لاهور -08 فيبروري (اي پي پي) سڌ سماءَ، قومي ورثي ۽ ثقافت واري وفاقي وزير عطاالله تارڙ چيو آهي، ته ملڪ جي ڊفالٽ ٿيڻ لاءِ دعائون گهرندڙ اڄ شرمنده آهن، عوام تحريڪ ڏڦيڙ جي ڪوڙ واري سياست کي رد ڪري ڇڏيو آهي، اهي ماڻهوروئندا رهندا ۽ اسان ترقي۽ عوامي خدمت جو سفر جاري رکنداسين، وزيراعظم محمد شهباز شريف جي اڳواڻي ۾ ملڪي معيشت بهتري طرف گامزن ٿي چڪي آهي، اڄ پوري ملڪ ۾ تعمير ۽ ترقي جو ڏهاڙو ملهايو پيو وڃي، پاڪستان کي ترقي کان ڪو به روڪي نٿو سگهي. اهڙو اظهار هن تڪ اين اي 127 ۾ تعمير ۽ ترقي واري ڏهاڙي جي حوالي سان عوامي جلسي کي خطاب ڪندي ڪيو. ان موقعي تي مسلم ليگ (ن) جا اڳواڻ ساجده فاروق تارڙ، ايم پي ايز، مسلم ليگ (ن) جا اڳواڻ، ڪارڪن ۽ وڏي انگ ۾ تڪ جو عوام موجود هو.وفاقي وزير چيو ته مسلم ليگ (ن) عوامي خدمت تي يقين رکي ٿي، عوام جي زندگي جي معيار جي بهتري لاءِ سمورا وسيلا ڪتب آندا پيا وڃن. هن چيو ته جڏهن اسان اقتدار سنڀاليو ته عوام سان واعدو ڪيو ته هن ملڪ کي معاشي قوت بڻائينداسين ۽ ملڪ ۾ خوشحالي آڻينداسين، اڄ حڪومت جو هڪ سال مڪمل ٿيڻ تي الله تعاليٰ جي فضل و ڪرم سان سڄي ملڪ ۾ تعمير ۽ ترقي جو جشن ملهايو پيو وڃي. هن چيو ته ڏڦيڙ پارٽي جي نالائقي سبب هڪ ملڪ ڊفالٽ جي ويجهو هو، اسان پنهنجي سياست جي پرواهه ڪرڻ کانسواءِ هن ملڪ جي تقدير بدلائڻ جو ارادو ڪيو ۽ پوءِ وزيراعظم محمد شهباز شريف جي مدبراڻي قيادت ۾ ملڪ کي ڏيوالو ٿيڻ جي دروازي تان تعمير ۽ ترقي طرف آندو. اڄ جو ڏينهن ان محنت ۽ انهن ڪوششن کي خراج تحسين پيش ڪرڻ جو ڏينهن آهي. هن چيو ته عالمي مالياتي ادارا ملڪي معيشت جي بهتري جو اعتراف ڪري رهيا آهن. هڪ سال ۾ آمدني واپار جي ڀيٽ ۾ روانگي واپار ۾ واڌ ٿي. واپاري خساري ۾ گهٽتائي آئي، مهانگائي جي شرح سنگل ڊجٽ تائين گهٽي، مهانگائي ساڍن ڇهن سالن جي گهٽ ترين سطح تي اچي وئي آهي. وفاقي وزير چيو ته حڪومت جو هڪ سال بي مثال رهيو، بهتر معاشي پاليسين جي تسلسل سان عام ماڻهو جي زندگي جو معيار بهتر ٿيو. وزيراعظم جي اڳواڻي ۾ پاڪستان ترقي ۽ خوشحالي طرف گامزن ٿي چڪو آهي. حڪومت جي هڪ سال جي ترقي جا نوان باب لکيا آهن. قومي معيشت کان وٺي بنيادي ڍانچي، تعليم، صحت، سماجي ڀلائي تائين هر شعبي ۾ واضح اڳڀرائي ٿي آهي. هن چيو ته اڄ سمنڊ پار پاڪستانين جو موجوده حڪومت تي اعتماد بحال آهي. پرڏيهه مان موڪليل ناڻي ۾ رڪارڊ اضافو ٿيو اهي، اسٽاڪ مارڪيٽ تاريخ جي بلندين کي ڇهي رهي آهي، آءِ ٽي ايڪسپورٽس ۾ اضافوٿيو آهي. مشڪل حالتون، سياسي انتشار ۽ بي شمار رڪاوٽن باوجود ڊفالٽ جي دروازي تي بيٺل معيشت هڪ سال ۾ ترقي جي راهه تي گامزن ٿي چڪي آهي، اڄ هڪ تاريخي ڏينهن آهي، حڪومت پهرين سال جا سمورا هدف حاصل ڪرڻ ۾ ڪامياب ٿي چڪي آهي، جلد عوام کي وڌيڪ خوشخبريون ملنديون. وفاقي وزير چيو ته هڪ اهڙو به وقت هو جڏهن ڏڦيڙي ٽولي شرطون لڳايون ۽ دعائون گهريون ته ملڪ ڊفالٽ ٿئي پر جنهن کي الله رکي ان کي ڪير چکي، اڄ الله پاڪ جي فضل سان هڪ سال بعد پاڪستان جو شمار دنيا جي بهترين معيشتن ۾ ٿيڻ شروع ٿيو آهي. وفاقي وزير چيو ته سفارتي محاذ تي وزيراعظم شهباز شريف پرڏيهي دوري تي وڃي ٿو ته عالمي اڳواڻ پاڪستان جي معيشت جي ساراهه ڪن ٿا، جنهن سان اسان جو ڪنڌ فخر سان بلند ٿي وڃي ٿو. هن چيو ته تعمير ۽ ترقي جي سفر ۾ پاڪستان جو سپه سالار حب الوطني ۽ محنت سان ڀرپور ڪردار ادا ڪيو آهي. پاڪستان کي ترقي جي منزلن طرف وٺي ويو. هي ٽيم ورڪ جو نتيجو آهي، هن چيو ته اسان کي ننڍپڻ ۾ سيکاريو ويو ته جيڪي سرحدن جا محافظ آهن اهي عزت جا حقدار آهن، جيڪي وردي پهري سرحدن تي بيٺل آهن، پنهنجي خاندان کان پري سرحدن تي پهرو ڏيندا آهن، جنهن عيوض قوم آرام سان سمهي ٿي. 9 مئي وارن انهن تي گند اڇلايو جنهن جي جيتري مذمت ڪئي وڃي اها گهٽ آهي. هن چيو ته تحريڪ انتشار وارا پاڪستان جا دشمن آهن جيڪي شهيدن جي بي حرمتي ڪن ٿا. وفاقي وزير چيو ته 9 مئي وارن جا مڪروهه چهرا پوري قوم ڏسي چڪي آهي، الزام ، ڪوڙ ۽ منافقت واري سياست پي ٽي آءِ جو وڙ آهي، پي ٽي آءِ جو ڌانڌلي جو بيانئو دفن ٿي چڪو آهي. شهيدن جي يادگارن جي بي حرمتي ڪندڙ 190 ملين پائونڊ جا چور نڪتا آهن. اهي ماڻهن ان ڳالهه تي پريشان آهن ته پاڪستان ترقي ڪيئن ڪري ويو جڏهن ته هڪ سال جي مختلف عرصي ۾ معيشت جي مثبت اهڃاڻن تي کين خوش ٿيڻ گهرجي ها پر انهن جي صف ۾ ماتم آهي. هن چيو ته پي ٽي آءِ وارن وٽ ڪي پي ڪي ۾ ڪارڪردگي ڏيکارڻ لاءِ ڪجهه به ناهي. ٻئي پاسي پنجاب ۾ پنجاب جي وزيراعليٰ صوبي ۾ عوامي خدمت جو سفر جاري رکيو پئي اچي، انتشار ٽولي جي پاڻ ۾ ويڙهه سان خيبر پختونخوا جو حال برو ٿي چڪو آهي، هي پاڻ ۾ وڙهي رهيا آهن ۽ هڪ بئي جون ٽنگون ڇڪي رهيا آهن. هي جيڪي قوم جي ذهنن ۾ نفرت جو ٻج پوکيندا هئا، ماڻهن کي ورهائيندا هئا هنن جيڪو پوکيو اڄ اهو ئي لڻي رهيا آهن. انهن جي پنهنجي پارٽي ورهائجي چڪي آهي. هي اله تعاليٰ جو نظام آهي ته جڏهن توهان ڪنهن سان ظلم ۽ زيادتي ڪيو ٿا ته اهو واپس مڙي توهان طرف ئي ايندو آهي. هن چيو ته عوام پي ٽي آءِ جي ڪوڙ جي سياست کي رد ڪري ڇڏيو آهي. وفاقي وزير چيو ته تڪ ۾ ترقياتي رٿائن جو ڄار وڇايو پيو وڃي، عوام سان ڪيل واعدا پورا ڪري رهيا آهيون، تڪ جي عوام لاءِ ڪم ڪري رهيا آهيون، عوامي خدمت جو ثمر آهي جو اڄ اوهان هتي موجود آهيو. منهنجي والده تڪ جي عوام جي خدمت ۾ڏينهن رات مصروف آهي، هميشه عوام جو هٿ ۽ ٻانهن بڻجي انهن جي وچ ۾ رهندس.
