رياض -20 نومبر (اي پي پي) سعودي عرب جا 2 جهاز غزه لاءِ امدادي سامان کڻي مصر پهچي ويا آهن. سعودي اخبار مطابق شاهه سلمان مرڪز غزه جي متاثرن ڏانهن امدادي سامان فراهم ڪرڻ لاءِ خادم الحرمين الشريفين ۽ ولي عهد جي هدايتن تي فضائي پل قائم ڪئي آهي. ان سلسلي تحت 13هون ۽ 14هون جهاز سعودي عرب کان مصر جي العريش انٽرنيشنل هوائي اڏي تي پهتا. العريش هوائي اڏي تان امدادي سامان زمين رستي غزه پهچايو پيو وڃي. سعودي عرب جي 13هين جهاز ذريعي 2 وڌيڪ ايمبولينسون روانو ڪيون ويون آهن، مجموعي طور تي 20 ايمبولينسون اماڻيون وينديون. اهڙي ريت 14هين جهاز ذريعي به 2 ايمبولينسون اماڻيون ويون آهن. ٻنهي جهازن تي امدادي سامان به روانو ڪيو ويو آهي. ياد رهي ته ان کان اڳ 12هين جهاز وسيلي کاڌي پيتي جون شيون، دوائون ۽ طبي اوزار اماڻيا ويا هئا. 35 ٽن جو امدادي سامان اماڻيو ويو آهي.
