اسلام آباد – 13 – فيبروري (اي پي پي) پاڪستان ۽ ترڪيه ٻنهي ڀائر ملڪن جي گڏيل فائدي جي لاءِ واپار، معيشت، توانائي، دفاع، سياحت ۽ عوام سان عوام جي رابطن جي شعبن ۾ ٻطرفي تعاون کي وڌيڪ بهتر بڻائڻ جي عزم جو ورجاءُ ڪيو آهي. ايوان صدر جي پريس ونگ موجب صدر آصف علي زرداري ۽ ترڪ صدر رجب طيب اردوان ايوان صدر ۾ ملاقات ڪئي. ايوان صدر اچڻ تي صدر آصف علي زرداري ترڪ صدر جو استقبال ڪيو. ملاقات دوران پاڪستان ۽ ترڪيه گڏيل مفاد ۾ واپار، معيشت، توانائي، دفاع، سياحت ۽ عوامي رابطن جي شعبن ۾ ٻطرفو تعاون وڌيڪ بهتر بڻائڻ جي عزم جو ورجاءُ ڪيو. اقتصادي تعاون ۾ اضافي جي وسيع امڪانن تي زور ڏيندي ٻنهي ڌرين واپاري ۽ سيڙپڪاري جي لاڳاپن کي وڌائڻ جي ضرورت تي زور ڏنو.
پاڪستان جي دوري تي آيل ترڪ صدر رجب طيب اردوان ۽ صدر آصف علي زرداري جي وچ ۾ ٿيندڙ ملاقات ۾ گڏيل دلچسپي جي معاملن تي خيالن جي ڏي وٺ ڪئي وئي. صدر اردوان ۽ سندس وفد جي آجيان ڪندي صدر آصف علي زرداري چيو ته پاڪستان ۽ ترڪيه جي وچ ۾ تاريخي ڀائراڻا لاڳاپا آهن ۽ مختلف عالمي فورمز تي هڪ ٻئي جي حمايت ڪن ٿا. صدر ان ڳالهه تي زور ڏنو ته صدر اردوان جو پاڪستان جو دورو پاڪستان جي عوام جي لاءِ خاص اهميت رکي ٿو ۽ ان سان ٻطرفي لاڳاپن کي وڌيڪ مستحڪم ڪرڻ ۾ مدد ملندي. صدر چيو ته پاڪستان سيڙپڪاري جي لاءِ سازگار ماحول جي آڇ ڪئي ۽ پاڪستان ۾ ترڪيه جي ڪاروباري ادارن بشمول اسٽاڪ مارڪيٽ ۽ معيشت جي ٻين اهم شعبن ۾ سيڙپڪاري ۾ اضافو ڏسڻ جي پاڪستان جي خواهش جو ورجاءُ ڪيو. هن ٻنهي ملڪن جي بئنڪاري جي شعبن ۾ تعاون وڌائڻ تي زور ڏنو ته جيئن ڪاروبار کي آسان بڻائي سگهجي ۽ ٻطرفي واپاري ڪاٿي کي ان جي پوري صلاحيت موجب وڌائي سگهجي.
هن سياحت جي حوصلا افزائي ۽ عوام جي وچ ۾ لاڳاپن کي مضبوط بڻائڻ جي لاءِ پاڪستان ۽ ترڪيه جي وچ ۾ رابطو ۽ فضائي رابطو وڌائڻ جي ضرورت تي زور ڏنو. ملاقات ۾ علائقائي ۽ عالمي مسئلن خاص طور تي غزه ۽ شام جي صورتحال تي پڻ خيالن جي ڏي وٺ ڪئي وئي ۽ خطي ۽ عالمي سطح تي امن ۽ استحڪام جي فروغ جي لاءِ گڏجي ڪم ڪرڻ تي اتفاق ڪيو ويو. هن ترڪ صدر رجب طيب اردوان جا ڪشميرين جي خودمختياري جي حق جي اصولي حمايت تي ٿورا مڃيا. صدر اردوان ٻطرفي اقتصادي لاڳاپن کي مضبوط بڻائڻ جي لاءِ ترڪيه جي عزم جو ورجاءُ ڪيو ۽ چيو ته هو ترڪيه جي ڪمپنين جي پاڪستان ۾ سيڙپڪاري جي لاءِ حوصلا افزائي جاري رکنداسين ۽ ٻطرفي واپار کي 5 ارب ڊالر تائين وڌائڻ چاهيون ٿا. ترڪ صدر دوستي کي ايندڙ نسلن تائين پهچائڻ جي لاءِ عوام جي وچ ۾ لاڳاپن کي وڌائڻ تي زور ڏنو. هن پاڪستان جي ترقي ۽ استحڪام کي ساراهيو. هن قبرص جي معاملي تي ترڪيه جي پاڪستان جي مسلسل حمايت تي صدر جا ٿورا پڻ ادا ڪيا. هن چيو ته ڄمون ۽ ڪشمير جو تڪرار ڳالهه ٻولهه جي ذريعي ۽ گڏيل قومن جي سلامتي ڪائونسل جي قراردادن موجب حل ٿيڻ گهرجي. ملاقات کانپوءِ صدر آصف علي زرداري صدر اردوان، ترڪ خاتون اول ۽ وفد جي اعزاز ۾ آجياڻي جو اهتمام ڪيو.
