سنڌ پي ايف يو جي ، جي  قيام کان وٺي اڄ تائين صحافتي تنظيمن، صحافين جي حقن جي تحفظ ۽ سياسي جدوجهد جي هر دور ۾ اهم ڪردار ادا ڪيو آهي: سيد مراد علي شاهه

ڪراچي-02 آگسٽ (اي پي پي) سنڌ جي وڏي وزير سيد مراد علي شاهه پاڪستان فيڊرل يونين آف جرنلسٽس جي پلاٽينم جوبلي تقريب کي خطاب ڪندي اداري جي 75 سالن جي لڳاتار جدوجهد ۽ صحافت جي آزادي سان وابستگي کي ڀيٽا پيش ڪئي. وڏي وزير پنهنجي خطاب ۾ پاڪستان اندر صحافتي تنظيمُن جي تاريخي اهميت کي اجاگر ڪندي چيو ته سنڌ پي ايف يو جي، جي 1948ع ۾ قيام کان وٺي اڄ تائين صحافتي تنظيمن صحافين جي حقن جي تحفظ ۽ سياسي جدوجهد جي هر دور ۾ اهم ڪردار ادا ڪيو آهي. سيد مراد علي شاهه، شهيد وزيراعظم ذوالفقار علي ڀُٽو کي ڀيٽا پيش ڪندي چيو ته ڀُٽو صاحب آمريت خلاف بيباڪ موقف اختيار ڪيو ۽ انهن صحافين کي پڻ سلام پيش ڪريان ٿو جن جبر جي دور ۾ قربانيون ڏنيون. وڏي وزير موجوده دور جي صحافين کي درپيش چئلينجن، خاص طور مالي مسئلن ۽ دير سان ملندڙ پگهارن جو ذڪر ڪندي چيو اڄ جو صحافي سخت معاشي ۽ پيشور بحران جو شڪار آهي. ڪيترائي ميڊيا ادارا مالي بحران جو شڪار آهن ۽ ڪيترائي صحافي مهينن تائين بغير پگهار جي ڪم ڪري رهيا آهن. جڏهن هڪ صحافي پنهنجي ٻارن جي روزي لاءِ پريشان هجي ته هو ناانصافي خلاف ڪيئن آواز اٿاري سگهي ٿو؟ وڏي وزير شهيد محترمه بينظير ڀُٽو کي پڻ ڀيٽا پيش ڪندي چيو ته هوءَ صحافت جي آزاديءَ جي سڀ کان وڏي علمبردار هئي. شهيد بينظير ڀٽو صحافين جي رهائشي مسئلن کي سنجيدگيءَ سان ورتو ۽ ان جي حل لاءِ عملي قدم کنيا. هوءَ اها قومي اڳواڻ هئي جيڪا صحافين جي حقن لاءِ رستن تي به نڪتي. سندن ورثو ان ڳالهه جو ثبوت آهي ته هڪ آزاد صحافت جمهوريت جي بنياد آهي.مراد علي شاهه  چيئرمين بلاول ڀٽو زرداري جي ميڊيا ۽ صحافين لاءِ جاري قدمن جو ذڪر ڪندي چيو ته چيئرمين بلاول ڀٽو زرداري جي قيادت ۾ اسين صحافين جي ڀلائي ۽ ميڊيا ادارن جي مالي خودمختياريءَ لاءِ پرعزم آهيون. هڪ مضبوط، آزاد ۽ خودمختيار صحافت ئي خودمختيار پاڪستان جي ضمانت آهي. وڏي وزير خاطري ڪرائي ته سنڌ حڪومت پي ايف يو جي سميت ٻين صحافتي ادارن سان گڏجي پائيدار قدم کڻندي جيڪي صحافين جي ڀلائي ۽ ميڊيا جي آزادي کي يقيني بڻائيندا. هن مختلف دورن ۾ سينسرشپ خلاف صحافين جي جدوجهد جو به ذڪر ڪيو خاص طور تي جنرل ضياءُ الحق جي مارشل لا ۽ 1998ع ۾ جنگ گروپ خلاف رياستي ڪاررواين کي ياد ڪيو. وڏي وزير چيو ته پاڪستان پيپلز پارٽي هميشه اظهارِ راءِ جي آزادي لاءِ صحافين سان گڏ رهي آهي.خطاب جي آخر ۾ وڏي وزير پي ايف يو جي جي 75 سالن جي شاندار جدوجهد کي ڀيٽا پيش ڪندي چيو اسان کي پنهنجي ذميواريءَ جو ورجاءُ ڪرڻ گهرجي ته سچ جي تلاش صحافت جو مرڪزي اصول بڻجي. جڏهن اسين پي ايف يو جي جي جدوجهد کي ڀيٽا پيش ڪريون ٿا تڏهن اهو عزم پڻ ورجايون ٿا ته شفاف، ذميوار ۽ بي خوف صحافت کي هٿي ڏيون. وڏي وزير پي ايف يو جي، جي قيادت، ڪارڪنن ۽ انهن سمورن نڊر صحافين کي واڌايون ڏنيون جن سچ جو علم هميشه بلند رکيو.