ملائيشيا جي قونصل جنرل جي سنڌ اسيمبلي جي اسپيڪر سيد اويس قادر شاهه سان ملاقات

ڪراچي- 06 آڪٽوبر (اي پي پي) ملائيشيا جي قونصل جنرل محمد يونس بن ابراهيم سنڌ اسيمبلي ۾ اسپيڪر سيد اويس قادر شاهه سان سندس آفيس ۾ ملاقات ڪئي. اسپيڪر جي ترجمان موجب ملاقات دوران پاڪستان ۽ ملائيشيا جي ٻطرفن لاڳاپن، پارلياماني سهڪار، واپار، سيڙپڪاري، سياحت ۽ عوامي رابطن کي وڌيڪ هٿي ڏيڻ بابت خيالن جي ڏي وٺ ڪئي وئي. اسپيڪر، ملائيشين قونصل جنرل جي آجيان ڪندي سنڌ اسيمبلي جي ميزباني هيٺ منعقد ٿيل ستين سي پي اي ايشيا ريجنل ڪانفرنس ۽ ٻين گڏيل سي پي اي ايشيا ۽ ڏکڻ اوڀر ايشيا ريجنل ڪانفرنس دوران سندس اڳوڻي قونصل جنرل سان ٿيل ملاقات جو ذڪر ڪيو. هن چيو ته ٻنهي ڌرين وچ ۾ مسلسل رابطو رهيو آهي، جڏهن ته ڪيپ ٽائون ۾ منعقد ٿيل 69 هين ڪامن ويلٿ پارلياماني ڪانفرنس دوران ملائيشيا جي پارليامينٽ جي اسپيڪر سان پڻ سندس ملاقات ٿي. ان موقعي تي اسپيڪر سان گڏ سنڌ اسيمبلي جو سيڪريٽري جي ايم عمر فاروق ۽ ڊائريڪٽر جنرل ميڊيا عرفان احمد ميمڻ پڻ موجود هئا. ملائيشين قونصل جنرل ٻڌايو ته پاڪستان ۾ مقرري سندس پهرين پوسٽنگ ۽ ٽين پرڏيهي مقرري آهي. هو اٽڪل هڪ مهينو اڳ پاڪستان پهتو آهي. هن پاڪستان کي انتهائي متحرڪ ملڪ قرار ڏيندي پاڪستاني عوام جي مهمان نوازي، گرمجوشي ۽ جذبي کي ساراهيو. اسپيڪر قونصل جنرل کي سنڌ جي مختلف علائقن، خاص طور تي سکر جو دورو ڪرڻ جي دعوت ڏني. هن سکر جي تاريخي ۽ جاگرافيائي اهميت، سنڌ کي ٻين صوبن سان ملائڻ ۾ ان جي ڪردار، ايئرپورٽ، ريلوي، روڊن جي نيٽ ورڪ ۽ صنعتي بنياد تي روشني وڌي. هن سنڌ جي مختلف ضلعن جي آبادي، جاگرافيائي ۽ معاشي خصوصيتن ۽ صوبي ۾ ريگستاني علائقن، زرخيز زرعي زمينن ۽ صنعتي زونز جي منفرد امتزاج بابت پڻ آگاهي ڏني. سيد اويس قادر شاهه چيو ته سکر سميت سنڌ جي ٻين شهرن ۾ ملائيشيا سان معاشي سهڪار، واپار ۽ سيڙپڪاري جا وسيع موقعا موجود آهن. هن ملائيشين قونصل خاني کي سکر ۽ حيدرآباد سميت وڏن شهرن ۾ ڪاروباري موقعن جو جائزو وٺڻ ۽ لاڳاپيل چيمبرز آف ڪامرس سان رابطن کي وڌائڻ جي تجويز ڏني. ملائيشين قونصل جنرل ٻڌايو ته پاڪستان ۽ ملائيشيا وچ ۾ معاشي سهڪار کي هٿي ڏيڻ سندس اهم ترجيحن ۾ شامل آهي. هن تازو ڪورنگي ايسوسيئيشن آف ٽريڊ اينڊ انڊسٽري (ڪاٽي) ۾ ڪاروباري برادري سان ٿيل ملاقات جو حوالو ڏيندي چيو ته ملائيشيا جو معاشي ڊويزن عالمي سطح تي معاشي سرگرمين کي وڌائڻ ۽ ڪاروبار ۽ سيڙپڪاري جا عمل جوڳا موقعا ڳولهڻ لاءِ ڪم ڪري رهيو آهي. ملاقات دوران سياحت جي فروغ تي پڻ خيالن جي ڏي وٺ ڪئي وئي. اسپيڪر پنهنجي اٽڪل 13 کان 14 سال اڳ ڪيل ملائيشيا جي دوري جو ذڪر ڪندي ملڪ جي مختلف علائقن جي سفر کي ساراهيو. ٻنهي ڌرين پاڪستان ۽ ملائيشيا وچ ۾ سياحتي رابطن کي وڌائڻ جي امڪانن جو جائزو ورتو. اسپيڪر سنڌ حڪومت جي مختلف قدمن، خاص طور تي ورلڊ لائيو اسٽاڪ ايڪسپو بابت پڻ قونصل جنرل کي آگاهه ڪيو ۽ ملائيشين ڪاروباري ادارن ۽ لاڳاپيل اسٽيڪ هولڊرز کي اهڙن پروگرامن ۾ شرڪت جي دعوت ڏني. قونصل جنرل ايڪسپو ۾ دلچسپي جو اظهار ڪيو، جڏهن ته اسپيڪر ايندڙ ايڪسپو ۾ کيس ۽ سندس ٽيم کي شرڪت جي دعوت ڏيڻ جي خاطري ڪرائي. پارلياماني رابطن جي حوالي سان اسپيڪر، ملائيشيا ۽ سنڌ اسيمبلي جي پارليامينٽ وچ ۾ پارلياماني فرينڊشپ گروپن جي قيام جي تجويز پيش ڪئي. هن ٻڌايو ته اها تجويز ملائيشين قونصل جنرل جي اڳوڻي قونصل جنرل سان ٿيل ملاقات دوران پڻ ڏني وئي هئي. ملائيشين قونصل جنرل ملائيشيا جي رياست سيلانگور جي معاشي اهميت، ملڪ جي مجموعي قومي پيداوار ۾ ان جي نمايان ڪردار ۽ اهم معاشي ۽ بندرگاهي مرڪز جي حيثيت بابت بريفنگ ڏني. هن ملائيشيا جي منفرد آئيني بادشاهي نظام ۽ ڪجهه رياستن ۾ موروثي سلطانن جي نظام بابت پڻ آگاهه ڪيو. ٻنهي ڌرين پاڪستان ۽ ملائيشيا جي پارلياماني نظام، پارليامينٽ ۽ انهن جي ڪارروائي بابت پڻ خيالن جي ڏي وٺ ڪئي. قونصل جنرل پاڪستان ۾ ڪم ڪندڙ ملائيشين ڪمپنين ۽ انهن جي سرگرمين کي وڌيڪ وسعت ڏيڻ جي عزم کان پڻ آگاهه ڪيو. اسپيڪر چيو ته سنڌ اسيمبلي ٻنهي ملڪن وچ ۾ مضبوط رابطن جي واڌاري لاءِ پنهنجو ڪردار جاري رکندي. هن ملائيشين قونصل جنرل کي سنڌ اسيمبلي جي اجلاس ۾ شرڪت ۽ ڪراچي سميت سنڌ جي ٻين شهرن ۾ ٿيندڙ ايندڙ تقريبن ۾ شرڪت جي دعوت پڻ ڏني. ملائيشين قونصل جنرل اسپيڪر جي قيمتي وقت ۽ مهمان نوازي تي شڪريو ادا ڪندي پارلياماني، معاشي ۽ عوامي سطح تي پاڪستان ۽ ملائيشيا جي لاڳاپن کي وڌيڪ مضبوط بڻائڻ جي عزم جو اظهار ڪيو. ملاقات جي پڄاڻي تي اسپيڪر سيد اويس قادر شاهه ملائيشين قونصل جنرل کي سنڌ اسيمبلي جي يادگاري شيلڊ، سنڌي ٽوپي ۽ اجرڪ تحفي طور پيش ڪيا.