اسلام آباد – 25 – اپريل (اي پي پي) وزيراعظم محمد شهباز شريف چيو آهي ته اسان کي صحت جي سارسنڀال جي نظام کي مضبوط بڻائڻ، معياري سُڃاڻپ ۽ علاج تائين پهچ وڌائڻ ۽ مليريا جي روڪٿام جي لاءِ آگاهي ۽ گڏيل تعاون سان ڪم ڪرڻ جي ضرورت آهي، ڀرپور سياسي عزم، حڪمت عملي ۽ مناسب سيڙپڪاري جي ذريعي اسان مليريا کان پاڪ دنيا جو گڏيل مقصد حاصل ڪري سگهون ٿا. مليريا جي عالمي ڏينهن تي پنهنجي پيغام ۾ وزيراعظم چيو ته مليريا جو عالمي ڏينهن ملهائڻ ۾ پاڪستان سڄي دنيا سان گڏ شامل آهي. هن سان مليريا جي عالمي ڏينهن 2024ع جي موضوع جي عين موجب مليريا جي خلاف جنگ ۾ سمورين ڌرين، پاليسي سازن، ڊونرز، هيلٿ ڪيئر سميت زندگي جي سمورن شعبن سان تعلق رکندڙ ماڻهن کي مليريا جي خلاف جنگ ۾ شامل ٿيڻو آهي. وزيراعظم چيو ته ميلريا هر سال 10 لک کان وڌيڪ پاڪستانين کي متاثر ڪري ٿو، پاڪستان حڪومت مليريا جي روڪٿام ۽ خاتمي جي لاءِ مناسب قدم کڻي رهي آهي، هر هڪ ماڻهو کي مليريا جي معياري جانچ ۽ علاج جي مفت سهولت تائين پهچ حاصل هجڻ گهرجي. وزيراعظم چيو ته قومي صحت واري وزارت ڪامن مئنيجمينٽ يونٽ مليريا، قومي ۽ عالمي حصيدارن، صوبائي هم منصبن، اين جي اوز ۽ نجي ڌرين جي ذريعي سڄي ملڪ ۾ مليريا جي مفت جانچ ۽ علاج جي سهولتن ۾ نمايان اضافو ڪيو آهي. اسان نجي شعبي ۽ پنهنجي عالمي حصيدارن جي ڪردار کي ساراهيون ٿا. وزيراعظم چيو ته اسان کي صحت جي سارسنڀال جي نظام کي مضبوط بڻائڻ، معياري سُڃاڻپ ۽ علاج تائين پهچ وڌائڻ ۽ مليريا جي روڪٿام ۽ ڪنٽرول جي قدمن جي اهميت بابت آگاهي جي فروغ جي لاءِ گڏيل تعاون سان ڪم ڪرڻ جي ضرورت آهي. وزيراعظم چيو ته ڀرپور سياسي عزم، حڪمت عملي ۽ مناسب سيڙپڪاري جي ڪري اسان مليريا کان پاڪ دنيا جو پنهنجو گڏيل مقصد حاصل ڪري سگهون ٿا.
