گدلاڻ کان پاڪ بندرگاهون معاشي ترقي ۽ محفوظ سامونڊي ماحول لاءِ اڻٽر آهن: محمد جنيد انوار چوڌري

اسلام آباد- 04 مئي (اي پي پي) سامونڊي معاملن واري وفاقي وزير محمد جنيد انوار چوڌري صاف ۽ پائيدار سامونڊي ماحول جي قيام جي حڪومتي عزم جو ورجاءُ ڪندي چيو آهي ته گدلاڻ کان پاڪ بندرگاهون محفوظ جهازراني ۽ معاشي ترقيءَ لاءِ نهايت اهم آهن. وزارت مان جاري پريس رليز موجب پنهنجي بيان ۾ وفاقي وزير ڪراچي پورٽ ٽرسٽ جي ميرين پولوشن ڪنٽرول ڊپارٽمينٽ جي تازي هفتيوار صفائي مهم جي ڪارڪردگيءَ کي ساراهيو، جنهن دوران حساس بندرگاهه وارن علائقن مان 16430 ڪلوگرام ٺوس ڪچرو جمع ڪيو ويو. ان ڪچري ۾ پلاسٽڪ جو ڍير، ترندڙ گدلاڻ، نامياتي ڪچرو ۽ استعمال ٿيل ماهيگيري جو سامان شامل آهي، جيڪو سامونڊي ماحولياتي نظام، بندرگاهي سرگرمين ۽ سامونڊي حياتياتي جدت لاءِ خطرو بڻجي رهيا هئا. هن ٻُڌايو ته صفائي مهم دوران ڊمپنگ ۽ ٽرانسفر سائيٽ، ايسٽ وارف، ويسٽ وارف ۽ بوٽ بيسن جيٽي سميت اهم ماڳن کي هدف بڻايو ويو، جتان جهازن جي اچ وڃ، ڪارگو هينڊلنگ ۽ شهري ٽريفڪ سبب گدلاڻ جي خطرن ۾ واڌ ٿئي ٿي. ان آپريشن ۾ 54 ٻيڙين ۽ 164 اهلڪارن مختلف شفٽن ۾ حصو ورتو ته جيئن سمورن علائقن جي اثرائتي صفائي يقيني بڻائي سگهجي. وفاقي وزير چيو ته گڏ ڪيل سموري ڪچري کي ماحولياتي ضابطن موجب سنڌ سالڊ ويسٽ مئنجمينٽ جي گاربيج ٽرانسفر اسٽيشن منتقل ڪيو ويو، جڏهن ته ثانوي گدلاڻ کان بچاءُ لاءِ حفاظتي اصولن تي مڪمل عملدرآمد ڪيو ويو. جنيد انوار چوڌري جو چوڻ هو ته بندرگاهن جي مسلسل صفائيءَ سان جهازن جي اچ وڃ آسان بڻجي ٿي، خطرن ۾ گهٽتائي اچي ٿي ۽ واپاري سرگرمين کي هٿي ملي ٿي. هن ڪراچي بندرگاهه جي چيئرمين ايڊمرل شاهد احمد جي قيادت کي ساراهيندي مستقبل جي رٿائن جو به ذڪر ڪيو، جن ۾ جديد ڪچرو جمع ڪندڙ اوزارن ۽ مانيٽرنگ جي نظام جا ٺڪاڻا شامل آهن. هن وڌيڪ چيو ته اهي قدم ماحولياتي تحفظ جي حوالي سان ڪي پي ٽي جي فعال ڪردار جي عڪاسي ڪن ٿا، جيڪي پاڪستان جي پائيدار بحري هدفن ۽ عالمي ذميدارين سان هم آهنگ آهن.