ڪراچي-15 جولاءِ (اي پي پي) سنڌ اسميبليءَ جي پبلڪ اڪائونٽس ڪميٽيءَ سنڌ حڪومت پاران ڪميونٽي ڊولپمينٽ پروگرام جي تحت هينڊز ۽ سرسو سميت ٻين اين جي اوز کي جاري ڪيل 8 ڪروڙ روپين کان وڌيڪ جي فنڊن مان خرچن ۽ انوائيسز سميت ٻيو لاڳاپيل آڊٽ رڪارڊ فراهم نه ڪرڻ تي هينڊز ۽ سرسو سميت 8 اين جي اوز کي بليڪ لسٽ ڪري انهن جي رجسٽريشن ۽ لائسنس رد ڪرڻ جو حڪم جاري ڪري ڇڏيو آهي. ان ڏس ۾ اين جي اوز جي رجسٽريشن ۽ لائسنس رد ڪرڻ لاءِ سوشل ويلفيئر کاتي کي پڻ هدايتون جاري ڪرڻ جو حڪم جاري ڪري ڇڏيو آهي. پي اي سيءَ جو اجلاس چيئرمين نثار کهڙو جي صدارت ۾ ڪميٽي روم ۾ ٿيو. اجلاس ۾ ڪميٽي جي ميمبرن خرم ڪريم سومرو، مخدوم فخرالزمان، طحه احمد سميت پلاننگ اينڊ ڊولپمينٽ کاتي جي سيڪريٽري سجاد عباسي ۽ ٻين لاڳاپيل آفيسرن شرڪت ڪئي. اجلاس ۾ پلاننگ اينڊ ڊولپمينٽ کاتي جي سال 2019ع ۽ 2020ع جي آڊٽ پيرائن جو جائزو ورتو ويو. اجلاس ۾ ڪميونٽي ڊولپمينٽ پروگرام تحت سنڌ جي 8 اين جي اوز کي هيلٿ ۽ اسڪل ڊولپمينٽ جي منصوبن لاءِ 8 ڪروڙ روپين کان وڌيڪ جي فنڊنگ ٿيڻ ۽ ان فنڊنگ مان اين جي اوز پاران مختلف منصوبن تي خرچن ۽ انوائيسز سميت ٻيو لاڳاپيل رڪارڊ فراهم نه ڪرڻ جو انڪشاف سامهون آيو، جنهن تي چيئرمين پي اي سي نثار کهڙو پڇاڻو ڪيو ته سنڌ حڪومت پاران ڪهڙن اين جي اوز کي ڪميونٽي ڊولپمينٽ پروگرام تحت ڪهڙن منصوبن لاءِ ڪيتري فنڊنگ جاري ٿي آهي؟ ان موقعي تي پلاننگ اينڊ ڊولپمينٽ کاتي جي پيپلز پاورٽي ريڊڪشن پروگرام جي پراجيڪٽ ڊائريڪٽر پي اي سيءَ کي ٻڌايو ته سنڌ جي 16 اين جي اوز کي 2018ع ۾ هيلٿ، اسڪل ڊولپمينٽ، اسڪل ايجوڪيشن جي منصوبن لاءِ فنڊ جاري ڪيا ويا هئا جن مان 8 اين جي اوز 8 ڪروڙ روپين کان وڌيڪ جي فنڊن جي خرچن سميت ٻيو آڊٽ جو رڪارڊ فراهم نه ڪيو آهي ۽ جن اين جي اوز 8 ڪروڙ روپين جي فنڊنگ جو رڪارڊ فراهم نه ڪيو آهي انهن ۾ هينڊز، سرسو، آءِ بي اي ڪراچي، هيلٿ ايجوڪيشن لٽريسري پروگرام (هيلپ)، اينگرو فائونڊيشن، وومين اينڊ چلڊرين ميڊيڪل ڪيئر ٽرسٽ، ڊسٽرڪٽ ڊولپمينٽ ايسوسئيشن ٿرپارڪر سميت ٻيون اين جي اوز شامل آهن. پلاننگ کاتي مطابق هينڊز کي هيلٿ جي منصوبي لاءِ هڪ ڪروڙ 85 لک، سرسو کي اسڪل ٽريننگ لاءِ 2 ڪروڙ 54 لک، هيلپ کي صحت جي منصوبي لاءِ 2 ڪروڙ 27 لک، اينگرو فائونڊيشن کي ايجوڪيشن لاءِ 9 لک 35 هزار، وومين اينڊ چلڊرين ميڊيڪل ٽرسٽ کي صحت جي منصوبي لاءِ هڪ ڪروڙ 2 لک، آءِ بي اي ڪراچيءَ کي اسڪل ايجوڪيشن لاءِ 11 لک 80 هزار ۽ ڊسٽرڪٽ ڊولپمينٽ ايسوسئيشن ٿرپارڪر کي اسڪل ڊولپمينٽ لاءِ 2 ڪروڙ 27 لک روپين جا فنڊ فراهم ڪيا ويا آهن ۽ اِهي 8 اين جي اوز فراهم ڪيل فنڊن مان خرچن، وائوچرن ۽ انوائسز جي تفصيلن سميت ايس آر بي رجسٽريشن سرٽيفڪيٽن جو رڪارڊ گهرڻ ۽ نوٽيسز جاري ڪرڻ باوجود اِهي اين جي اوز آڊٽ جو رڪارڊ فراهم نه ڪري رهيون آهن جنهن تي پي اي سي چيئرمين چيو ته جن اين جي اوز آڊٽ جو رڪارڊ فراهم نه ڪيو آهي انهن اين جي اوز جي رجسٽريشن ۽ لائسنس رد ڪيا وڃن. ان موقعي تي پي اي سيءَ ڪميونٽي ڊولپمينٽ پروگرام تحت 8 ڪروڙ روپين کان وڌيڪ جي فنڊنگ مان خرچن ۽ انوائسز سميت ٻيو آڊٽ رڪارڊ فراهم نه ڪندڙ سرسو، هينڊز، هيلپ سميت 8 اين جي اوز کي بليڪ لسٽ ڪرڻ ۽ انهن جي رجسٽريشن سميت لائسنس رد ڪرڻ جو حڪم ڏئي ڇڏيو آهي. اجلاس ۾ سنڌ جي ٽن ضلعن ڪشمور ايٽ ڪنڌڪوٽ، جيڪب آباد ۽ شڪارپور جي 100 يوسيز ۾ يونين ڪائونسل بيسڊ پاورٽي رڊڪشن پروگرام تحت سرسو کي هڪ ارب روپين جي جاري فنڊنگ مان سرسو پاران بيواهه عورتن کي سلائي ۽ ڪڙهائيءَ لاءِ 10، 10 هزار روپين جو انٽريسٽ فري لون ڏيڻ بجاءِ غريب عورتن کان 10 هزار روپين جي لون تي 8 کان 10 سيڪڙو مارڪ اپ انٽريسٽ وٺڻ جو پڻ انڪشاف سامهون آيو. اجلاس ۾ سرسو جي سي اِي او لکت ۾ پي اي سي کي جمع ڪرايل پنهنجي خط ۾ انهن عورتن کان مارڪ اپ انٽريسٽ وٺڻ جو به اعتراف سامهون آيو. سي اِي او سرسو پي اي سي کي ٻڌايو ته غريب عورتن کي سلائي ۽ ڪڙهائي جي مد ۾ 10 هزار روپين جو انٽريسٽ فري لون ڏنو ويو هو جن کان ڪو به مارڪ اپ انٽريسٽ وصول نه ڪيو ويو آهي پر منٽس ۾ مارڪ اپ وٺڻ جي ڳالهه غلطيءَ سان لکجي وئي آهي جڏهن ته سرسو وليج آرگنائيزيشن کي لون ڏيڻ لاءِ اھا رقم فراهم ڪئي هئي جنهن تي پي اي سي سنڌ جي ٽن ضلعن جي 100 يوسيز لاءِ هڪ ارب روپين جي سرسو کي جاري فنڊنگ مان سرسو پاران غريب عورتن کي 10، 10 هزار روپين جي لون جي مد ۾ مارڪ اپ انٽريسٽ وٺڻ يا نه وٺڻ واري معاملي جي پلاننگ اينڊ ڊولپمينٽ کاتي کي فيڪٽ فائينڊنگ جاچ ڪرڻ جو حڪم ڏئي ڇڏيو. اجلاس ۾ 2018ع کان 2024ع تائين سنڌ جي 6 ضلعن خيرپور ميرس، سانگهڙ، ميرپورخاص، بدين ۽ ٺٽي ۾ غربت کي گهٽائڻ لاءِ پيپلز پاورٽي رڊڪيشن پروگرام تحت سرسو کي جاري 9.67 ارب روپين جي فنڊنگ مان سرسو پاران 2025ع ۾ اِهو منصوبو ختم ٿيڻ باوجود 38 ڪروڙ روپين جي انٽريسٽ جي رقم سنڌ حڪومت کي واپس نه ڪرڻ جو پڻ انڪشاف سامهون آيو. اجلاس ۾ سرسو جي سي اِي او، پي اي سيءَ کي ٻڌايو ته انٽريسٽ جي رقم سرسو وٽ موجود آهي پر جون 2025ع ۾ اهڙو منصوبو ختم ٿي ويو آهي ان لاءِ پلاننگ کاتي طرفان ليٽر موڪليو ويندو ته پوءِ سرسو انٽريسٽ واري رقم سنڌ حڪومت کي واپس ڏيندي. ان موقعي تي پي اي سيءَ سرسو کي جاري ٿيل 9.67 ارب روپين جي فنڊنگ مان ٿيندڙ خرچن ۽ سرسو پاران 38 ڪروڙ روپين جي انٽريسٽ واري رقم پاڻ وٽ رکڻ بابت پڻ فيڪٽ فائينڊنگ جاچ جو حڪم ڏئي ڇڏيو. اجلاس ۾ آڊٽ جو رڪارڊ فراهم ڪرڻ ۽ رڪارڊ جي فراهمي تي دير ڪرڻ تي معذرت ڪرڻ تي پي اي سيءَ پلاننگ اينڊ ڊولپمينٽ کاتي جي معطل ڪيل پيپلز پاروٽي رڊڪشن پروگرام جي پي ڊي پرويز احمد کي بحال ڪرڻ جو جاري ڪري ڇڏيو آهي.
