سينيٽ چيئرمين جي تنزانيه ۾ بين الپارلياماني يونين جي 153 هين اسيمبلي جي موقعي تي ايشيا پيسيفڪ جيو پوليٽيڪل گروپ جي اجلاس ۾ شرڪت

اروشا/تنزانيه- 05 آڪٽوبر (اي پي پي) سينيٽ چيئرمين سيد يوسف رضا گيلاني تنزانيه جي شهر اروشا ۾ بين الپارلياماني يونين (آءِ پي يو) جي 153 هين اسيمبلي جي موقعي تي ايشيا پيسيفڪ جيو پوليٽيڪل گروپ جي اجلاس ۾ شرڪت ڪئي. اجلاس ۾ ايشيا پيسيفڪ خطي بابت اهم معاملن جو جائزو ورتو ويو، جڏهن ته آءِ پي يو اسيمبلي جي ايجنڊا ۾ شامل اهم معاملن خاص ڪري خالي سيٽن، هنگامي معاملن ۽ ڊرافٽنگ ڪميٽي لاءِ نامزدگين تي غور ڪيو ويو. سينيٽ چيئرمين ايشيا پيسيفڪ خطي جي ملڪن ۾ پارلياماني رابطن ۽ گڏيل رابطاڪاري کي مضبوط بڻائڻ جي اهميت تي زور ڀريو. هن چيو ته گڏيل چئلينجن کي منهن ڏيڻ ۽ گڏيل مفادن کي هٿي وٺرائڻ لاءِ پارليامينٽ وچ ۾ موثر تعاون ضروري آهي. هن خاص ڪري موسمياتي تبديلي ۽ ان جي وسيع تر سماجي ۽ معاشي اثرن کي منهن ڏيڻ لاءِ گڏيل پارلياماني قدمن جي ضرورت تي زور ڀريو. اجلاس ۾ موسمياتي تبديلي ۽ ان جي اثرن کي هنگامي ايجنڊا ايٽم طور شامل ڪرڻ جي تجويز تي به غور ڪيو ويو. شرڪت ڪندڙن موسمياتي تبديلي جي نتيجي ۾ وڌندڙ قدرتي آفتن، ماحولياتي مسئلن ۽ خطي جي آبادين ۽ معيشتن تي پوندڙ ناڪاري اثرن جي روشني ۾ ان معاملي جي اهميت کي اجاگر ڪيو ويو. اجلاس ۾ آسيان پلس ٿري گروپ بابت معاملن سميت آئنده اسيمبلي جي ڪارروائي بابت ٻين اهم معاملن تي پڻ خيالن جي ڏي وٺ ڪئي.