حيدرآباد-06آگسٽ(اي پي پي) راندين ۽ نوجوانن جي معاملن واري صوبائي وزير سردار محمد بخش خان مهر ۽ صوبائي سيڪريٽري منور علي مهيسر جي خاص هدايتن تي سنڌ جي راندين ۽ نوجوان جي معاملن واري کاتي پاڪستان جي 78 هين جشن آزادي ۽ معرڪه حق جي مناسبت سان نيشنل انڪيوبيشن سينٽر حيدرآباد ۾ هڪ حوصلا افزا سيشن ۽ آزادي واڪ جو اهتمام ڪيو. ان موقعي تي خاص مهمان عاجز ڌامراهه پنهنجي خطاب ۾ نوجوانن تي زور ڀريو ته اهي پاڪستان جي ترقي ۾ قائداڻو ڪردار ادا ڪن . هن، سنڌ حڪومت ۽ چيئرمين بلاول ڀٽو زرداري پاران عالمي سطح تي پاڪستان جي موقف کي موثر طريقي سان پيش ڪرڻ تي پڻ خراج تحسين پيش ڪيو. سيشن ۾ ڊي ايس پي ونود ڪمار، واحد سنگراسي، نائلا پنهور سميت مختلف مقررن نوجوانن ۾ حب الوطني، قيادت ۽ برابر جي شهري حقن جي پيغام کي اجاگر ڪيو. بعد ۾ اسسٽٽ ڊائريڪٽر رضوان علي ملاح سمورن مقررن ۽ شرڪت ڪندڙن جي سهڪار جو شڪريو ادا ڪيو ۽ مقررن ۽ شرڪت ڪندڙن ۾ شيلڊ ۽ سندون ورهايون. سيشن جي پڄاڻي تي آزادي واڪ جو پڻ اهتمام ڪيو ويو جنهن ۾ نوجوانن ۽ آفيسرن وڏي انگ ۾ شرڪت ڪئي ۽ قومي اتحاد ۽ يڪجهتي جي عزم جو اظهار ڪيو.
