪئي. هن چيو ته هي زونز سيڙپڪارن لاءِ منظم، محفوظ ۽ دوستاڻو ماحول فراهم ڪن ٿا جيڪي پائيدار صنعتي ترقي، پرڏيهي سيڙپڪاريءَ کي هٿي وٺرائڻ ۽ روزگار جا موقعا پيدا ڪرڻ ۾ مددگار آهن. سمورن آسيان ملڪن سياحت، فوڊ انڊسٽري ۽ ٻين اُڀرندڙ شعبن ۾ سيڙپڪاريءَ ۾ دلچسپي ظاهر ڪئي جيڪو ٻه طرفي اقتصادي تعاون لاءِ اهم موقعا فراهم ڪري ٿو. وفاقي وزير چيو ته پاڪستان مختلف شعبن جهڙوڪ آءِ ٽي، انفراسٽرڪچر، ٽيڪسٽائل ۽ مائننگ ۾ سيڙپڪاري لاءِ رعايتون به فراهم ڪري رهيو آهي ته جيئن سيڙپڪاريءَ جي موقعن کي وڌيڪ هٿي ڏئي سگهجي. وفد جي ميمبرن پاڪستان ۾ سيڙپڪاريءَ جي وسيع موقعن کي تسليم ڪيو ۽ مختلف شعبن ۾ امڪاني تعاون تي راضپو ظاهر ڪيو. ملاقات ۾ واپار ۽ سيڙپڪاريءَ جي لاڳاپن کي مضبوط بڻائڻ، رابطا ڪاريءَ کي بهتر بڻائڻ ۽ سيڙپڪاريءَ جي طريقيڪار کي آسان بڻائڻ تي به ڳالهه ٻولهه ڪئي وئي ته جيئن گڏيل تعاون کي هٿي ڏئي سگهجي. آسيان ملڪن جي نمائندن پاڪستان جي سيڙپڪار دوست پاليسين جي آجيان ڪئي ۽ ان عزم جو اظهار ڪيو ته هو اهڙن ترقياتي منصوبن ۾ حصو وٺڻ چاهين ٿا جيڪي خطي ۾ اقتصادي هم آهنگي ۽ ترقيءَ کي هٿي ڏين. وفاقي وزير چيو ته وزيراعظم شهباز شريف جي اڳواڻيءَ ۾ حڪومت روانگي واپار تي ٻَڌل ترقي يافته معيشت جي ويزن تي عمل پيرا آهي ۽ سيڙپڪارن لاءِ هڪ پائيدار ۽ سازگار ڪاروباري ماحول فراهم ڪري رهي آهي ته جيئن پاڪستان جو علائقائي واپاري ڪردار مضبوط ٿئي.
