اسلام آباد – پهرين ڊسمبر (اي پي پي) واپار واري وفاقي وزير خرم دستگير خان ۽ اطلاعات ۽ نشريات واري وفاقي پارلياماني سيڪريٽري محسن شاهنواز رانجها چيو آهي ته عمران خان شريف فيملي جي خلاف مني لانڊرنگ، اثاثا لڪائڻ ۽ ڪرپش سميت 8 ڪوڙا الزام هنيا پر عدالت ۾ هيستائين ڪو به ثبوت پيش ناهي ڪري سگهيو. پي آءِ ڊي ۾ ميڊيا سينٽر ۾ پريس ڪانفرنس کي خطاب ڪندي وفاقي وزير خرم دستگير خان چيو ته عمران خان جي الزامن ۾ ڪرپشن مني لانڊرنگ، ڪڪ بيڪس، اثاثا لڪائڻ ۽ قرض معاف ڪرائڻ، فليٽ جي 1990ع کان ملڪيت، ڪوڙ جي بنياد تي جمهوريت تي حملو، ڪرپشن تي اسد کرل جو ڪتاب ۽ اخباري ڪٽينگون شامل آهن.
