ريلوي واري وفاقي وزير سان گجرات چيمبر جي وفد جي ملاقات

اسلام آباد-03 جولاءِ (اي پي پي) ريلوي واري وفاقي وزير محمد حنيف عباسي سان گجرات چيمبر آف ڪامرس اينڊ انڊسٽري جي صدر احمد حسن مٽو جي اڳواڻيءَ ۾ هڪ وفد ريلوي واري وزارت ۾ ملاقات ڪئي. وفد ۾ گجرات جو اڳوڻو ايم پي اي ۽ اڳوڻو ميئر  حاجي ناصر محمود، اڳوڻو صدر گجرات چيمبر منير احمد، ايگزيڪيوٽو ڪميٽيءَ جا ميمبر ۽ ٻيا شامل هئا. ريلوي ترجمان طرفان جاري بيان موجب ملاقات دوران ريلوي ذريعي ملڪي واپاري کي هٿي ڏيڻ، ڪارگو سروسز کي وڌيڪ مؤثر بنائڻ، صنعتڪارن ۽ ڪاروباري برادريءَ کي بهتر سهولتن جي فراهمي، لاجسٽڪس جي نظام ۾ بهتري ۽ گجرات سميت مختلف صنعتي علائقن کي ريلوي نيٽ ورڪ سان وڌيڪ مؤثر انداز ۾ ڳنڍڻ بابت معاملن تي تفصيلي خيالن جي ڏي وٺ ڪئي وئي. وفد وفاقي وزير کي ڪاروباري برادريءَ کي درپيش مسئلا ۽ تجويزن کان آگاهه ڪيو ۽ ريلوي ڪارگو سروسز کي جديد رُخن تي اختيار ڪرڻ، سامان جي وقت سر رسد ۽ نجي شعبي سان تعاون وڌائڻ جي ضرورت تي زور ڀريو. ان موقعي تي وفاقي وزير چيو ته پاڪستان ريلوي کي قومي معيشت جو مؤثر ٿنڀ بڻائڻ ۽ ريلوي ذريعي واپاري ۽ صنعت کي هٿي ڏيڻ لاءِ حڪومت عملي قدم کڻي رهي آهي. هن چيو ته ڪارگو آپريشنز جي صلاحيت وڌائڻ، جديد سهولتن جي فراهمي ۽ ڪاروباري برادريءَ سان مسلسل مشاورت حڪومت جي ترجيحن ۾ شامل آهي ته جيئن ريلوي کي واپار لاءِ هڪ اعتماد جوڳو تيز رفتار ۽ گهٽ لاڳت ذريعو بڻائي سگهجي. وفاقي وزير وفد کي خاطري ڪرائي ته ڪاروباري برادريءَ جي قابل عمل تجويزن جي آجيان ڪئي ويندي ۽ پاڪستان ريلوي جي ڪارڪردگي، ڪارگو سهولتن ۽ واپاري خدمتن کي وڌيڪ بهتر بنائڻ لاءِ سمورا ضروري قدم کنيا ويندا. وفد وفاقي وزير طرفان مسئلن جي حل ۽ ڪاروباري برادريءَ سان مؤثر رابطي جي خاطريءَ کي ساراهيو.