سنڌ جي وڏي وزير سان پاڪستان ايسوسيئيشن آف دي ڊيف يوٿ سيڪشن جي سيڪريٽري جي ملاقات

ڪراچي- 17 آگسٽ (اي پي پي) سنڌ جي وڏي وزير سيد مراد علي شاهه پاڪستان ايسوسئيشن آف دي ڊيف يوٿ سيڪشن جي سيڪريٽري محمد احمد خان سان ملاقات ڪئي جنهن گيلوڊيٽ يونيورسٽي، واشنگٽن، ڊي سي، يو ايس اي، جيڪو ٻڌڻ کان محروم ماڻهن جي تعليم جو دنيا جو اهم ترين ادارو آهي، پاران ڏنو ويندڙ معزز ورلڊ ڊيف ليڊرشپ اسڪالرشپ حاصل ڪندڙ پهريون پاڪستاني هجڻ جو اعزاز حاصل ڪيو آهي۔ وزيراعليٰ هائوس ۾ ٿيندڙ هن ملاقات ۾ لوڪل گورنمينٽ جي وزير ناصر شاهه، گهرو وزير ضياءُ الحسن لنجار، سيڪريٽري ڊي اي پي ڊي طهٰ فاروقي ۽ ٻين شرڪت ڪئي۔ ملاقات دوران پاڪستان ايسوسئيشن آف دي ڊيف جي نمائندن وڏي وزير کي آگاهه ڪيو ته محمد احمد خان کي فال 2026ع کان شروع ٿيندڙ ڊيف اسٽڊيز ۾ ٽن سالن جي ماسٽر آف آرٽس پروگرام لاءِ چونڊيو ويو آهي۔ هنن ان ڳالهه کي نمايان ڪيو ته پنهنجي تعليم مڪمل ڪرڻ کانپوءِ هو پاڪستان واپس اچڻ ۽ ٻڌڻ کان محروم ڪميونٽي کي بااختيار بڻائڻ ۽ اڳڀرائي لاءِ پنهنجي علم ۽ بين الاقوامي تجربي کي استعمال ڪرڻ جو ارادو رکي ٿو۔ احمد خان کي ان شاندار ڪاميابي تي مبارڪباد ڏيندي وڏي وزير مراد علي شاهه چيو ته اهڙي معزز بين الاقوامي اسڪالرشپ لاءِ سندس چونڊ سنڌ ۽ پاڪستان لاءِ انتهائي فخر جي ڳالهه آهي۔ هن وڌيڪ چيو ته هيءَ ڪاميابي معذور ماڻهن کي جڏهن برابري جا موقعا ۽ معياري تعليم تائين رسائي فراهم ڪئي وڃي ٿي ته سندن اندر موجود بي پناهه صلاحيتن ۽ ٽيلنٽ جي عڪاسي ڪري ٿي۔ وڏي وزير چيو ته محمد احمد خان هزارين نوجوانن، خاص ڪري ٻڌڻ کان محروم برادري جي ميمبرن لاءِ هڪ اتساهه جو ذريعو بڻجي ويو آهي۔ سندس ڪاميابي اهو ثابت ڪري ٿي ته عزم، سخت محنت، ۽ تعليم تائين رسائي رڪاوٽن تي قابو پائي سگهي ٿي ۽ اعليٰ ترين بين الاقوامي سطح تي موقعا پيدا ڪري سگهي ٿي۔ سڀني کي شامل ڪرڻ لاءِ سنڌ حڪومت جي عزم کي ورجائيندي وڏي وزير چيو ته صوبائي حڪومت سنڌ پرسنز وٿ ڊس ايبليٽيز اڪٽ، 2018 تحت معذور ماڻهن لاءِ برابر حقن، رسائي، ۽ تعليمي موقعن کي يقيني بڻائڻ لاءِ مختلف قدم کڻي رهي آهي۔ وڏي وزير ڊپارٽمينٽ آف ايمپاورمينٽ آف پرسنز وٿ ڊس ايبليٽيز ۽ تعليمي کاتي کي هدايت ڪئي ته هو ڪميونٽي جي مختلف صلاحيتن جي حامل خصوصي فردن جي شاندار ڪاميابين کي مڃتا ڏيڻ ۽ مدد ڪرڻ لاءِ رستا ڳولين ۽ اهڙين ڪاميابين جي ڪهاڻين کي هٿي ڏين جيڪي سڄي صوبي ۾ نوجوانن جي حوصلا افزائي ڪن۔ هن لاڳاپيل کاتن کي اها هدايت پڻ ڪئي ته هو پاڪستان ايسوسئيشن آف دي ڊيف سان رابطو برقرار رکن ۽ سنڌ ۾ ٻڌڻ کان محروم ڪميونٽي لاءِ تعليمي ۽ قيادت جي موقعن کي مضبوط ڪرڻ جي مقصد سان تجويزون تيار ڪن۔ محمد احمد خان وڏي وزير جو سندس حوصلا افزائي ۽ سهڪار تي شڪريو ادا ڪيو ۽ پنهنجي تعليم مڪمل ڪرڻ تي پاڪستان جي ٻڌڻ کان محروم ڪميونٽي جي خدمت ڪرڻ جي عزم جو اظهار ڪيو۔ ملاقات ۾ پاڪستان ايسوسئيشن آف دي ڊيف جي عهديدارن ۽ ٻڌڻ کان محروم ڪميونٽي جي نمائندن شرڪت ڪئي۔