راولپنڊي – 12 فيبروري (اي پي پي) اطلاعات، نشريات ۽ ثقافتي ورثي واري مملڪتي وزير مريم اورنگزيب چيو آهي ته وزيراعظم محمد نواز شريف جي قيادت ۾ پاڪستان هر شعبي ۾ اڳتي وڌي رهيو آهي، وزيراعظم جي قيادت ۾ دهشتگردي تي ضابطو آندو ۽ راندين جا ميدان آباد ڪيا. عمران خان راندين جي ترقي راولپنڊي ۾ يونين ڪائونسل جي سطح تي اچي ڏسي، تنقيد ڪندڙ پنجاب جي ترقي کي ڏسي تنقيد وساري ويهندا، جيڪي صرف سياست ڪرڻ آيا هئا انهن کي واپس اچڻ جي وري توفيق ناهي ٿي،وزيراعظم قومي صحت پروگرام پاڪستان ۽ ايشيا جو وڏو پروگرام آهي، پرائم منسٽر ايجوڪيشن پروگرام مثالي پروگرام آهي، پوري دنيا پاڪستان جي ترقي ۽ ادارن ۾ بهتري جي ڳالهه ڪري رهي آهي، ملڪ ۾ 18 کان 20 ڪلاڪ جي لوڊشيڊنگ 3 کان 4 ڪلاڪن تائين رهجي وئي آهي، 30 سالن جي ملڪي تاريخ ۾ ڪڏهن ايترن منصوبن تي ڪم ناهي ٿيو جيترو گذريل سال ساڍا ٽن سالن ۾ ٿيو آهي، سمورا منصوبا هن سال ۽ ايندڙ سال جي آغاز ۾ مڪمل ٿي ويندا، هي منصوبا پاڪستان جي عوام ۽ سمورن صوبن جي لاءِ آهن، بلوچستان کي اقتصادي راهداري جو تحفو ڏنو آهي، سنڌ ۾ موٽر وي، گرين لائين ۽ صاف پاڻي جي فراهمي جو منصوبو به جاري آهي، خيبرپختونخوا ۾ به تيزي سان موٽر وي بڻجي رهي آهي، ٻين صوبن ۾ به پنجاب جيئن ترقي چاهيون ٿا. اهڙن خيالن جو اظهار هن ٻي شهباز شريف ٽي 20 ڪرڪيٽ جي فائنل جي موقعي تي ميڊيا جي نمائندن سان ڳالهائيندي ڪيو.
