ڊپٽي ڪمشنر لاڙڪاڻو جي صدارت هيٺ ضلعي فائر سيفٽي آڊٽ ڪميٽي جو اجلاس منعقد

لاڙڪاڻو-14 مئي(اي پي پي)ڊپٽي ڪمشنر لاڙڪاڻو طارق منظور چانڊيو جي صدارت هيٺ ضلعي فائر سيفٽي آڊٽ ڪميٽي جو اجلاس سندس آفيس ۾ منعقد ٿيو. اجلاس ۾ ضلعي لاڙڪاڻي جي سمورن اسسٽنٽ ڪمشنرن راجا قريشي لاڙڪاڻو، سرمد حسين مهر رتوديرو، فرزانه ميراڻي ڏوڪري، عاشق علي جتوئي باقراڻي، ڊاڪٽر رابعه اڪرام اي سي/ يوٽي، ڊپٽي ڊائريڪٽر سنڌ بلڊنگ ڪنٽرول اٿارٽي لاڙڪاڻو عبدالفتاح دايو ۽ ضلعي مينيجر ريسڪيو 1122 عرفان نواز شيخ شرڪت ڪئي.ڊپٽي ڊائريڪٽر سنڌ بلڊنگ ڪنٽرول اٿارٽي لاڙڪاڻو ان موقعي تي ڊپٽي ڪمشنر لاڙڪاڻو کي ضلعي ۾ جاري فائر سيفٽي آڊٽ جي اڳڀرائي بابت بريفنگ ڏني. هن ٻڌايو ته معائني جي پهرين مرحلي ۾ ضلعي لاڙڪاڻي ۾ 133 ڪمرشل ۽ سرڪاري عمارتن کي چيڪ ڪيو ويو انهن مان 5 عمارتن کي سنڌ بلڊنگ ڪنٽرول اٿارٽي پاران ضلعي انتظاميا ۽ ضلعي پوليس جي سهڪار سان فائر سيفٽي معيارن جي عدم تعميل تي سيل ڪيو ويو. ڊپٽي ڪمشنر سمورن اسسٽنٽ ڪمشنرن ۽ سنڌ بلڊنگ ڪنٽرول اٿارٽي لاڙڪاڻو ۽ ريسڪيو 1122 کي هدايت ڪئي ته ضلعي لاڙڪاڻي جي سمورن تعلقن ۾ ٻيهر معائنو ڪيو وڃي ۽ ترجيحي علائقن ۾ ڪپڙن جي دڪانن، شاپنگ مالز طبي ۽ صحت جي مرڪزن، ريسٽورنٽس، هوٽلز،  شادي هالن ۽ ٻيون گهڻ ماڙ عمارتون شامل آهن. ريشم گلي، شاهي بازار، اسٽيشن روڊ، بندر روڊ، پاڪستاني چوڪ ۽ ضلعي جي ٻين اهم بازارن ۽ روڊن تي خاص ڌيان ڏنو وڃي. ڊي سي لاڙڪاڻو سنڌ بلڊنگ ڪنٽرول اٿارٽي کي هدايت ڪئي ته سمورن غير تعميل دڪانن، عمارتن ۽ مالز کي نوٽيس جاري ڪيا وڃن. هن وڌيڪ چيو ته جيڪڏهن احاطو باهه جي حفاظت جي لازمي گهرجن جي تعميل ۾ ناڪام ٿئي ته ان کي فوري طور سيل ڪيو وڃي جنهن ۾ دونھين، گرمي ڊٽيڪٽرن جي تنصيب، باهه وسائڻ جا اوزار اسپرنڪلر ۽ فائر هائيڊرنٽس جي فراهمي، ايمرجنسي لائيٽون، نڪرڻ جا نشان ۽ واضح طور نشان لڳل ۽ نڪرڻ جا رستا شامل آهن. ريسڪيو 1122 کي هدايت ڪئي وئي ته هو دڪاندارن، مال انتظاميا ۽ عملي سان فائر سيفٽي ڊرلز ۽ آگاهي سيشن منعقد ڪري سنڌ بلڊنگ ڪنٽرول اٿارٽي ۽ اسسٽنٽ ڪمشنرز کي هدايت ڪئي وئي ته اهي معائنو ڪيل عمارتن جو گڏيل ڊيٽابيس برقرار رکن ۽ هفتيوار تعميل رپورٽ ڊي سي آفيس ۾ جمع ڪرائين. ڊپٽي ڪمشنر طارق منظور چانڊيو چيو ته عوام جي حفاظت لاءِ ڪنهن به قسم جي رعايت نه ڪئي ويندي. شهري مرڪزن ۾ باهه جا تازا واقعا عمارتي ضابطن تي سخت عمل جي ضرورت کي اجاگر ڪن ٿا. هن وڌيڪ چيو ته هن مهم جو مقصد ڪاروباري برادري کي تنگ ڪرڻ نه پر سندن ۽ عوام جي جان ۽ مال جي حفاظت ڪرڻ آهي.ڊپٽي ڪمشنر خبردار ڪندي چيو ته نوٽيسن کي نظرانداز ڪرڻ يا سيل ٿيل جڳهن تي ڇڪتاڻ ڪرڻ وارن مالڪن خلاف قانوني ڪارروائي ڪئي ويندي.