ڪراچي- 26 آڪٽوبر (اي پي پي) سنڌ جي محنت، افرادي سگهه ۽ سماجي تحفظ واري صوبائي وزير سعيد غني چيو آهي ته پاڪستان سميت سڄي دنيا ۾ ڊاڪٽرن ۽ نرسن جي وڏي ضرورت آهي، تنهن ڪري اسان کي پنهنجي معاشري جون ضرورتون پوريون ڪرڻ لاءِ وڌيڪ ڊاڪٽر ۽ نرسون تيار ڪرڻيون پونديون. ملڪ جي ضرورت پوري ڪرڻ کانپوءِ جيڪڏهن اهي ٻاهرين ملڪن ۾ روزگار حاصل ڪن ٿا ته ان عمل …
پاڪستان سميت سڄي دنيا ۾ ڊاڪٽرن ۽ نرسن جي وڏي ضرورت آهي، تنهن ڪري اسان کي پنهنجي معاشري جون ضرورتون پوريون ڪرڻ لاءِ وڌيڪ ڊاڪٽر ۽ نرسون تيار ڪرڻيون پونديون: صوبائي وزير سعيد غني
مزید خبریں
ڪراچي- 26 آڪٽوبر (اي پي پي) سنڌ جي محنت، افرادي سگهه ۽ سماجي تحفظ واري صوبائي وزير سعيد غني چيو آهي ته پاڪستان سميت سڄي دنيا ۾ ڊاڪٽرن ۽ نرسن جي وڏي ضرورت آهي، تنهن ڪري اسان کي پنهنجي معاشري جون ضرورتون پوريون ڪرڻ لاءِ وڌيڪ ڊاڪٽر ۽ نرسون تيار ڪرڻيون پونديون. ملڪ جي ضرورت پوري ڪرڻ کانپوءِ جيڪڏهن اهي ٻاهرين ملڪن ۾ روزگار حاصل ڪن ٿا ته ان عمل کي برين ڊرين (صلاحيتن جو ملڪ مان ٻاهر وڃڻ) نٿو چئي سگهجي، پر اهو ملڪي معيشت لاءِ سهارو بڻجي ٿو. اسان کي ڊاڪٽرن ۽ نرسن جي تربيت ڏيندڙ ادارن جي سرپرستي ۽ حوصلا افزائي ڪرڻ گهرجي. اهڙن خيالن جو اظهار هن سومر ڏينهن هورائزن انسٽيٽيوٽ آف هيلٿ سائنسز ۽ سواستو اسڪول آف نرسنگ اينڊ هيلٿ سائنسز جي ڇهين گڏيل ڪانووڪيشن کي خاص مهمان طور خطاب ڪندي ڪيو. تقريب دوران ٻنهي ادارن جي 600 نرسنگ گريجوئيٽس کي ڊگريون ۽ سندون ڏنيون ويون، جڏهن ته نمايان پوزيشنون حاصل ڪندڙ شاگردن ۽ شاگردياڻين ۾ گولڊ، سلور ۽ برونز ميڊل پڻ ورهايا ويا. تقريب ۾ گريجوئيٽس جي والدين ۽ ٻين مهمانن وڏي انگ ۾ شرڪت ڪئي. صوبائي وزير سعيد غني چيو ته پاڪستان ۾ ڊاڪٽرن ۽ نرسن جي وڏي کوٽ آهي. ٻين شعبن ۾ به ماهر ماڻهن جي ضرورت آهي، پر صحت جو شعبو اهڙو آهي، جتي ڊاڪٽرن ۽ نرسن جي کوٽ سبب رڳو مالي نقصان نه ٿيندو آهي، پر انساني زندگيون به متاثر ٿينديون آهن. اهڙي نقصان جو بار ايندڙ نسلن کي به برداشت ڪرڻو پئجي سگهي ٿو. هن چيو ته اسان لاءِ ضروري آهي ته پنهنجي معاشري جون ضرورتون پوريون ڪرڻ لاءِ وڌ کان وڌ ڊاڪٽر ۽ نرسون تيار ڪيون. ان سان گڏ پاڪستان وٽ اهو هڪ بهترين موقعو پڻ آهي ته ملڪ جي اندروني ضرورتن کان وڌيڪ طبي ۽ نرسنگ شعبي جا ماهر تيار ڪري عالمي سطح تي انهن جي گهرج پوري ڪئي وڃي.سعيد غني چيو ته کيس ان ڳالهه تي حيرت ٿيندي آهي ته ميڊيا تي ويهي معاشي ماهر پڙهيل لکيل ماڻهن جي ٻاهرين ملڪن ڏانهن وڃڻ کي برين ڊرين قرار ڏين ٿا، جڏهن ته دنيا جا ڪيترائي ملڪ پنهنجي آبادي، خاص طور نوجوانن جي وڏي انگ کي پنهنجي ملڪي ترقي ۽ معيشت جي بهتري لاءِ استعمال ڪرڻ جون ڪوششون ڪندا آهن. پاڪستان ۾ به نوجوانن جي وڏي آبادي موجود آهي، جنهن کي مناسب تعليم، تربيت ۽ روزگار جا موقعا فراهم ڪري ملڪ جي ترقيءَ لاءِ استعمال ڪري سگهجي ٿو.. هن چيو ته جڏهن اسان پنهنجي ملڪ ۾ پيشوراڻين صلاحيتن جا مالڪ ماڻهو تيار ڪريون ٿا ۽ اهي ملڪ جون ضرورتون پوريون ڪرڻ کانپوءِ ٻاهرين ملڪن ۾ روزگار حاصل ڪن ٿا ته ان کي برين ڊرين چوڻ درست ناهي. اهڙا ماڻهو ٻاهرين ملڪن ۾ ڪم ڪندي پنهنجي خاندانن جي مالي مدد ڪرڻ سان گڏ پاڪستان جي معيشت کي به مضبوط ڪن ٿا. صوبائي وزير چيو ته هن وقت پاڪستان جي معيشت کي سڀ کان وڏو سهارو انهن پاڪستانين جي موڪليل پرڏيهي ناڻي مان ملي رهيو آهي، جيڪي ٻين ملڪن ۾ روزگار حاصل ڪري رهيا آهن. اهي نه رڳو پنهنجن خاندانن جي پرورش ڪن ٿا، پر پاڪستان ڏانهن پرڏيهي ناڻو موڪلي ملڪي معيشت کي به سهارو ڏين ٿا. هن وڌيڪ چيو ته ڊاڪٽرن ۽ نرسن جي عالمي سطح تي وڏي گهرج آهي. جيڪڏهن پاڪستان ۾ وڌيڪ ڊاڪٽر ۽ نرسون تيار ٿينديون ته اهي ملڪ اندر به پنهنجون خدمتون سرانجام ڏئي سگهندا ۽ ٻاهرين ملڪن ۾ وڃي به پاڪستان جو نالو روشن ڪري سگهندا. ٻنهي صورتن ۾ ملڪ ۽ قوم جي خدمت ٿيندي. سعيد غني چيو ته حڪومت کي انهن سمورن ادارن جي مدد ۽ سرپرستي ڪرڻ گهرجي، جيڪي ڊاڪٽرن، نرسن ۽ ٻين ماهر ماڻهن جي تياريءَ ۾ اهم ڪردار ادا ڪري رهيا آهن. اهڙن ادارن جي حوصلا افزائي سان ملڪ ۾ صحت جي شعبي جون ضرورتون پوريون ڪرڻ سان گڏ عالمي سطح تي به ماهر افرادي قوت فراهم ڪري سگهجي ٿي. گريجوئيشن مڪمل ڪندڙ شاگردن ۽ شاگردياڻين کي خطاب ڪندي صوبائي وزير چيو ته اڄ اوهان پنهنجي تعليمي سفر جو هڪ اهم مرحلو ڪاميابيءَ سان مڪمل ڪيو آهي ۽ هاڻي اوهان جي عملي زندگيءَ جي شروعات ٿي رهي آهي. اوهان کي ذهن ۾ رکڻ گهرجي ته پيشو صرف روزگار جو ذريعو ناهي، پر انسانيت جي خدمت جو هڪ اهم موقعو پڻ آهي. هن چيو ته صحت جي شعبي سان لاڳاپيل ماڻهن جي ذميواري آهي ته اهي پنهنجي فرضن کي ايمانداري، احساس ۽ انسانيت جي جذبي سان نڀائين.
