ڪراچي-11 نومبر (اي پي پي) سنڌ جي گھرو معاملن واري وزير ضياءُ الحسن لنجار ايئرپورٽ تي حملن ۾ ملوث دهشتگردن جي گرفتاري لاءِ منظم ڪارروائي جي سبب انتهائي هاءِ پروفائل ڪيس کي ڪاميابي سان انجام تي پهچائڻ تي سي ٽي ڊي ۽ سندس ٽيم لاءِ پنج ڪروڙ روپيا انعام ۽ تعريفي سرٽيفڪيٽس جو اعلان ڪيو آهي. اهڙو اعلان هن سينٽرل پوليس آفيس ڪراچي ۾ پريس ڪانفرنس ڪندي ڪيو. ان موقعي تي گھرو وزير ايئرپورٽ تي حملن ۾ ملوث دهشتگردن جي گرفتاري ۽ ان حوالي سان سي ٽي ڊي جي ڪارڪردگي بابت ٻڌائيندي چيو ته ايئرپورٽ حملن ۾ آپگهاتي حملو ڪندڙ شاهه فهد جي گاڏي ۽ باقيات هٿ آيون، جڏهن ته خودڪش حملي آور جي ساٿين ۾ رڪشا ڊرائيور فرحان ۽ محمد شريف پڻ شامل هئا. ان کان علاوه، گاڏي خودڪش حملي آور جي نالي تي هئي جيڪا هڪ شوروم کان خريد ڪئي وئي هئي ۽ گاڏي خريد ڪرڻ لاءِ رقم 71 لک روپيا حب جي هڪ بينڪ مان منتقل ڪئي وئي هئي ۽ گاڏي خريد ڪرڻ لاءِ رقم سعيد علي نالي شخص جي اڪائونٽ مان منتقل ڪئي وئي هئي، جڏهن ته دهشتگرد حملي ۾ بينڪ جو ملازم بلال پڻ ملوث هو. گھرو وزير ٻڌايو ته جاچ مطابق خودڪش حملي ۾ استعمال ٿيل گاڏي حب ۾ ڪهڙي جڳهه تي تيار ڪئي وئي هئي ۽ ڌماڪي لاءِ گاڏي ۾ پينٽ نالي ڪيميائي مادو آر ڊي ايڪس سان شامل ڪيو ويو هو، جڏهن ته حمله آور گل نساءِ نالي عورت کي گاڏي ڪراچي آڻڻ لاءِ استعمال ڪيو ويو هو ۽ ايئرپورٽ تي ريڪي جاويد نالي شخص ڪئي هئي ۽ ان ئي ايئرپورٽ جي پهرئين فلور تان چيني شهري جي ايئرپورٽ کان ٻاهر نڪرڻ جو اطلاع آپگهاتي حملو ڪندڙ کي ڏنو هو. هن ٻڌايو ته رپورٽ مطابق دانش نالي دهشتگرد بم ٺاهڻ جو ماهر هو جيڪو ڌماڪي جي وقت ويجهو موجود هو. رپورٽ مطابق رحمان گل نالي شخص بي ايل اي لاءِ سهولتڪار آهي جڏهن ته بشير زيب نالي دهشتگرد ٻاهرين ملڪن ۾ نيٽ ورڪ هلائي رهيو آهي. ان موقعي تي آءِ جي سنڌ غلام نبي ميمڻ، ايڊشنل آءِ جي سي ٽي ڊي عمران يعقوب منھاس، ڊي آءِ جي سي ٽي ڊي ۽ ٻيا سينيئر آفيسر پڻ موجود هئا.
