شڪارپور ۾ حفاظتي ٽُڪن جو عالمي هفتو ملهائڻ جي تقريب ٿي گذري

لاڙڪاڻو-23 اپريل (اي پي پي) شڪارپور ۾ حفاظتي ٽڪن جو عالمي هفتو 2026 جي افتتاحي تقريب ضلعي صحت آفيس شڪارپور ۾ منعقد ڪئي وئي. تقريب جو باقاعده افتتاح ڊپٽي ڪمشنر شڪارپور شڪيل احمد ابڙو ۽ ضلع صحت آفيسر ڊاڪٽر ارشاد احمد سرڪي ڪيو. افتتاحي تقريب جو مقصد حفاظتي ٽڪن جي اهميت بابت آگاهي وڌائڻ ۽ ضلعي سطح تي روٽين اميونائيزيشن جي سرگرمين کي مضبوط ڪرڻ هو. ڊپٽي ڪمشنر شڪارپور ۽ ضلع صحت آفيسر پنهنجي خطاب ۾ حفاظتي ٽڪن جي عالمي هفتي جي اهميت کي اجاگر ڪيو. هنن هفتي دوران ٿيندڙ مختلف سرگرمين بابت پڻ آگاهي ڏني، جن جو مقصد ماڻهن ۾ ٽڪن بابت شعور پيدا ڪرڻ ۽ سروس ڊليوري کي بهتر بڻائڻ آهي. تقريب ۾ فوڪل پرسن اي پي آءِ شڪارپور ڊاڪٽر اصغر علي مهر، ڊي ڊي ايڇ او ڊاڪٽر اطهر علي شاهه، ڊاڪٽر پرويز علي، ڊاڪٽر جهانگير علي شيخ ۽ ڊاڪٽر فيضان علي شيخ سميت ٻين اهم مقررن خطاب ڪيو. سڀني مقررن حفاظتي ٽڪن جي اهميت، ٻارن کي موذي بيمارين کان بچائڻ ۾ ان جي ڪردار ۽ ماءُ ۽ ٻار جي صحت کي بهتر بڻائڻ تي تفصيلي روشني وڌي.

تقريب ۾ سرسو ۽ پي پي ايڇ آئي جا ڊسٽرڪٽ مينيجرز، ضلعي تعليم آفيسر پرائمري ۽ سيڪنڊري، نرسنگ ڪاليج جي پرنسپل، نيشنل پروگرام ڪوآرڊينيٽرز، هيلٿ مينيجمينٽ ٽيم، ڊي ايس وي، ٽي ايس وي، ليڊي هيلٿ ورڪرز، نرسنگ شاگردياڻين، ميڊيڪل سپرنٽنڊنٽس ۽ ٻين لاڳاپيل کاتن جي نمائندن وڏي انگ ۾ شرڪت ڪئي. افتتاحي تقريب ضلعي شڪارپور ۾ حفاظتي ٽڪن جي عالمي هفتي جي سرگرمين جي شاندار شروعات ثابت ٿي، جنهن سان نه رڳو شعور وڌيو پر مختلف ادارن وچ ۾ هم آهنگي پڻ مضبوط ٿي. افتتاحي سيمينار کانپوءِ آگاهي واڪ پڻ ڪيو ويو، جنهن ۾ سيمينار جي سمورن شرڪت ڪندڙن حصو ورتو.