ڪراچي پورٽ ٽرسٽ جي ٽيرف ۾ 5 سيڪڙو ڄاڻايل اضافو منجمند، واپاري شعبي کي 500 ملين رپين جو رليف ملندو: محمد جنيد انوار چوڌري

اسلام آباد-18 جون (اي پي پي) سامونڊي معاملن واري وفاقي وزير محمد جنيد انوار ڪراچي پورٽ ٽرسٽ جي مالي سال 27-2026ع لاءِ ڄاڻايل 5 سيڪڙو ٽيرف واڌ کي منجمند ڪرڻ جو اعلان ڪندي چيو آهي ته ان فيصلي سان آمدني واپار ڪندڙ، روانگي واپار ڪندڙ ۽ عوام کي مجموعي طور تي 500 ملين رپين کان وڌيڪ جو رليف ملندو. وزارت مان جاري پريس رليز موجب خميس ڏينهن وفاقي وزير چيو ته هي فيصلو وفاقي حڪومت جي ان پاليسيءَ موجب ڪيو ويو آهي جنهن جو مقصد ڪاروباري برادريءَ تي مالي بار گهٽ ڪرڻ ۽ ملڪي واپار ۽ روانگي واپار کي هٿي ڏيڻ آهي. محمد جنيد انوار چيو ته بندرگاهون پاڪستان جي معيشت ۾ اهم حيثيت رکن ٿيون ۽ پورٽ چارجز ۾ ڪنهن به اضافي سان ڪاروبار جي لاڳت سڌيءَ ريت وڌي ويندي آهي. هن چيو ته وزيراعظم بليو اڪانومي ويزن موجب واپاري سرگرمين کي هٿي ڏيڻ، ڪاروباري طبقي کي سهولت فراهم ڪرڻ ۽ معيشت کي مستحڪم بنائڻ لاءِ ٽيرف ۾ ڄاڻايل واڌ روڪڻ جو فيصلو ڪيو آهي. وفاقي وزير جو چوڻ هو ته ٽيرف ۾ واڌ کي منجمند رکڻ سان پاڪستاني روانگي واپار عالمي مارڪيٽن ۾ پنهنجي چٽاڀيٽي برقرار رکڻ ۾ ڪامياب رهندو، جڏهن ته بندرگاهي سهولتون استعمال ڪندڙ آمدني واپار ڪندڙن جي خرچن ۾ به واڌ نه ٿيندي. هن اميد ظاهر ڪئي ته انهن قدمن سان واپاري سرگرمين ۾ واڌ ٿيندي، روانگي واپار جي شعبي کي هٿي ملندي ۽ موجوده معاشي چئلينجز دوران قومي معيشت کي هاڪاري سهارو حاصل ٿيندو.