اسلام آباد-18 اپريل (اي پي پي) صنعتن ۽ پيداوار بابت وزيراعظم جي خاص مددگار هارون اختر سان ميرپورخاص چيمبر آف ڪامرس جي صدر عمر شهزاد ملاقات ڪئي. ملاقات دوران ايندڙ وفاقي بجيٽ جي حوالي سان تجويزن ۽ خطي ۾ صنعتي ترقيءَ بابت معاملن تي خيالن جي ڏي وٺ ڪئي وئي. هارون اختر خاطري ڪرائي ته سڄي ملڪ جي چيمبرز آف ڪامرس طرفان پيش ڪيل بجيٽ تجويزن جو تفصيلي جائزو ورتو ويندو. صدر ميرپورخاص ۾ سميڊا جي ريجنل آفيس جي قيام جي درخواست ڪئي ته جيئن ننڍن ۽ وچولي درجي جي ڪاروباري ادارن کي سهولتون فراهم ٿي سگهن. ان موقعي تي هارون اختر چيو ته انهن قدمن سان مقامي ڪاروبار کي سڌيءَ ريت فائدو ٿيندو ۽ حڪومت مڪمل تعاون فراهم ڪندي. هن وڌيڪ چيو ته وزيراعظم جي ويزن تحت سڄي ملڪ ۾ بيمار صنعتي يونٽس جي بحاليءَ لاءِ قدم کنيا پيا وڃن. هارون اختر اهو به اعلان ڪيو ته هو جلد ميرپورخاص چيمبرز آف ڪامرس جو دؤرو ڪندو ته جيئن مقامي ڪاروباري برادريءَ سان رابطن کي وڌيڪ مضبوط بنائي سگهجي. اها ملاقات حڪومت جي شموليتي اقتصادي ترقيءَ جي عزم ۽ صنعتي پاليسي سازيءَ ۾ علائقائي چيمبرز جي اهم ڪردار جي اعتراف جي عڪاسي ڪري ٿي.
