بيجنگ -16 جولاءِ (اي پي پي) گڏيل عرب امارات چين جي ڪمپني کان هڪ ارب ڊالرن جي ماليت جون اڏامندڙ گاڏيون خريد ڪندو. پرڏيهي ميڊيا مطابق چيني اليڪٽرڪ ورٽيڪل ٽيڪ آف اينڊ لينڊنگ ٺاهڻ واري ڪمپني شنگهائي ٽي سي بي ٽيڪنالاجي ڪمپني لميٽيڊ کي هن وقت تائين ملندڙ سڀ کان وڏو آرڊر آهي. اهو آرڊر گڏيل عرب امارات جي ڪمپني آٽوڪرافٽ طرفان ڏنو ويو آهي، ان سلسلي ۾ ٻنهي ڪمپنين وچ ۾ مفاهمت جي هڪ يادداشت تي صحيحيون ٿيون جنهن تحت ساڍا ٽي سئو اي20-اي وي ٽي او ايل نالي ايئر ڪرافٽ خريد ڪيا ويندا. اهو معاهدو گذريل سال چائنا انٽرنيشنل امپورٽ ايڪسپو ۾ قائم ٿيل شراڪتداري جي نتيجي ۾ طئي ٿيو آهي. چيني ڪمپني ٽي ڪيب ٽيڪ جي تيار ڪيل اي-20 ايئرڪرافٽ کي ڪمرشل ايپليڪيشنز، جيئن گهٽ اوچائي تي سياحت ۽ شهري فضائي چرپر سبب وچ اوڀر ۽ اتر افريقا جي مارڪيٽ کي نظر ۾ رکندي ٺاهيو ويو آهي. پنجن سيٽن واري اي-20 جي رينج 200 ڪلوميٽر آهي ۽ ان جي وڌ کان وڌ رفتار 320 ڪلوميٽر في ڪلاڪ آهي.
