سنڌ جي وڏي وزير پاران ڪڻڪ جي مارڪيٽ اگهن ۾ واڌ تي سخت ڳڻتي جو اظهار، صوبائي اختيارين کي مارڪيٽ کي منظم ڪرڻ جي هدايت

ڪراچي -05 جون (اي پي پي) سنڌ جي وڏي وزير سيد مراد علي شاهه ڪڻڪ جي مارڪيٽ اگهن ۾ واڌ تي سخت ڳڻتي جو اظهار ڪندي صوبائي اختيارين کي مارڪيٽ کي منظم ڪرڻ جي هدايت ڪئي آهي ته جيئن واهپيدارن کي اٽي جي قيمتن ۾ هٿرادو واڌ کان بچائي سگهجي. ڪڻڪ جي مارڪيٽ ۾ استحڪام بابت هڪ اجلاس جي صدارت ڪندي وڏي وزير سرڪاري امدادي اگهه ۽ اوپن مارڪيٽ جي اگهن وچ ۾ وڌندڙ فرق، ۽ ڪڻڪ جي قياس آرائي تي ٻڌل ذخيرو اندوزي جي خطرن جو جائزو ورتو.  عملدارن وڏي وزير کي بريفنگ ڏيندي ٻڌايو ته 31 مارچ 2026 جي سنڌ ڪابينا جي فيصلي جي روشنيءَ ۾ سال 26–2025 جي فصل لاءِ ڪڻڪ جي خريداري جو آغاز 1 اپريل 2026 کان ٿيو جنهن جو هدف 10 لک ميٽرڪ ٽن هو. حڪومت امدادي اگهه 3500 رپيا في 40 ڪلوگرام مقرر ڪيو هو جنهن سان گڏ 50 ڪلوگرام جي ٻوري تي 60 رپيا بارداڻو جي ادائيگي به شامل هئي. هيءَ اسڪيم سنڌ ويلٽ گروئرس سپورٽ پروگرام 2025 جي 332090 مستحقن کي نشانو بڻائي رهي هئي. پر 4 جون 2026 تائين خوراڪ کاتو 10 لک ميٽرڪ ٽن جي هدف جي مقابلي ۾ صرف 79835.66 ميٽرڪ ٽن ڪڻڪ خريد ڪري سگهيو آهي. اجلاس کي ٻڌايو ويو ته گهٽ خريداري جو بنيادي سبب سرڪاري امدادي قيمت ۽ مارڪيٽ ۾ هلندڙ اگهه جي وچ ۾ فرق هو، وڏي وزير کي ٻڌايو ويو ته مارڪيٽ ۾ ڪڻڪ موجود آهي پر ڪجهه ذخيرو ڪندڙ مصنوعي کوٽ پيدا ڪرڻ جي ڪوشش ڪري رهيا آهن. مراد علي شاهه چيو ته هي قياس آرائي تي ٻڌل ذخيرو اندوزي سڌي ريت صوبائي خوراڪ جي تحفظ ۽ قيمتن جي استحڪام کي نقصان پهچائي ٿي. اسان جي پهرين ذميواري سنڌ جي عوام سان آهي. ڪڻڪ جو دستياب، سستي ۽ محفوظ هجڻ ضروري آهي. اسان ڪنهن به قياس آرائي ڪندڙن کي اسان جي شهرين جي بنيادي خوراڪ سان کيڏڻ جي اجازت نه ڏينداسين. اجلاس جي پڄاڻي تي وڏي وزير مراد علي شاهه آبادگارن ۽ واهپيدارن ٻنهي جي مفادن جي تحفظ لاءِ پنهنجي حڪومت جي عزم کي ورجايو. هن چيو ته ڪڻڪ صرف هڪ جنس ناهي – هي اسان جي ماڻهن جي بنيادي خوراڪ آهي ۽ سماجي استحڪام جو سنگِ بنياد آهي. منهنجي حڪومت آبادگارن، ملرن، واپارين ۽ وفاقي اختيارين سان گڏجي، مستحڪم سپلائي ۽ منصفاڻي قيمتن جي ضمانت ڏيڻ لاءِ هر ضروري قدم کڻندي. قياس آرائي ۽ مصنوعي کوٽ کي اسان جي شهرين جي حقن کي نقصان پهچائڻ جي اجازت نه ڏني ويندي. وڏي وزير خوراڪ کاتي ۽ ٻين لاڳاپيل ادارن کي هدايت ڪئي ته اهي ضابطن تي باقاعدگي سان اڳڀرائي جون رپورٽون پيش ڪن. وڏي وزير چيو ته سنڌ جا ماڻهو اسان مان فوري ۽ ذميواراڻي عمل جي اميد رکن ٿا، اسان کين مايوس نه ڪنداسين.اجلاس ۾ صوبائي وزيرن مڪيش چاولا، سردار محمد بخش خان مھر، ڄام خان شورو، مخدوم محبوب زمان، صلاحڪار گيانچند ايسراڻي، چيف سيڪريٽري آصف حيدر شاهه، وڏي وزير جو سيڪريٽري آصف جميل، سيڪريٽري زراعت زمان ناريجو، سيڪريٽري فوڊ ۽ ٻين لاڳاپيل اختيارين شرڪت ڪئي.