سنڌ جي وڏي وزير پاران (سي ٽي ڊي) جي ڪارڪردگي جو جائزو ورتو ويو

ڪراچي-13 آگسٽ (اي پي پي) سنڌ جي وڏي وزير سيد مراد علي شاهه ڪائونٽر ٽيررازم ڊپارٽمينٽ (سي ٽي ڊي) جي ڪارڪردگي جو جائزو ورتو ۽ اڀرندڙ دهشتگردي جي خطرن جو مؤثر طريقي سان مقابلو ڪرڻ، انٽيليجنس تي ٻڌل ڪاررواين کي وڌائڻ، ۽ سڄي صوبي ۾ سيڪيورٽي کي بهتر بڻائڻ لاءِ فورس کي جامع طور تي مضبوط ڪرڻ جو حڪم ڏنو۔ وزير اعليٰ هائوس ۾ هڪ اعليٰ سطحي اجلاس جي صدارت ڪندي وڏي وزير کي موجوده خطرن جي منظرنامي، سي ٽي ڊي جي آپريشنل ڪارڪردگي، جاري تحقيقات، بنيادي ڍانچي جي ترقي، ۽ دهشتگردي جي خاتمي جي ڪاررواين لاءِ مستقبل جي ضرورتن بابت بريفنگ ڏني وئي۔ اجلاس ۾ گھرو وزير ضياءُ الحسن لنجار، چيف سيڪريٽري آصف حيدر شاهه، گهرو سيڪريٽري اقبال ميمڻ، انسپيڪٽر جنرل آف پوليس جاويد عالم اوڍو، وڏي وزير جو پرنسپل سيڪريٽري آغا واصف، ايڊيشنل آءِ جي سي ٽي ڊي ذوالفقار لاڙڪ، سيڪريٽري ناڻو اصغر ميمڻ، ڊي آءِ جي سي ٽي ڊي اظفر مهيسر ۽ ٻين سينيئر آفيسرن شرڪت ڪئي۔ سي ٽي ڊي اجلاس کي انتهاپسند ۽ فرقيواراڻي تنظيمن پاران درپيش خطرن بابت پڻ بريفنگ ڏني . سي ٽي ڊي جي انگن اکرن موجب هلندڙ سال دوران دهشتگردي جا 9 واقعا رپورٽ ٿيا جڏهن ته 2025ع دوران 37 واقعا ٿيا هئا جيڪا تقريبن 76 سيڪڙو گهٽتائي کي ظاهر ڪري ٿي۔ هن سال رڪارڊ ٿيل نون واقعن مان ستن جو اڳ ۾ ئي سراغ لڳائي جاچ ڪئي وئي آهي جيڪا تقريبن 78 سيڪڙو سراغ لڳائڻ جي شرح کي ظاهر ڪري ٿي۔ سي ٽي ڊي رپورٽ ڪيو ته 2026ع دوران 918 انٽيليجنس تي ٻڌل ڪارروايون ڪيون ويون، جن جي نتيجي ۾ 87 دهشتگردن کي گرفتار ڪيو ويو ۽ مقابلن ۾ چار عسڪريت پسند مارجي ويا۔ آءِ جي پوليس جاويد عالم اوڍو وڏي وزير کي تحريڪ طالبان پاڪستان سان لاڳاپيل هڪ نيٽ ورڪ جي اهم ميمبرن جي گرفتاري بابت بريفنگ ڏني جيڪي مبينا طور تي 2025ع ۽ 2026ع دوران پوليس آفيسرن جي ٽارگيٽ ڪلنگ ۾ ملوث هئا۔ ڪراچي ۾ هڪ فالو اپ آپريشن دوران، سي ٽي ڊي مک جوابدار ۽ سندن ساٿي کي گرفتار ڪري هٿيار ۽ بارود هٿ ڪيو. سي ٽي ڊي عسڪريت پسندن جي نيٽ ورڪن خلاف ڪاررواين دوران 2,000 ڪلوگرام کان وڌيڪ ڌماڪيدار مواد هٿ ڪرڻ جي پڻ رپورٽ ڪئي۔آءِ جي پوليس جاويد عالم اوڍو اجلاس کي ڪراچي ٽرانسپورٽ ڪمپني حمله ڪيس جي جاچ ۾ اڳڀرائي بابت پڻ بريفنگ ڏني۔ 9 جوابدار گرفتار ڪيا ويا آهن، هڪ گڏيل جاچ ٽيم جوڙي وئي آهي، ڪيترائي پڇا ڳاڇا جا سيشن منعقد ڪيا ويا آهن ۽ ڪيترن ئي سهولتڪارن جي سڃاڻپ ڪئي وئي آهي۔ جاچ اڃا جاري آهي۔ سي ٽي ڊي قانون نافذ ڪندڙ ادارن تي منصوبابندي ڪيل حملن، ڊرون تي ٻڌل دهشتگردانه سرگرمين ۽ اسٽريٽجڪ اثاثن تي حملن ۾ ملوث ڪارندن خلاف ڪامياب ڪاررواين جي پڻ رپورٽ ڪئي۔ فرقيواراڻي تشدد ۽ انتهاپسند نيٽ ورڪن سان جڙيل ڪيترن ئيشڪي ماڻهن کي پڻ گرفتار ڪيو ويو۔ وڏي وزير کي ٻڌايو ويو ته سي ٽي ڊي فيوزن سينٽر انٽيليجنس گڏ ڪرڻ ۽ ڊيجيٽل تحقيقات کي نمايان طور تي بهتر بڻايو آهي۔ منصوبي جي فيز-I دوران، 32,000 کان وڌيڪ سيلولر سپورٽ تجزيا ڪيا ويا، 31,000 کان وڌيڪ ڪرائم ڊيٽا تجزيا مڪمل ٿيا، 1,000 کان وڌيڪ ڊيجيٽل فارنزڪ امتحانات ڪيا ويا، 1,600 کان وڌيڪ وجوئيل انهانسمينٽ ڪيسن تي ڪارروائي ڪئي وئي جڏهن ته انتهاپسنداڻين سرگرمين سان جڙيل سوين سوشل ميڊيا اڪائونٽس کي بلاڪ يا رپورٽ ڪيو ويو۔ گهرو وزير ضياءُ الحسن لنجار فيوزن سينٽر کي وڌيڪ مضبوط ڪرڻ ۽ علائقائي سب فيوزن سينٽرن سان هموار انضمام کي يقيني بڻائڻ لاءِ جديد انٽيليجنس سافٽ ويئر، ڊيجيٽل فارنزڪ ٽولز، ڪرائم ايناليٽڪس پليٽ فارمز، آرٽيفيشل انٽيليجنس سان هلندڙ سسٽمز ۽ جي پي يو تي ٻڌل انفراسٽرڪچر لاءِ اضافي فنڊز مختص ڪرڻ جي درخواست ڪئي۔اجلاس کي ٻڌايو ويو ته سي ٽي ڊي سنڌ صوبي سڄي ۾ بنيادي ڍانچي جي ترقي جا وڏا منصوبا شروع ڪري رهيو آهي۔ سالياني ترقياتي پروگرام تحت سکر ۾ هڪ مخصوص سي ٽي ڊي ڪمپليڪس جي تعمير جو آغاز اڳ ۾ ئي ٿي چڪو آهي، جڏهن ته ڪراچي ۽ حيدرآباد ۾ جديد سي ٽي ڊي ڪمپليڪسز لاءِ تجويزون منظوري لاءِ پيش ڪيون ويون آهن۔ کاتي آپريشنل ضرورتن تي پڻ روشني وڌي جن ۾ بڪتر بند گاڏيون، نگراني ڪندڙ ڊرونز، اينٽي ڊرون سسٽمز، اليڪٽرڪ گاڏيون، انٽيليجنس اهلڪارن لاءِ موٽرسائيڪلون، هائيڊرولڪ سيڪيورٽي گيٽس، سي سي ٽي وي سسٽمز ۽ ٻيا حفاظتي انفراسٽرڪچر شامل آهن۔ مجموعي سيڪيورٽي صورتحال ۽ سي ٽي ڊي جي ڪارڪردگي جو جائزو وٺڻ کانپوءِ، وڏي وزير سيد مراد علي شاهه گهرو کاتي، پوليس ۽ سي ٽي ڊي کي انٽيليجنس تي ٻڌل ڪاررواين کي وڌيڪ مضبوط ڪرڻ ۽ سڄي صوبي ۾ سخت چوڪسي برقرار رکڻ جي هدايت ڪئي۔ وڏي وزير دهشتگردن جي نيٽ ورڪن جي نگراني وڌائڻ، انٽيليجنس ۽ قانون نافذ ڪندڙ ادارن وچ ۾ هم آهنگي کي بهتر بڻائڻ، ۽ دهشتگردي جي خاتمي جي ڪاررواين لاءِ جديد ٽيڪنيڪل حلن جي نفاذ کي تيز ڪرڻ جو حڪم ڏنو. وڏي وزير چيف سيڪريٽري کي سي ٽي ڊي لاءِ گهربل جديد نگراني جي اوزارن، اينٽي ڊرون سسٽمز ۽ مخصوص آپريشنل وسيلن جي خريداري کي تيز ڪرڻ جي پڻ هدايت ڪئي۔ وڏي وزير ان ڳالهه تي زور ڏنو ته حڪومت سي ٽي ڊي کي مضبوط ڪرڻ لاءِ تمام ضروري وسيلا فراهم ڪندي ۽ ان ڳالهه کي يقيني بڻائيندي ته قانون نافذ ڪندڙ ادارا اڀرندڙ سيڪيورٽي چيلينجز جو مقابلو ڪرڻ لاءِ مڪمل طور تي ليس رهن۔ وڏي وزير چيو حڪومت سنڌ ۾ امن ۽ استحڪام برقرار رکڻ لاءِ پرعزم آهي۔ اسان پنهنجن ادارن کي مضبوط بڻائڻ، انٽيليجنس صلاحيتن کي وڌائڻ ۽ عوامي تحفظ لاءِ هر خطري سان سختي ۽ مؤثر طريقي سان نبرڻ جاري رکنداسين۔ اجلاس سنڌ سڄي ۾ دهشتگرد ۽ انتهاپسند نيٽ ورڪن خلاف دهشتگردي جي خاتمي جي قدمن کي وڌيڪ تقويت ڏيڻ، بين ادارتي هم آهنگي کي بهتر بڻائڻ ۽ حاصل ڪيل ڪاميابين کي برقرار رکڻ جي عزم سان پڄاڻي تي پهتو۔