اسلام آباد – 02 نومبر (اي پي پي) اطلاعات ۽ نشريات واري وفاقي وزير چوڌري فواد حسين چيو آهي ته مولانا سميع الحق جو قتل پاڪستان کي عدم استحڪام جي ور چاڙهڻ جي ڪڌي سازش آهي، قوم پنهنجي اتحاد ۽ يڪجهتي سان دشمن جي انهي ڪڌي سازش کي ناڪام بڻائيندي، مولانا سميع الحق تي حملو ڪندڙن کي قانون جي ڪٽهڙي ۾ آڻي ڪيفر ڪردار تائين پهچائينداسين. اهڙن خيالن جو اظهار هن هڪ نجي ٽي وي چينل جي پروگرام ۾ ڳالهائيندي ڪيو. هن چيو ته مولانا سميع الحق کي بحريه ٽائون جي سفاري ولاز ۾ سندس گهر اندر ڇرين جا وار ڪري ماريو ويو جنهن جي سخت مذمت ڪريون ٿا.
