قومي ٽيم شاندار ڪارڪردگي جي ڪري چيمپيئنز ٽرافي جي فائنل مئچ ۾ ڀارت کي شڪست ڏئي اعزاز پنهنجي نالي ڪيو: سرفراز احمد

لاهور – 18 جون (اي پي پي) پاڪستاني ڪرڪيٽ جي تاريخ جو 18 جون 2017ع هڪ سنهرو باب آهي، جڏهن قومي ٽيم سمورين اميدن جي ابتڙ شاندار ڪارڪردگي جو مظاهرو ڪندي آءِ سي سي چيمپيئنز ٽرافي جي فائنل ۾ روايتي مخالف ڀارت کي 180 رنسن تان شڪست ڏئي پهريون ڀيرو اهو اعزاز پنهنجي نالي ڪيو هو. ان تاريخي ڪاميابي کي اڄ 9 سال مڪمل ٿي ويا آهن، تنهن هوندي به ان فتح جي ياد اڄ به ڪرڪيٽ جي شوقينن جي دلين ۾ تازي آهي. قومي ٽيم جي ان وقت جي ڪپتان سرفراز احمد چيو ته آءِ سي سي چيمپيئنز ٽرافي کڻڻ سندس ڪيريئر جو يادگار ترين لمحو هو. سندس موجب اها ڪاميابي پوري ٽيم، ڪوچنگ اسٽاف، مئنيجمينٽ ۽ سليڪشن ڪميٽي جي گڏيل ڪوششن جو نتيجو هئي. فائنل ۾ سينچري ٺاهيندڙ فخر زمان چيو ته فائنل ۾ کيڏي ويندڙ اننگز ۽ اهو تاريخي ڏينهن اڄ به سندس يادن جو اهم حصو آهي. هن چيو ته آءِ سي سي چيمپيئنز ٽرافي کيس تمام گهڻو ڪجهه سيکاريو ۽ سندس ڪيريئر ۾ اهم ڪردار ادا ڪيو. قومي ٽيم جي اسپنر ابرار احمد ٻڌايو ته هن 2017ع جو فائنل گهر ويهي ڏٺو هو ۽ پاڪستان جي فتح تي تمام گهڻي خوشي محسوس ڪئي هئي. سندس چوڻ هو ته جڏهن سرفراز احمد ٽرافي ڪراچي آندي ته هو سندس گهر ويو هو، جڏهن ته رش جي ڪري  ٽرافي کي ويجهي کان نه ڏسي سگهيو. ابرار احمد چيو ته اڄ ٽرافي کي ويجهي کان ڏسڻ سندس لاءِ هڪ خاص لمحو آهي. فاسٽ بالر خرم شهزاد چيو ته چيمپيئنز ٽرافي جي لاءِ هنيل ڪئمپ دوران هو نيشنل ڪرڪيٽ اڪيڊمي ۾ پاڪستان ٽيم جو نيٽ بالر هو ۽ ان ڪاميابي کي هو اڄ به فخر سان ياد ڪري ٿو. آل رائونڊر عامر جمال چيو ته آءِ سي سي چيمپيئنز ٽرافي کٽڻ پوري قوم جي لاءِ فخر جو لمحو هو ۽ سيمي فائنل ۽ فائنل جون يادون اڄ به وسارڻ جوڳيون نه آهن. هن ياد ڪندي چيو ته فائنل ۾ ويرات ڪوهلي جو ڪئچ ڊراپ ٿيڻ تي سڀ دٻاءُ ۾ اچي ويا هئاسين، جڏهن ته اڳئين ئي بال تي شاداب خان جي شاندار ڪئچ پاڪستان کي ٻيهر مقابلي ۾ مضبوط پوزيشن ۾ آندو ۽ ٽيم جا حوصلا بلند ڪري ڇڏيا.