لاهور-08آڪٽوبر (اي پي پي) غذائي تحفظ ۽ تحقيق واري وفاقي وزير راڻا تنوير حسين چيو آهي ته فوڊ سيڪيورٽي انتهائي اهم شعبو آهي ۽ قومي سلامتي سڌي ريت فوڊ سيڪيورٽي سان ڳنڍيل آهي، جيڪڏهن ملڪ ۾ خوراڪ جي دستيابي کي يقيني نه بڻايو وڃي ته قومي سلامتي کي به مڪمل طور تي يقيني نه ٿو بڻائي سگهجي. زرعي شعبي جي ترقي اولين ترجيح آهي. اهڙو اظهار هن خميس ڏينهن نيشنل …
زرعي شعبي جي ترقي اولين ترجيح آهي: راڻا تنوير حسين
لاهور-08آڪٽوبر (اي پي پي) غذائي تحفظ ۽ تحقيق واري وفاقي وزير راڻا تنوير حسين چيو آهي ته فوڊ سيڪيورٽي انتهائي اهم شعبو آهي ۽ قومي سلامتي سڌي ريت فوڊ سيڪيورٽي سان ڳنڍيل آهي، جيڪڏهن ملڪ ۾ خوراڪ جي دستيابي کي يقيني نه بڻايو وڃي ته قومي سلامتي کي به مڪمل طور تي يقيني نه ٿو بڻائي سگهجي. زرعي شعبي جي ترقي اولين ترجيح آهي. اهڙو اظهار هن خميس ڏينهن نيشنل ريسڪيو چئلينج 2026ع جي پڄاڻي واري تقريب کي خطاب ڪندي ڪيو. وفاقي وزير چيو ته پاڪستان هڪ زرعي ملڪ آهي ۽ الله تعاليٰ جي فضل سان، تقريبن 260 ملين آبادي جون غذائي ضرورتون پوريون ڪرڻ سان گڏوگڏ چانور، مڪئي ۽ پٽاٽن سميت مختلف زرعي جنسن جو روانگي واپار پڻ ڪري رهيو آهي. وزيراعظم محمد شهباز شريف زراعت جي شعبي کي خاص اهميت ڏئي رهيو آهي ۽ ان جي ترقي لاءِ ڏينهن رات ڪم ڪيو پيو وڃي. هن چيو ته زراعت، لائيو اسٽاڪ ۽ ٻين لاڳاپيل شعبن ۾ نئين ٽيڪنالاجي متعارف ڪرائي پئي وڃي، جڏهن ته موسمياتي تبديلي جي اثرات کي منهن ڏيڻ لاءِ بهتر ۽ وڌيڪ مزاحمت رکندڙ ٻج متعارف ڪرائڻ تي به ڪم پڻ جاري آهي. راڻا تنوير حسين چيو ته موسمياتي تبديلي جو پاڪستان تي نمايان اثر پوي ٿو، جيتوڻيڪ عالمي طور ڪاربان خارج ڪرڻ ۾ پاڪستان جو حصو تمام گهٽ آهي. موسمياتي تبديلي جي چئلينجن کي منهن ڏيڻ لاءِ زرعي شعبي ۾ جديد ٽيڪنالاجي ۽ موسمياتي مزاحمت رکندڙ طريقن کي هٿي ڏيڻ وقت جي اهم ضرورت آهي. هن چيو ته موسمياتي تبديلي ۽ وڌندڙ گرمي پد جا اثر سڀ کان وڌيڪ پاڪستان کي برداشت ڪرڻا پئجي رهيا آهن. موسمياتي تبديلي جي ڪري پاڪستان کي زلزلن، ٻوڏن ۽ ٻين قدرتي آفتن جهڙا چئلنيجز سامهون آهن ، جن جا اثر ايندڙ دور ۾ به برقرار رهڻ جو امڪان آهي. وفاقي وزير چيو ته عالمي برادري موسمياتي تبديلي جي چئلينجن کي منهن ڏيڻ لاءِ پاڪستان سان مالي مدد جو عزم ڪيو هو، پر ان واعدي جو مناسب حصو اڃا تائين پورو نه ڪيو ويو. عالمي برادري کي پنهنجون ذميواريون پوريون ڪندي پاڪستان جي مدد ڪرڻ گهرجي. هن ريسڪيو ادارن جي خدمتن کي ساراهيندي چيو ته قدرتي آفتن دوران، ريسڪيو اهلڪارن لکين ماڻهن کي مشڪل حالتن مان ڪڍيو، ماڻهن کي پاڻي کان محفوظ هنڌن ڏانهن منتقل ڪيو ۽ قيمتي جانيون بچايون، هي ڪو معمولي ڪارنامو ناهي. هن چيو ته موسمياتي تبديلي جي چئلينجن کي منهن ڏيڻ لاءِ ريسڪيو سروسز کي وڌيڪ تيار ڪرڻ ۽ مضبوط بڻائڻ جي ضرورت آهي. ريسڪيو ادارا اڳ ئي ان حوالي سان ڀرپور ڪم ڪري رهيا آهن ۽ مستقبل ۾ انهن جي صلاحيت کي وڌيڪ وڌائڻ وقت جي ضرورت آهي. وفاقي وزير چيو ته ٻين صوبن کي پنجاب جي ايمرجنسي سروسز اڪيڊمي ۽ ريسڪيو سيٽ اپ جو مشاهدو ضرور ڪرڻ گهرجي ۽ هن ماڊل کي اڳتي کڻي وڃڻ گهرجي ته جيئن پنهنجي صوبن ۾ پڻ مثالي ايمرجنسي سروسز قائم ڪري سگهن. هن چيو ته ريسڪيو سروسز کي جديد معيارن مطابق بڻائڻ ۽ بهترين سامان ۽ سهولتون فراهم ڪرڻ تي ڌيان ڏيڻ ضروري آهي.
