اسلام آباد – 6 – آگسٽ (اي پي پي) اطلاعات ۽ نشريات واري وفاقي وزير عطاءُ الله تارڙ چيو آهي ته 18هين ترميم کانپوءِ فلم جي درآمد ۽ سرٽيفڪيشن جي حوالي سان مسئلا موجود آهن، پي ٽي وي اسپورٽس ايشيا ڪپ جي ٻن سالن جا رائيٽس حاصل ڪري ورتا آهن، پي ٽي وي هوم کي آئوٽ سروس ڪرڻ تي ڪم ڪري رهيا آهيون، پي ٽي وي ورلڊ کي نئين سر فعال ۽ جديد گهرجن موجب ري ويمپ ڪيو پيو وڃي، صحافين سان پراڻو رشتو آهي، صحافين سان ٿيندڙ ناانصافي جو ازالو ٿيڻ گهرجي. اهڙن خيالن جو اظهار هن پارليامينٽ لاجز اسلام آباد ۾ سينيٽ جي اطلاعات ۽ نشريات بابت اسٽينڊنگ ڪميٽي جي اجلاس ۾ ڳالهائيندي ڪيو. اجلاس جي صدارت ڪميٽي جي چيئرمين سينيٽر علي ظفر ڪري رهيو هو. اجلاس ۾ موشن پڪچر (ترميمي) بل 2024ع، صحافين جي خدشن، پيڪا ايڪٽ تحت داخل ڪيسن، پي ٽي وي ۽ ريڊيو پاڪستان جي ملازمن جي پگهارن ۽ پينشنز جي ادائيگي جي مسئلن سميت ٻيا ايجنڊا آئٽمز بحث هيٺ آيا. موشن پڪچر (ترميمي) بل 2024ع بابت ڪميٽي کي اطلاعات واري وفاقي وزير عطاءُ الله تارڙ ٻڌايو ته ڪنهن به فلم جي سرٽيفڪيشن جي لاءِ ضروري عمل هوندا آهن، جيڪڏهن هر ڀيري ڪابينا نئون سينسر بورڊ جوڙي ڇڏي ۽ ان تي ڊگهو بحث ٿئي ته اسان جي فلم انڊسٽري جا معاملا دير جو شڪار ٿي ويندا. هن چيو ته هن بل ۾ فلم سرٽيفڪيشن بورڊ جي منظوري جو اختيار لاڳاپيل وزير کي هوندو ته جيئن فيصلاسازي ۾ دير نه ٿئي. وفاقي وزير چيو ته 18هين ترميم کانپوءِ فلمن جي درآمد ۽ سرٽيفڪيشن جي حوالي سان مسئلا موجود آهن، فلم جي سرٽيفڪيشن جي لاءِ پوري ملڪ کي هڪ پيج تي هجڻ گهرجي. هن چيو ته وفاقي حڪومت جو ڪردار رڳو فلم جي درآمد تائين محدود آهي جڏهن ته صوبا پنهنجي جدا قانونسازي تحت سرٽيفڪيشن ڪن ٿا، ان حوالي سان صوبن سان ڪوآرڊينيشن ضروري آهي. هن چيو ته پاڪستاني فلمن ڪئناڊا سميت ڪيترن ئي ملڪن ۾ رڪارڊ بزنس ڪيو آهي، وزارت اهڙين فلمن جي حوصلا افزائي ڪري ٿي ۽ ان جي راهه ۾ ڪنهن به قسم جي رڪاوٽ نه اچڻ گهرجي. وفاقي وزير چيو ته معاشري ۾ عدم برداشت وڌي رهي آهي، اهڙي ۾ اسان کي ڪوالٽي انٽرٽينمينٽ جي فروغ تي ڌيان ڏيڻو پوندو ته جيئن معاشري ۾ مثبت روين کي هٿي ملي. ڪميٽي سينسر بورڊ جي ايجنڊا جي منظوري ڏني. ان موقعي تي اطلاعات واري وفاقي وزير اسٽينڊنگ ڪميٽي کي نيوٽيڪ جي بحالي جي تجويز پڻ ڏني جنهن کي ڪميٽي منظور ڪري ورتو. پي ٽي وي جي حوالي سان ايجنڊا آئٽم تي ڳالهائيندي اطلاعات واري وفاقي وزير اسٽينڊنگ ڪميٽي کي ٻڌايو ته پي ٽي وي اسڪرين ۾ بهتري آندي وئي آهي. هن چيو ته پي ٽي وي اسپورٽس ايشيا ڪپ جي ٻن سالن جا رائيٽس حاصل ڪري ورتا آهن، اسان جي ڪوشش آهي ته پي ٽي وي اسپورٽس کي وڌيڪ بهتر بڻايو وڃي. هن چيو ته اسان پي سي بي سان جي ٽو جي معاهدي جي ڪوشش ڪري رهيا آهيون. وفاقي وزير چيو ته پي ٽي وي هوم کي آئوٽ سروس ڪرڻ تي ڪم ڪري رهيا آهيون، پي ٽي وي ورلڊ کي نئين سر فعال ۽ جديد گهرجن موجب ري ويمپ ڪيو پيو وڃي. وفاقي وزير ڪميٽي کي ٻڌايو ته سبسڊي جي واپسي سان پي ٽي وي کي مشڪلاتن کي منهن ڏيڻو پيو. آءِ سي سي جون ادائيگيون التوا هيٺ هيون، اسان مشڪلاتن جي باوجود آءِ سي سي جا رائيٽس حاصل ڪيا. اهو نه ٿو ٿي سگهي ته عالمي مئچ ناظرين کي نه ڏيکاريا وڃن. پي ٽي وي نيشنل براڊ ڪاسٽر آهي، صحرائن سميت ڏورانهن علائقن ۾ پي ٽي وي ڪرڪيٽ مئچ ڏيکاري ٿي. هن چيو ته پي ٽي وي اسپورٽس جي ريٽنگ نجي چينلز جي مقابلي ۾ وڌيڪ آهي. هن چيو ته پي ٽي وي ۾ ميرٽ تي قدم کنيا پيا وڃن، پينشنرز ۽ ملازمن جي پگهارن جي ادائيگي ۾ بهتري آڻڻ جي ڪوشش ڪري رهيا آهيون. هن چيو ته نجي ٽي وي چينلز ۾ ٽي ٽي مهينا پگهار نٿو ملي. ان موقعي تي ڪميٽي جي چيئرمين علي ظفر ايندڙ اجلاس ۾ پي ٽي وي جي مالي معاملن جي حوالي سان ناڻي واري وزارت جي عملدارن کي طلب ڪري ورتو. شاليمار رڪارڊنگ ڪمپني بابت اطلاعات واري وفاقي وزير ڪميٽي کي ٻڌايو ته ايس آر بي سي جي ملازمن کي تازو ئي ٽن مهينن جو پگهار ادا ڪيو ويو آهي. هن چيو ته هن پاڻ هاءِ ڪورٽ ۾ پيش ٿي ايس آر بي سي جي بحالي جي گذارش ڪئي، ايس آر بي سي جو بزنس پلان تيار ڪيو ويو آهي. ڪميٽي جي اجلاس ۾ پيڪا ايڪٽ تحت داخل ڪيسن جي حوالي سان معاملا پڻ بحث هيٺ آيا. وفاقي وزير چيو ته صحافين سان پراڻو رشتو آهي، پي ايف يو جي جي صدر افضل بٽ سان صحافين ٿيندڙ ناانصافي جي معاملي تي ڳالهه ٻولهه ٿي آهي. هن چيو ته سينيٽ جي اسٽينڊنگ ڪميٽي هڪ ذيلي ڪميٽي جوڙي، ان معاملي کي ٻڌو وڃي، سمورا تفصيلي اچي ويندا. هن چيو ته جن صحافين سان زيادتي ٿي آهي ان جو ازالو ٿيڻ گهرجي. ڪميٽي جي چيئرمين علي ظفر ايندڙ اجلاس ۾ آر پي او کي طلب ڪري ورتو ۽ لاڳاپيل ايس ايڇ او جي خلاف ڪارروائي جي سفارش ڪئي. اجلاس ۾ ڪميٽي جي ميمبرن سينيٽر عرفان صديقي، سينيٽر پرويز رشيد، سينيٽر جان محمد بليدي، سينيٽر سرمد علي، سينيٽر سيد وقار مهدي، اطلاعات ۽ نشريات واري وفاقي سيڪريٽري عنبرين جان، ايڊيشنل سيڪريٽري اشفاق خليل کانسواءِ اطلاعات ۽ نشريات واري وزارت جي اعليٰ عملدارن شرڪت ڪئي.
