روانگي واپار تي ٻڌل پائيدار اوسر لاءِ کنيل قدمن جا نتيجا سامهون اچي رهيا آهن: خرم شهزاد

اسلام آباد-25 نومبر (اي پي پي) ناڻي واري وزير جي صلاحڪار خرم شهزاد چيو آهي ته روانگي واپار تي ٻڌل اوسر لاءِ کنيل قدمن جا نتيجا سامهون اچي رهيا آهن، مستحڪم مسابقت، وڌيڪ سيڙپڪاري ۽ روانگي واپار تي ٻڌل پائيدار معاشي اوسر حاصل ڪرڻ لاءِ حڪومت جو رخ واضح آهي. گذريل ڏينهن ”ايڪس“ تي پنهنجي پيغام ۾ هن چيو ته نجي شعبي جي قيادت ۾ روانگي واپار تي ٻڌل اوسر لاءِ وزيراعظم جي نجي شعبي جي قيادت ۾ ورڪنگ گروپس بنائڻ جي فيصلي تي سوال اٿاريا ويا، روانگي واپار تي ٻڌل پائيدار اوسر لاءِ کنيل قدمن جا نتيجا هاڻي سامهون اچي رهيا آهن ۽ ان سان ان ڳالهه جي به تصديق ٿي رهي آهي ته پاليسي سازي ۾ منظم ۽ معتبر نجي شعبي جي شموليت ڪيتري اهم آهي، انهن قدمن سان مشاورت کي عملي قدمن ۾ مٽايو پيو وڃي ۽ سڌارن جي ايجنڊا کي اثرائتي انداز ۾ روانگي واپار تي ٻڌل اوسر سان ڳنڍيو پيو وڃي. هن چيو ته ايڪسپورٽ ڊولپمنٽ فنڊ جو نئين سر جائزو وٺڻ ۽ سڌارن جون تجويزون پيش ڪرڻ لاءِ وزيراعظم نجي شعبي سان مشهور ميمبرن تي ٻڌل ورڪنگ گروپ اهم اڳڀرائي ڪئي آهي، روانگي واپار تي لاڳو 0.25 ايڪسپورٽ ڊولپمنٽ سرچارج فوري طور تي ختم ڪيو ويو آهي، جنهن سان روانگي واپار ڪندڙن کي سڌي ريت لاڳت ۾ رليف مليو آهي ۽ عالمي مارڪيٽ ۾ مسابقت بهتر ٿي آهي، نجي شعبي جي قيادت ۾ عبوري اسٽيئرنگ ڪميٽي ايڪسپورٽ ڊولپمنٽ فنڊ ۾ دستياب 52 ارب روپين جي استعمال جي نگراني ڪندي. هن چيو ته ايڪسپورٽ ڊولپمنٽ فنڊ جي وسيلن کي صرف ۽ صرف برآمدي مسابقت، تحقيق ۽ ترقي، مهارت، پيداواري صلاحيت ۽ مارڪيٽ بابت سهولتڪار قدمن لاءِ استعمال ۾ آندو ويندو، اهي فنڊ بنيادي ڍانچي جي منصوبن لاءِ استعمال نه ٿيندا. خرم شهزاد چيو ته انهن سڌارن مان واضح آهي ته روانگي واپار ۾ اضافو اسان جي قومي ترجيح آهي ۽ روانگي واپار تي ٽيڪس لاڳو ڪرڻ بجاءِ انهن کي سهولت ڏيڻ طرف هڪ بنيادي تبديلي سامهون آئي آهي، انهن قدمن سان هڪ نئون ماڊل سامهون آيو آهي جنهن ۾ نجي شعبو سڌارن جو رخ طئي ڪري ٿو ۽ حڪومت وسيلن کي وڌيڪ اثرائتن مسابقتي شعبن طرف موڙي رهي آهي. هن چيو ته ايڪسپورٽ ڊولپمنٽ فنڊ جو عالمي معيار مطابق ٿرڊ پارٽي آڊٽ ڪرايو ويندو، جڏهن ته فنڊ جي مضبوط گورننس لاءِ نجي شعبي مان چيئر جي مقرري ٿيندي. اهڙي طرح ٽڊاپ کي بهتر ايڪسپورٽر سپورٽ ۽ عالمي مارڪيٽنگ لاءِ نئين سر جوڙيو ويندو. هن چيو ته اهو حڪومت طرفان نجي شعبي جي سهڪار سان اٿاريل هڪ معنيٰ وارو سڌاراتي قدم آهي. ڍانچي جاتي سڌارن جو عمل جاري آهي جڏهن ته نجي شعبي جي قيادت ۾ ورڪنگ گروپس پهريان ئي ٽيڪس، توانائي ۽ بجلي جي قيمتن جي حوالي سان سفارشن کي اڳتي وڌائي رهيا آهن. هن چيو ته مستحڪم مسابقت، وڌيڪ سيڙپڪاري ۽ روانگي واپار تي ٻڌل پائيدار معاشي اوسر حاصل ڪرڻ لاءِ حڪومت جو رخ واضح آهي.