وزيراعظم پاران پاڪستان ۽ بحرين جي مضبوط لاڳاپن کي معاشي تعاون ۾ تبديل ڪرڻ جي عزم جو اظهار، پاڪستان ۾ مختلف شعبن ۾ سيڙپڪاري جي دعوت

مناما -27 نومبر (اي پي پي) وزيراعظم محمد شهباز شريف پاڪستان ۽ بحرين جي مضبوط لاڳاپن کي معاشي تعاون ۾ تبديل ڪرڻ جي عزم جو اظهار ۽ بحرين جي سيڙپڪارن کي پاڪستان ۾ مختلف شعبن ۾ سيڙپڪاري جي دعوت ڏيندي چيو آهي ته پاڪستان معاشي سڌارن ۽ نجي شعبي جي قيادت ۾ ترقي جي نئين دور ۾ داخل ٿي رهيو آهي، زراعت، آءِ ٽي، معدنيات، توانائي ۽ ٻين شعبن ۾ سيڙپڪاري جا نوان دروازا کليل آهن، بحرين جا سيرپڪار پاڪستان اچن ۽ اسان سان ڀائيواري ڪن، اسان سيڙپڪاري، گڏيل منصوبن ۽ ڪاروباري تعاون جي لاءِ هر ممڪن سهولت فراهم ڪنداسين، پاڪستان وٽ افرادي قوت، وسيلن، اڀرندڙ منڊيءَ، اسٽريٽجڪ جاگرافيائي بيهڪ ۽ نوجوانن جي وڏي طاقت آهي، پاڪستان ۽ نار تعاون ڪائونسل جي وچ ۾ آزاد واپار جو معاهدو حتمي مرحلن ۾ آهي، اهو معاهدو واپاري لاڳاپن کي نئين بلندين تائين پهچائيندو. هن اهڙن خيالن جو اظهار ڪاروباري برادري جي تقريب کي خطاب ڪندي ڪيو. وزيراعظم چيو ته انتهائي پنهنجائپ ۽ گرمجوشي سان ڀليڪار چوڻ تي بحرين جي حڪومت ۽ عوام جو شڪرگذار آهيان، اسان پنهنجي بحريني ڀائرن خاص طور تي شاهه بحرين ۽ ولي عهد ۽ وزيراعظم جي مهمان نوازي مان مستفيد ٿيا آهيون جهڙي انداز ۾ اسان جو استقبال ڪيو ويو اهو سدائين اسان کي ياد رهندو، بحرين اچي ائين محسوس ٿي رهيو آهي جيئن اسان پنهنجي ئي گهر آيا آهيون. وزيراعظم چيو ته بحرين ۽ پاڪستان ٻه ڀائر ملڪ آهن ۽ اسان جا لاڳاپا ڪيترن ئي ڏهاڪن تي ٻڌل آهن، اهي لاڳاپا ثقافتي، مذهبي، گڏيل احترام ۽ اعتماد تي ٻڌل آهن ۽ اهو اسان جي لاڳاپن جو ٿنڀ آهي. وزيراعظم چيو ته ٻنهي ملڪن جي وچ ۾ اسٽريٽجڪ تعاون ڪيترن ئي ڏهاڪن کان موجود آهي پر اڄ هو انهن لاڳاپن کي وڌيڪ سگهه ڏيڻ جي لاءِ آيو آهي. وزيراعظم چيو ته شاهه حمد بن عيسيٰ الخليفه ۽ ولي عهد ۽ وزيراعظم کي چيو آهي ته پاڪستان ڀائر ملڪ بحرين سان زراعت، آءِ ٽي، اي آءِ، فن ٽيڪ ۽ ٻين سمورن شعبن سميت اقتصادي تعاون کي فروغ ڏيڻ جي لاءِ تيار آهي، اسان انهن شعبن ۾ پنهنجي ڪوششن، علم، تجربي ۽ هڪ ٻئي سان تعاون جي عزم جي ذريعي هم آهنگي پيدا ڪري سگهون ٿا. وزيراعظم چيو ته سندس دوري جو مقصد اقتصادي شعبن ۾ نئين اڳڀرائي آڻڻ آهي، شاهه بحرين ۽ ولي عهد ۽ وزيراعظم جي پاڪستان سان اڻٿڪ وابستگي تي سندن ٿورائتو آهيان. وزيراعطم چيو ته اسان جي ملاقاتن جو ماحول بلڪل هڪ خاندان جي گڏجي ويهڻ جهڙو هو ۽ اهي ملاقاتون انتهائي بامقصد ۽ ڪارائتيون رهيون آهن، انهي بنياد تي آئون چئي سگهان ٿو ته آئون هتي مهمان نه آهيان پر پنهنجي خاندان جي ماڻهن، پنهنجي بحريني ڀائرن ۽ ڀينرن سان ملڻ آيو آهيان. وزيراعظم چيو ته پاڪستان ۾ آبادي جي اڪثريت نوجوانن تي ٻڌل آهي، نوجوان اسان جي طاقت آهن اسان جي 60 سيڪڙو نوجوانن جي عمر 15 کان 30 سالن جي وچ ۾ آهي، نوجوان آبادي هڪ چئلينج، وڏي نعمت ۽ هڪ موقعو به آهي، چيني چوڻي موجب اهو هڪ چئلينج به آهي ۽ هڪ زبردست موقعو به آهي، اسان پنهنجي نوجوانن کي بااختيار بڻائي ان چئلينج کي عظيم موقعي ۾ تبديل ڪرڻ جي لاءِ پرعزم آهيون، انهن کي آءِ ٽي، اي آءِ، فني ۽ پيشيواراڻي مهارت ۽ ٻين شعبن ۾ تربيت ڏئي ان چئلينج کي موقعي ۾ بدلائينداسين ۽ پنهنجي بحريني ڪاروباري ڀائرن سان گڏجي اسان انهن شعبن ۾ هڪ زبردست قوت بڻجنداسين. وزيراعظم چيو ته اهو ئي وقت آهي ته ان موقعي مان فائدو کنيو وڃي ڇو ته وقت ۽ لهر ڪنهن جو انتظار ناهي ڪندي، اهو ڏسي دلي خوشي ٿئي ٿي ته بحرين ۾ اسان جي متحرڪ پاڪستاني ڪميونٽي هڪ لک کان وڌيڪ جي انگ ۾ موجود آهي، اها ڪميونٽي اسان جي لاءِ فخر جوڳي آهي، جنهن به ملڪ جو مون دورو ڪيو آهي مون پاڪستاني ڪميونٽي سان ڳالهه ٻولهه ڪئي آهي ۽ مون اتي پاڪستانين جا داستان ٻڌا آهن جن جي پاڪستان سان محبت ڪڏهن گهٽ ناهي ٿي جيتوڻيڪ هنن پنهنجي صلاحيتن ۽ محنت کي ٻين ملڪن ۽ ثقافتن جي ترقي جي لاءِ وقف ڪري رکيو آهي. وزيراعظم چيو ته پاڪستاني سڃاڻپ ڪنهن جاگرافيائي جي پابند نه آهي جتي به هجن اها سڃاڻپ انهن پاڪستانين جي دلين ۾ موجود هوندي آهي، هتي بحرين ۾ به اهو ئي جذبو ڪنهن شڪ کان مٿانهون واضح طور تي نظر اچي ٿو، عظيم پاڪستانين کي بحرين ۽ پاڪستان ٻنهي جي لاءِ خدمتن تي سلام پيش ڪريان ٿو، اهي پاڪستان جا عظيم سفير آهن ۽ پاڪستان جي قومي معاشي ترقي ۾ حصو وجهڻ تي انهن تي فخر آهي. وزيراعظم چيو ته بحرين ۾ رهندڙ پاڪستانين جي محنت ۽ ڪوششن سان ڪمايل رقم قيمتي مٽاسٽا جي ناڻي جي شڪل ۾ گذريل مالي سال دوران 48 ڪروڙ 40 لک ڊالر تائين رهي، اهو انتهائي قابل قدر آهي، شاهه بحرين جي پاڪستانين جي لاءِ فراخدلاڻي حمايت تي ان جو ٿورائتو آهيان. وزيراعظم چيو ته پاڪستاني ڀائرن ۽ ڀينرن کي گذارش ڪندس ته اهي نه رڳو پاڪستان پر بحرين جا به عظيم سفير بڻجن ڇو ته پاڪستان ۽ بحرين هڪ جان ٻه دل آهن ۽ اسان جي دل گڏ ڌڙڪي ٿي، مون کي يقين آهي ته توهان پنهنجي زبردست خدمتن سان پنهنجي بحريني ڀائرن ۽ ڀينرن کي پاڻ تي فخر ڪرڻ تي مجبور ڪري ڇڏيندا، توهان جي لاءِ پاڪستان ۽ منهنجا دروازا سدائين کليل رهندا. وزيراعظم چيو ته شاهه حمد بن عيسيٰ الخليفه جي دُور انديش، متحرڪ ۽ دانشمنداڻي قيادت ۽ بحرين جي ولي عهد ۽ وزيراعظم جي عظيم قيادت ۽ رهنمائي ۾ بحرين معاشي ترقي، مالياتي جدت ۽ انساني مرڪزيت تي ٻڌل ترقي ڪئي هڪ مشعل جي طور تي اڀريو آهي، پاڪستان بحرين جي ترقي جي ماڊل کان تمام گهڻو متاثر آهي. هن چيو ته پاڪستان وسيع موقعن، هنرمندي، وسيلن ۽ صارفين جي وڌندڙ انگ واري مارڪيٽ رکندڙ ملڪ آهي جيڪو اسٽريٽجڪ جاگرافيائي بيهڪ رکي ٿو، بحرين جي مالياتي مهارت، ڪاروباري بصيرت  ۽ عالمي موقف جي حصيداري ٿي وڃي ته پاڪستاني منڊيون وسيع امڪان رکندڙ آهن. هن چيو ته پاڪستان ڍانچاجاتي سڌارن جي عمل مان گذري رهيو آهي جيڪو معاشي سڌارن، ڊيجيٽل جديديت ۽ نجي شعبي جي قيادت ۾ ترقي جي لاءِ فيصلائتو ڪردار رکندڙ بڻجي چڪو آهي، اسان سرخ ڦيٿن جي رڪاوٽن کي سدائين جي لاءِ ختم ڪري ڇڏيو آهي، پنهنجي ضابطن کي مضبوط بڻايو آهي، زرعي ڪاروبار، آءِ ٽي، معدنيات، توانائي ۽ سياحت جهڙي نئين شعبن ۾ ڊگهي مدي واري ڀائيواري جي لاءِ کولي ڇڏيا آهن. وزيراعظم چيو ته بحرين جو نائب وزيراعظم، ناڻيوواري وزير، صنعت وارو وزير، پرڏيهي وزير ۽ بحرين جي ڪاروباري ادارن جا سيڙپڪار پاڪستان اچن اسان توهان سان گڏجي ڪم ڪرڻ چاهيون ٿا، توهان جي عظيم تجربي ۽ مهارت مان اسان سکنداسين، توهان پنهنجي مشوري ۽ علم سان پاڪستان جي صنعت ۽ زراعت کي متحرڪ بڻايو. وزيراعظم چيو ته پاڪستان ۽ نار تعاون ڪائونسل جي وچ ۾ آزاد واپار جو معاهدو حتمي مرحلن ۾ آهي جنهن تي جلد صحيحون ٿيڻ جي اميد آهي، ان معاهدي سان پاڪستان ۽ جي سي سي ملڪن خاص طور تي بحرين جي وچ ۾ واپار کي فروغ ملندو. وزيراعظم چيو ته هو پاڪستان جي وزيراعظم جي طور تي ئي نه پر هڪ اهڙي قوم جي سي اي او جي طور تي مخالف آهي جيڪو بحريني ڪاروباري ماڻهن سان حصيداري جو خواهشمند ۽ گڏيل منصوبن جي لاءِ هر طرح جي مدد ڪرڻ جي لاءِ تيار آهي ۽ بحرين جي سيڙپڪاري جي منصوبن ۾ سهولت فراهم ڪرڻ ۽ گڏيل طور تي لاڀائتي سفر ۾ تعاون ڪندو. وزيراعظم چيو ته هڪ مشهور چوڻي آهي ته جيڪڏهن توهان جلدي پهچڻ چاهيو ٿا ته اڪيلي وڃو ۽ جيڪڏهن توهان پري وڃڻ چاهيو ٿا ته گڏ سفر ڪريو، اسان پاڪستان ۽ بحرين کي انهي نظر سان ڏسون ٿا ڀلي توهان هڪ اهڙا بحريني سيڙپڪار هجو جيڪي پاڪستان ۾ امڪان ڏسي رهيا هجو يا هڪ پاڪستاني ڪاروباري شخص هجو جيڪو بحرين جي عظيم ترقي ۾ حصو وجهي رهيو هجي، دعا آهي ته هي لمحو هڪ جرئتمنداڻي ۽ معنيٰ خيز تعاون جي شروعات ثابت ٿئي. بحرين جي ناڻي واري وزير شيخ سلمان بن خليفه الخليفه چيو ته وزيراعظم محمد شهباز شريف جي موجودگي اسان جي لاڳاپن جي تجديد آهي، نسل در نسل پاڪستاني شهرين بحرين جي ترقي ۾ نمايان ڪردار ادا ڪيو آهي ۽ اڄ به ڪيترائي پاڪستاني بحرين کي پنهنجو ٻيو گهر سمجهن ٿا. هن چيو ته حبيب بئنڪ، يونائيٽيڊ بئنڪ ۽ نيشنل بئنڪ جهڙا پاڪستاني مالياتي ادارا اڌ صديءَ کان وڌيڪ عرصي کان اسان جي مالياتي شعبي ۾ اهم ڪردار ادا ڪندا اچي رهيا آهن، پاڪستان ۽ بحرين جو رشتو تاريخ سان ڳنڍيل آهي. هن چيو ته نار تعاون ڪائونسل ۾ هڪ وڏي تبديلي ٿي رهي آهي، هي خطو جدت، پائيداري ۽ فني برتري جو مرڪز بڻجڻ وڃي رهيو آهي، بحرين کي ان تبديلي ۾ قائداڻو ڪردار ادا ڪرڻ تي فخر آهي، بحرين هڪ اهڙو ماحول جوڙي رهيو آهي، جتي تخليقي صلاحيت، ڪاروباري جذبو ۽ جرئتمنداڻا خيال خوشحال مستقبل جو بنياد بڻيا آهن. مالياتي خدمتن جي لاءِ بحرين جو جديد نظام بهترين افرادي قوت ۽ اڀرجندڙ فن ٽيڪ موجود آهي، بحرين جو جديد نظام پاڪستاني بئنڪن ۽ جدت ڪارن جي لاءِ علائقائي ۽ عالمي سطح تي بهترين پليٽ فارم مهيا ڪري ٿو. هن چيو ته بحرين ويزن 2020ع کي اڳتي وڌائيندي ويزن 2050ع جو بنياد رکي رهيو آهي، اسان پاڪستان کي هڪ گڏيل معاشي مستقبل رکندڙ ڀائيوار طور تي ڏسي رهيا آهيون.