ايس ايم ايز ملڪي معيشت جي ڪرنگهي جي هڏي، جي ڊي پي ۾ 40 سيڪڙو ۽ غير زرعي روزگار ۾ 80 سيڪڙو حصيدار آهن: سيد ال خان

اسلام آباد-20 آگسٽ (اي پي پي) سينيٽ جي ڊپٽي چيئرمين سيدال خان ناصر چيو آهي ته پاڪستان ۾ 71 لک 40 هزار کان وڌيڪ ننڍا ۽ وچولي درجي جي ڪاروبار (ايس ايم ايز) ملڪي معيشت جي استحڪام ۾ بنيادي ڪردار ادا ڪري رهيا آهن جيڪي مجموعي ملڪي پيداوار ۾ اٽڪل 40 سيڪڙو، روانگي واپار ۾ 30 سيڪڙو ۽ غير زرعي روزگار ۾ 80 سيڪڙو کان وڌيڪ جو غير معمولي حصو وجهن ٿا. اهڙو اظهار هن راولپنڊي چيمبر آف سمال ٽريڊرز اينڊ سمال انڊسٽريز جي اهتمام هيٺ مقامي هوٽل ۾ منعقد انٽرنيشنل ايس ايم ايس ايڪسيلينس ايوارڊز 2026ع جي پُروقار تقريب ۾ خاص مهمان طور خطاب ڪندي ڪيو. هن چيو ته هي انگ اکر ان حقيقت جو ثبوت آهي ته ننڍي ۽ وچولي درجي جو ڪاروبار رڳو واپاري سرگرميون نه پر پاڪستان جي معيشت جي اصل ڪرنگهي جي هڏي آهي، جڏهن اسان ننڍي ڪاروبار کي مضبوط ڪندا آهيون ته حقيقت ۾ هڪ سڄي خاندان، ڪميونٽي ۽ پاڪستان جي معاشي مستقبل کي مستحڪم بڻائيندا آهيون. هن نوجوانن جي ڪردار تي روشني وجهندي چيو ته ملڪ جي ترقي لاءِ صرف نوڪريون ڳوليندڙ نه پر نوڪريون پيدا ڪندڙ نوجوان گهربل آهن. پاڪستان جي آبادي جو وڏو حصو نوجوانن تي بڌل آهي، جنهن کي رڳو روايتي تعليم بدران جديد هنر، ٽيڪنالاجي، سيڙپڪاري، تربيت ۽ عالمي مارڪيٽن تائين پهچ جي ضرورت آهي ته جيئن هو پنهنجي ڪاروباري آئيڊياز کي قومي ۽ عالمي برانڊز ۾ تبديل ڪري سگهن. سيدال خان ناصر ننڍن واپارين جي مسئلن جو ذڪر ڪندي آسان ۽ گهٽ لاڳت فنانسنگ جي اهميت تي زور ڀريو. هن حڪومتي سطح تي ايس ايم اي فنانسنگ، اسٽيٽ بئنڪ جي ريگوليٽري فريم ورڪ ۽ 28-2026ع ايڪسس ٽو فنانس پلان تحت ترجيحي بنيادن تي قرضن جي فراهمي جي قدمن کي ساراهيندي چيو ته ان ڳالهه کي يقيني بڻايو وڃي ته مالياتي پاليسين جا فائدا ڪاغذن مان نڪري عملي طور تي ننڍي ڪاروباري ماڻهن تائين پهچن. هن عورتن جي معاشي شموليت کي اڻٽر قرار ڏيندي چيو ته عورتون انٽر پرينيورز کي فنڊز، ڊجيٽل پليٽ فارمز ۽ مارڪيٽ تائين پهچ ڏئي معاشي ڪاميابي جا نوان رڪارڊ قائم ڪري سگهجن ٿا. ان کانسواءِ هن مقامي مصنوعات کي اي ڪامرس ۽ جديد معيار جي ذريعي عالمي ويليو چين جو حصو بڻائڻ تي زور ڀريو ته جيئن ملڪي روانگي واپار ۽ پرڏيهي ناڻي جي ذرخيرن ۾ اضافو ٿي سگهي. ڊپٽي چيئرمين ڪاروباري برادري کي يقين ڏياريو ته پارليامينٽ ڪاروبار دوست ماحول، شفاف نظام ۽ مستحڪم پاليسين کي هٿي ڏيڻ لاءِ پرعزم آهي. تقريب جي پڄاڻي تي هن راولپنڊي چيمبر آف سمال ٽريڊرز اينڊ سمال انڊسٽريز جي صدر سردار ثاقب نسيم، ايوارڊ ڪميٽي جي چيئرمين محمد رف راجه ۽ ايوارڊ حاصل ڪندڙ نمايان ڪاروباري ماڻهن ۽ ادارن کي شاندار ڪاميابي تي مبارڪون ڏنيون.