افغانستان سان وڌيڪ ڇڪتاڻ نٿا چاهيُون، مستقبل ۾ ٿيندڙ ڪنهن به جارحيت جو ڀرپور جواب ڏنو ويندو: پاڪستان

اسلام آباد – 31 آڪٽوبر (اي پي پي) پاڪستان واضح ڪيو آهي ته هو افغانستان سان وڌيڪ ڇڪتاڻ نه ٿو چاهي جڏهن ته مستقبل ۾ ٿيندڙ ڪنهن به جارحيت جو ڀرپور جواب ڏنو ويندو. پرڏيهي آفيس جي ترجمان طاهر حسين اندرابي پريس بريفنگ ۾ چيو ته پاڪستان کي اميد آهي ته افغان طالبان سان ڳالهه ٻولهه جي اڳئين دور جي شروعات 6 نومبر تي ٿيندي، پاڪستان ثالثي جي عمل ۾ مصروف رهندو ۽ 6 نومبر جي ڳالهه ٻولهه جي مثبت نتيجن جي اميد ڪري ٿو. ترجمان پاڪستان ۽ افغان طالبان سان جنگبندي جي حوالي سان قطر ۽ ترڪيه ۾ ٿيندڙ تازي ڳالهه ٻولهه جي حوالي سان چيو ته پاڪستان انتهائي مثبت انداز ۾ ڳالهه ٻولهه ۾ شرڪت ڪئي. هن چيو ته پاڪستان ۽ افغان طالبان جي وچ ۾ ڳالهه ٻولهه جو ٻيو دور گذريل شام استنبول ۾ پڄاڻي تي پهتو، پاڪستان ان ڳالهه ٻولهه ۾ واضح ڪيو ته افغانستان پنهنجي سرزمين پاڪستان جي خلاف استعمال ٿيڻ کان روڪي، افغان سرزمين کي پاڪستان جي خلاف دهشتگردي جي لاءِ استعمال ٿيڻ نه ڏنو وڃي. هن چيو ته پاڪستان 25 آڪٽوبر تي شروع ٿيندڙ استنبول ڳالهه ٻولهه ۾ سٺي جذبي ۽ مثبت نيت سان شرڪت ڪئي، استنبول ڳالهه ٻولهه شروع ۾ ٻن ڏينهن جي لاءِ هئي جڏهن ته طالبان حڪومت سان هڪ خوشگوار معاهدي تائين پهچڻ جي ڪوشش ۾ پاڪستان سنجيدگي سان چئن ڏينهن تائين ڳالهه ٻولهه جاري رکي. هن چيو ته پاڪستان واضح موقف تي ٺاهه ڪرڻ کانسواءِ چيو آهي ته افغان سرزمين پاڪستان جي خلاف دهشتگردي جي لاءِ استعمال نه ٿيڻ گهرجي. ترجمان چيو ته پاڪستان دشمني ۾ وڌيڪ اضافي جو خواهشمند نه آهي پر افغان طالبان جي حڪومت مان اميد آهي ته اها عالمي برادري سان پنهنجي وابستگي جو احترام ڪندي ۽ فتنه الخوارج ۽ فتنه الهندستان سميت دهشتگرد تنظيمن جي خلاف ٺوس ۽ تصديق جوڳيون ڪارروايون ڪري پاڪستان جي جائز سيڪيورٽي خدشن کي ختم ڪندي.  هن چيو ته گذريل چئن سالن کان پاڪستان طالبان حڪومت تي زور ڏئي رهيو آهي ته اها افغان سرزمين تي موجود دهشتگرد تنظيمن جي خلاف فيصلائتا ۽ موثر قدم کڻي، اسان طالبان حڪومت سان افغان سرزمين تي فتنه الخوارج ۽ فتنه الهندستان جي اعليٰ قيادت جي موجودگي بابت بار بار تصديق ٿيل معلومات شيئر ڪئي جڏهن ته ماضي ۾ ڪيترائي ڀيرا خاطرين جي باوجود افغانستان مان پاڪستان ۾ دهشتگرد حملن ۾ اضافو ٿيو آهي. هن چيو ته گذريل چئن سالن کان افغان طالبان جي حڪومت پاران پاڪستان جي جائز سيڪيورٽي خدشن کي مسلسل ۽ مڪمل طور تي نظرانداز ڪيو ويو ۽ 11 ۽ 12 آڪٽوبر ۽ بعد ۾ 14 ۽ 15 آڪٽوبر تي فتنه الخوارج جي حمايت سان پاڪستان جي خلاف اشتعال انگيز جارحيت عالمي سرحد جي پار پرتشدد مٽاسٽا جو سبب بڻجي، پاڪستان افغان اشتعال انگيزين جو فيصلائتو جواب ڏنو. هن چيو ته مستقبل ۾ اشتعال انگيزي جاري رهي ته پاڪستان ڀرپور جواب ڏيندو. ترجمان چيو ته پاڪستان سدائين کان هڪ پرامن، مستحڪم، علائقائي طور تي ٺوس ۽ خوشحال افغانستان جو خواهشمند رهيو آهي جيڪو پنهنجي ۽ پنهنجي پاڙيسرين سان پرامن هجي، آگسٽ 2021ع ۾ ڪابل تي طالبان جي قبضي سان اسان اميد ڪئي ته علائقائي امن ۽ رابطي جي ويزن جي تڪميل ٿي ويندي. ترجمان چيو ته انهي جذبي تحت اسان جي مختلف سيڪيورٽي خدشن جي باوجود پاڪستان هن سال افغانستان جي حمايت ۽ مدد جي لاءِ ڪيترائي قدم کنيا ۽ افغانستان کي خاص طور تي افغان ٽرانزٽ ٽريڊ جي لاءِ ڪيتريون ئي رعايتون ڏنيون. هن چيو ته اسان افغانستان پنهنجي سفارتي نمائندگي کي ناظم الامور کان سفير جي سطح تائين وڌائي ڇڏيو ۽ سي پيڪ کي افغانستان تائين توسيع ڏيڻ تي پڻ اتفاق ڪيو. هن چيو ته نائب وزيراعظم ۽ پرڏيهي وزير 17 جولاءِ تي ازبڪستان – افغانستان – پاڪستان ريلوي منصوبي جي گڏيل فزيبلٽي اسٽڊي جي معاهدي تي صحيحون ڪرڻ سميت  ٽي ڀيرا ڪابل جو دورو ڪيو. ترجمان چيو ته پاڪستان حڪومت ۽ هٿياربند فوج پاڪستان جي خودمختياري جي تحفظ ۽ ان جي عوام جي تحفظ کي يقيني بڻائڻ جي لاءِ هر ممڪن قدم کڻڻ جي لاءِ تيار آهن، پاڪستان ثالثي جي عمل ۾ مصروف رهندو ۽ 6 نومبر جي ڳالهه ٻولهه جي مثبت نتيجن جي اميد رکي ٿو. هن چيو ته پاڪستان ڀائر ملڪن قطر ۽ ترڪيه جي تعميري ڪردار کي ساراهي ٿو ۽ اهي ان مسئلي جي پرامن حل جي لاءِ پنهنجون ڪوششون ڪري رهيا آهن.