سينيٽ چيئرمين سيد يوسف رضا گيلاني جي برطانيه جي پارلياماني وفد سان ملاقات

بارباڊوس-09 آڪٽوبر (اي پي پي)سينيٽ چيئرمين سيد يوسف رضا گيلاني بريج ٽائون، بار باڊوس ۾ جاري 68 هين ڪامن ويلٿ پارلياماني ڪانفرنس (سي پي سي) جي موقعي تي برطانيه جي پارلياماني وفد سان ملاقات ڪئي. سينيٽ سيڪريٽريٽ مان جاري بيان موجب برطانوي وفد جي قيادت پارليامينٽ جي ميمبر ڪيٽ اوسامور ڪئي، جيڪا ڪامن ويلٿ پارليامينٽري ايسوسيئيشن (سي پي اي) جي چيئر ۽ ليبر پارٽي سان تعلق رکي ٿي. وفد ۾ لارڊ سيد صلاح ڪمال (صحت بابت وزير، ڪنزرويٽو پارٽي)، پارليامينٽ جي ميمبر ڊيوڊ منڊيل (ڪنزرويٽو پارٽي، ايگزيڪيٽو ميمبر سي پي اي) ۽ بيرونس لنڊ کان نارٿوور (لبرل ڊيموڪريٽس) به شامل هيون. پاڪستان طرفان سينيٽر روبينه خالد، سينيٽر محسن عزيز ۽ سنڌ اسيمبلي جي اسپيڪر اويس قادر شاهه اجلاس ۾ شرڪت ڪئي. ملاقات دوران سينيٽ چيئرمين سيد يوسف رضا گيلاني پاڪستان ۽ برطانيه وچ ۾ پراڻن ۽ گهڻ رخي لاڳاپن کي اجاگر ڪندي چيو ته ڪامن ويلٿ پارليامينٽري ايسوسيئيشن جي فريم ورڪ تحت بين الپارلياماني تعاون کي وڌيڪ مضبوط بڻائڻ جي ضرورت آهي. هن گڏيل قومن جي قراردادن موجب ڄمون ۽ ڪشمير جي عوام جي خودمختياري واري حق جي اصولي موقف کي واضح ڪيو، فلسطين جي موجوده صورتحال تي ڳالهه ڪئي ۽ امن ۽ سلامتي جي عالمي معاملن، خاص ڪري افغانستان جي حوالي سان عالمي برادري جي موثر ۽ مسلسل ڪردار جي ضرورت تي زور ڀريو. ان سان گڏوگڏ سينيٽ چيئرمين ماحولياتي تبديلي جي چئلينجز کي منهن ڏيڻ لاءِ گڏيل عالمي قدمن جي اهميت تي به زور ڀريو. سينيٽ چيئرمين برطانوي پارليامينٽ کي 11 ۽ 12 نومبر 2025ع تي اسلام آباد ۾ منعقد ٿيل بين الپارلياماني اسپيڪرز ڪانفرنس ۾ شرڪت جي باضابطه دعوت پڻ ڏني. جنهن ۾ سڄي دنيا جا پارلياماني اڳواڻ گڏيل جمهوري قدرن ۽ جديد طرز حڪمراني جي چئلينجن تي خيالن جي ڏي وٺ ڪندا. برطانوي وفد ڪامن ويلٿ پارليامينٽري ايسوسيئيشن اندر پاڪستان جي تعميري ڪردار کي ساراهيو ۽ علائقائي امن، استحڪام ۽ تعاون کي هٿي ڏيڻ لاءِ پاڪستان جي ڪوششن کي واکاڻ جوڳو قرار ڏنو. ٻنهي ڌرين پارلياماني ڳالهين کي اڳتي وڌائڻ ۽ ڪامن ويلٿ جي جمهوريت، برابري ۽ شموليت جي اصولن کي گڏيل طور تي هٿي ڏيڻ جي عزم جو ورجاءُ ڪيو.