مصنوعي ذهانت تيزي سان سائبر سيڪيورٽي کي تبديل ڪري رهي آهي: ورلڊ اڪنامڪ فورم

جنيوا -05 مئي (اي پي پي) ورلڊ اڪنامڪ فورم جي رپورٽ ۾ چيو ويو آهي، ته مصنوعي ذهانت تيزي سان سائبر سيڪيورٽي جي شعبي کي تبديل ڪري رهي آهي ۽ ان ميدان ۾ سڀ کان وڏي تبديلي جو سبب بڻجي رهي آهي. پرڏيهي ميڊيا موجب رپورٽ ۾ چيو ويو آهي، ته اٽڪل 94 سيڪڙو سائبر اڳواڻ مصنوعي ذهانت کي هڪ فيصلائتي طاقت قرار ڏين ٿا جڏهن ته 77 سيڪڙو ادارا اڳ ئي پنهنجي سائبر ڪارروائين ۾ ان جو استعمال ڪري رهيا آهن. اي آءِ اينڊ سائبر امپاورنگ ڊفينڊرز جي عنوان سان شايع ٿيل ان رپورٽ، جيڪا ڪي پي ايم جي شراڪتداري سان تيار ڪئي وئي، ۾ لاڳت ۾ گهٽتائي، رد عمل جي رفتار ۽ نظام جي مضبوطي ۾ واضح بهتري کي اجاگر ڪيو ويو آهي. رپورٽ ۾ چيو ويو آهي، ته جتي خطرناڪ عنصر مصنوعي ذهانت کي ڌوڪي ڏيڻ لاءِ خودڪار بڻائڻ، ميل ويئر تيار ڪرڻ ۽ مشيني رفتار سان حملا وڌائڻ لاءِ استعمال ڪري رهيا آهن، اتي اسٽريٽجڪ انداز ۾ مصنوعي ذهانت اختيار ڪندڙ ادارا نمايان فائدا حاصل ڪري رهيا آهن. اهڙا ادارا جيڪي سيڪيورٽي ۾ وسيع پيماني تي مصنوعي ذهانت استعمال ڪندا آهن، اهي ڊيٽا ليڪ جي سراسري خرچن ۾ اٽڪل 1.9 ملين ڊالرن تائين گهٽتائي  ۽ حملن جي وڇوٽي ۾ اٽڪل 80 ڏينهن تائين گهٽتائي آڻڻ ۾ ڪامياب ٿيا آهن. ورلڊاڪنامڪ  فورم جي سينٽر فار سائبر سيڪيورٽي جي سربراهه اڪشي جوشي چيو ته  مصنوعي ذهانت وٽ اها صلاحيت موجود آهي ته هوءَ توازن جو دفاع ڪرڻ وارن جي حق ۾ فيصلو موڙي ڇڏي. اهي ادارا جيڪي ان کي هڪ اسٽريٽجڪ صلاحيت طور اختيار ڪندا، نه ئي رڳو هڪ الڳ ٽول طور تي، اهي وڌندڙ سائبر خطرن کي مضبوطي ۽ مقابلي واري حد ۾ بدلائڻ ۾ بهتر پوزيشن ۾ هوندا. اها رپورٽ 20 حقيقي ڪيس اسٽڊيز، انفرادي انٽرويوز ۽ ورڪشاپس مان حاصل ٿيندڙ ڄاڻ تي ٻڌل آهي، جيڪا ورلڊاڪنامڪ فورم جي سائبر فرنٽيئرز: اي آءِ اينڊ سائبر قدمن تحت منعقد ٿيون، جن ۾ 15 صنعتن سان تعلق رکندڙ 84 ادارن جي 105 نمائندن شرڪت ڪئي. رپورٽ ۾ ڪاروباري ۽ حڪومتي اڳواڻن تي زور ڀريو ويو ته هو مصنوعي ذهانت  کي بنيادي سيڪيورٽي صلاحيت طور اختيارڪن ۽ صرف ٽيڪنالاجي ئي نه پر مهارتن، طريقيڪار ۽ گورننس ۾ به سيڙپڪاري ڪن ته جيئن مشيني رفتار سان دفاع کي ممڪن بڻائي سگهجي.