ڄام ڪمال خان ايٿوپيا جي گاديءَ واري هنڌ پهچي ويو، پاڪستان آفريقا ٽريڊ ڊولپمينٽ ڪانفرنس ۽ سنگل ڪنٽري ايگزيبيشن ۾ شرڪت ڪندو

عديس ابابا-15 آڪٽوبر (اي پي پي) واپار وارو وفاقي وزير ڄام ڪمال خان ايٿوپيا جي گاديءَ واري هنڌ عديس ابابا پهچي ويو. پريس رليز موجب وفاقي وزير 16 کان 18 آڪٽوبر تائين عديس ابابا ۾ منعقد ٿيندڙ پنجين پاڪستان- آفريقا ٽريڊ ڊولپمينٽ ڪانفرنس ۽ سنگل ڪنٽري ايگزيبيشن ۾ شرڪت لاءِ هڪ اعليٰ سطحي واپاري وفد جي قيادت ڪري رهيو آهي. وفاقي وزير جو ايئرپورٽ پهچڻ تي شاندار استقبال ڪيو ويو. برهانوتسيگي، ايٿوپيا جي پرڏيهي معاملن بابت مملڪتي وزير عبدالحڪيم ملو، واپار ۽ علائقائي انضمام جي مملڪتي وزير ديوانو ڪيدير، پرڏيهي وزارت ۾ ايڊيشنل سيڪريٽري سفير جمال بيڪر ۽ عديس ابابا ۾ پاڪستاني سفارتخاني جي آفيسرن خاص ڪري ٽريڊ اينڊ انويسٽمينٽ آفيسر، ڄام ڪمال جو ايئرپورٽ تي استقبال ڪيو. واپار واري وزارت ۽ ٽريڊ ڊولپمينٽ اٿارٽي آف پاڪستان جي انتظام هيٺ پنجين پاڪستان- آفريقا ٽريڊ ڊولپمينٽ ڪانفرنس ۽ سنگل ڪنٽري ايگزيبيشن آفريقي ملڪن سان اقتصادي ۽ واپاري رابطن کي گهرو ڪرڻ لاءِ پاڪستان حڪومت جي هڪ اهم قدم جي نمائندگي ڪري ٿي. ايٿوپيا ۾ هن سال جو ايڊيشن پاڪستان جي ”لُڪ آفريقا پاليسي“ کي اڳتي وڌائڻ لاءِ هڪ اهم سنگ ميل آهي جنهن جو مقصد روانگي واپار کي مارڪيٽن ۾ جدت وارو بڻائڻ ۽ آفريقا سان اقتصادي ڀائيواريءَ کي مضبوط بڻائڻ آهي. ان نمائش ۾ ٽيڪسٽائل، فارماسيوٽيڪل، اجنيئرنگ، آءِ ٽي، زراعت ۽ فوڊ پروسيسنگ جي شعبن سان تعلق رکندڙ 110 کان وڌيڪ ناليواريون پاڪستاني ڪمپنيون شرڪت ڪري رهيون آهن، جيڪي پاڪستان جي وڌندڙ صنعتي صلاحيت ۽ روانگي واپار واري صلاحيت کي ظاهر ڪن ٿيون. دؤري دوران وفاقي وزير ايٿوپيا جي هم منصب، اعليٰ سرڪاري عملدارن ۽ ڪاروباري اڳواڻن سان ٻه طرفيون ملاقاتون پڻ ڪندو ته جيئن واپار ۾ سهڪار ۽ سيڙپڪاريءَ کي اڳتي وڌائڻ جا موقعا تلاش ڪري سگهجن. اها تقريب آفريقي کنڊ ۾ گڏيل طور فائديمند ڀائيواري قائم ڪرڻ ۽ واپاري سفارتڪاري ذريعي جامع اقتصادي ترقيءَ کي هٿي وٺرائڻ لاءِ پاڪستان جي مضبوط عزم جي نشاندهي ڪري ٿي.