پئرس-16 نومبر (اي پي پي) پاڪستان کي 2023ع کان 2027ع تائين جي مدي لاءِ هڪ دفعو ٻيهر يونيسڪو جي ايگزيڪيٽو بورڊ جو ميمبر چونڊيو ويو آهي، فرانس ۾ يونيسڪو ۾ پاڪستان جي مستقل نمائندي بيان ۾ ٻڌايو ته پاڪستان اڪثريت ۾ ووٽ حاصل ڪيا. بيان ۾ پاڪستان جي حمايت ۽ اعتماد لاءِ ميمبر ملڪن جو شڪريو ادا ڪيو ويو، بيان ۾ چيو ويو ته پاڪستان گڏيل مقصدن کي هٿي ڏيڻ لاءِ سمورن ميمبر ملڪن سان گڏجي ڪم ڪندو رهندو. بيان ۾ چيو ويو ته ايگزيڪيٽو بورڊ ۾ خدمتون انجام ڏيڻ جي ذميواري سونپڻ پاڪستان لاءِ انتهائي فخر آهي. بيان ۾ چيو ويو ته پاڪستان پاليسي سازي، اصولن جي ترقي، عالمي ترجيحن کي هٿي ڏيڻ ۽ تنظيم جي پروگرامن ۽ سرگرمين جي موثر نگراني ۾ پنهنجو حصو وجهڻ لاءِ ان موقعي مان فائدو کڻندو. بيان ۾ چيو ويو ته پاڪستان جو يونيسڪو جي ايگزيڪيٽو بورڊ جي ميمبر جي حيثيت سان ٻيهر چونڊجڻ گڏيل قومن جي حمايت ۽ ان جهڙن عالمي فورمن تي ان جي تعميري ڪردار جو ثبوت آهي.
