سنڌ جي وڏي وزير جي صدارت هيٺ ڪراچي ۾ جاري ترقياتي منصوبن جو جائزو وٺڻ بابت اجلاس منعقد

ڪراچي- 13 مئي (اي پي پي) سنڌ جي وڏي وزير سيد مراد علي شاهه چيو آھي ته ڪراچي جي وڌندڙ آبادي ۽ ٽريفڪ جي بار لاءِ مربوط رٿابندي ۽ انفراسٽرڪچر منصوبن تي تيزي سان عملدرآمد جي ضرورت آهي. وڏي وزير چيو ته اسان جو مقصد ڪراچي جي شهرين کي محفوظ، تيز ۽ جديد روڊ انفراسٽرڪچر فراهم ڪرڻ آهي، جيڪو اچ وڃ کي بهتر بڻائي ۽ سڄي شهر ۾ ٽرئفڪ جي رَش کي گهٽائي. اھڙو اظهار هن وزيراعليٰ هائوس ۾ هڪ اجلاس جي صدارت ڪندي ڪيو. ان موقعي تي هن ڪراچي ۾ ٽريفڪ جي رواني، شهري رابطي، نيڪال ۽ روڊن جي انفراسٽرڪچر کي بهتر بڻائڻ لاءِ مقامي حڪومتن واري کاتي پاران ڪراچي ڊيولپمينٽ اٿارٽي (ڪي ڊي اي) ذريعي هلندڙ 10 وڏن انفراسٽرڪچر ۽ روڊن جي ترقياتي منصوبن جو جائزو ورتو، جن جي ماليت 10 ارب رپين کان وڌيڪ آهي. هن سمورن کاتن کي هدايت ڪئي ته هو پاڻ ۾ ويجهو تعاون يقيني بڻائين ته جيئن ترقياتي اسڪيمون مقرر ڪيل وقت اندر مڪمل ڪيون وڃن ۽ معيارن تي سمجهوتو ڪرڻ کان سواءِ مڪمل ٿي سگهن. وڏي وزير سمورن عملدرآمد ڪندڙ ادارن کي هدايت ڪئي ته هو منصوبن جي وقت تي مڪمل ٿيڻ، تعميراتي معيار کي برقرار رکڻ ۽ ڪراچي جي وڌندڙ ٽريفڪ ۽ انفراسٽرڪچر جي چئلينجن کي منهن ڏيڻ لاءِ ڊگهي مدي واري شهري رٿابندي جا حل اختيار ڪن. اجلاس دوران وڏي وزير انفراسٽرڪچر جي ڪيترن ئي وڏن اسڪيمن جو جائزو ورتو جن جو مقصد رش کي گهٽائڻ، رابطي کي بهتر بڻائڻ، خراب ٿيل روڊن جي بحالي ۽ ڪراچي جي شهري ٽرانسپورٽ ڪوريڊورز کي جديد بڻائڻ آهي. اجلاس ۾ نارٿ ڪراچي ۾ پاور هائوس چورنگي تي مجوزه فلائي اوور جي تعمير جو جائزو ورتو ويو جنهن جي ڪاٿو 2.5 ارب رپيا آهي. لوڪل گورنمينٽ جي وزير سيد ناصر شاهه اجلاس کي ٻڌايو ته 636 ميٽر ڊبل ٽريڪ فلائي اوورڪي – 4 چورنگي ڏانهن ويندڙ سڌي ٽرئفڪ کي صبا سئنيما ۽ خواجه اجمير نگري ڏانهن مڙندڙ ٽريفڪ کان ڌار ڪندو، جنهن سان ڊسٽرڪٽ سينٽرل جي مصروف ترين چوراهن مان هڪ تي رَش ۾ نمايان گهٽتائي ايندي. وڏي وزير کي ٻڌايو ويو ته اٽڪل 80 سيڪڙو سڌي ٽرئفڪ هن فلائي اوور کي استعمال ڪندي، جڏهن ته مقامي ٽرئفڪ زميني سطح تي سروس روڊن ذريعي جاري رهندي. هڪ ٻيو اهم منصوبو جنهن تي بحث ڪيو ويو، اهو 2.377 ارب رپين جو 4-ڪي چورنگي فلائي اوور هو، جيڪو سرجاڻي ٽائون ڏانهن بنا ڪنهن رڪاوٽ جي ٽريفڪ جي رواني کي بهتر بڻائڻ لاءِ ڊيزائن ڪيو ويو آهي. ڪراچي جي ميئر مرتضيٰ وهاب چيو ته ان چوراهي تي اٽڪل 70 سيڪڙو ٽرئفڪ هن وقت سرجاڻي ڏانهن وڃي ٿي، جنهن جي ڪري سخت رڪاوٽون ۽ دير ٿئي ٿي. وڏي وزير اختيارين کي هدايت ڪئي ته رٿابندي کي حتمي شڪل ڏني وڃي ۽ يقيني بڻايو وڃي ته ٻئي منصوبا مستقبل جي ٽرئفڪ جي ضرورتن کي نظر ۾ رکندي ڊيزائن ڪيا وڃن. اجلاس ۾ ميرين ڊرائيو روڊ کي ڳنڍيندڙ ڪليپٽن بلاڪ 1 کان 5 جي روڊن جي بحالي جو به جائزو ورتو ويو، 600 ملين رپين جي هن منصوبي ۾ روڊن جي ٻيهر ريسرفيسنگ، نيڪال جي بهتري، ڪلورٽس، بلاول چورنگي جي نالي جي بحالي ۽ سامونڊي ڪوريڊور سان گڏ رابطي کي مضبوط ڪرڻ شامل آهي. وڏي وزير هدايت ڪئي ته روڊن جي بحالي سان گڏ نيڪال جي نظام کي به بهتر بڻايو وڃي ته جيئن چوماسي جي برساتن دوران بار بار ٿيندڙ شهري ٻوڏ ۽ روڊن جي نقصان کي روڪي سگهجي. مرتضيٰ وهاب، وڏي وزير کي ملير ڪورٽ/عظيم پوره کان مرتضيٰ چورنگي لانڍي تائين متبادل ڪوريڊور جي تعمير بابت پڻ بريفنگ ڏني، جنهن جو ڪاٿو 582 ملين رپيا آهي، جنهن سان ٽرئفڪ کي شاهراهه ڀٽو ڏانهن موڙي رهائشي علائقن تي دٻاءُ گهٽ ڪرڻ جي اميد آهي. وڏي وزير لوڪل گورنمينٽ جي وزير کي هدايت ڪئي ته هو هي اسڪيم کيس منظوري لاءِ پيش ڪري ته جيئن ان تي ڪم شروع ٿي سگهي. هن چيو ته ان سان علائقي ۾ ٽرئفڪ جا مسئلا پڻ حل ٿيندا. اجلاس ۾ ڪورنگي اڍائي نمبر کي ڪورنگي ڪريڪ ائربيس سان ڳنڍيندڙ مهرالنساءِ هاسپيٽل روڊ جي 660 ملين رپين جي لاڳت سان ٻيهر تعمير جو وڌيڪ جائزو ورتو ويو. ميئر چيو ته هي منصوبو صحت جي سهولتن، صنعتي علائقن ۽ اسٽريٽجڪ تنصيبن تائين پهچ کي بهتر بڻائيندو. وڏي وزير زور ڏنو ته اسپتالن ۽ ايمرجنسي پهچ وارن رستن سان لاڳاپيل منصوبن کي ترجيحي اسڪيمن طور تسليم ڪيو وڃي. بلديه فٽبال اسٽيڊيم کان اردو چوڪ ذريعي شاهراهه اورنگي تائين روڊ جي مجوزه تعمير ۽ اپ گريڊيشن تي پڻ بحث ڪيو ويو، 2.2 ارب رپين جي هن منصوبي جو مقصد اورنگي ٽائون، بلديه ٽائون ۽ حب ريور روڊ وچ ۾ نيڪال ۽ سيوريج جي انفراسٽرڪچر سان گڏ هڪ وڏي ٻه طرفي روڊ ذريعي رابطي کي بهتر بڻائڻ آهي. وڏي وزير ڪي ڊي اي کي هدايت ڪئي ته هي اسڪيم جلد کان جلد شروع ڪئي وڃي. اهڙي طرح گلزار هجري کي ايم-9 موٽر وي سان ڳنڍيندڙ مهراڻ/پاجيرو روڊ جي بحالي جو جائزو ورتو ويو. صوبائي وزير ناصر شاهه چيو ته هي منصوبو متبادل رستن تي رَش کي گهٽائيندو ۽ اسڪيم-33 ۽ ڀرپاسي جي علائقن جي رهائشين لاءِ علائقائي رابطي کي بهتر بڻائيندو. وڏي وزير شاهراهه فيصل جي سروس روڊن سان گڏ بحالي ۽ خوبصورتي جي ڪمن جو به جائزو ورتو، جنهن ۾ نيڪال جي درستگي، روڊن جي مرمت ۽ ٽرئفڪ جي بهتري جا اپاءُ شامل آهن ته جيئن شهر جي مصروف ترين شاهراهه تي دٻاءُ گهٽائي سگهجي. هن واٽر بورڊ جي سي اي او احمد صديقي ۽ ڪي ڊي اي جي ڊاڪٽر جنرل آصف جان کي هدايت ڪئي ته هو گڏجي علائقي ۾ نيڪال جي نظام کي ٻيهر تعمير ۽ بهتر بڻائين ته جيئن خوبصورتي جا ڪم شروع ڪري سگهجن. مولوي تميزالدين خان روڊ کان مائي ڪولاچي تائين حاجي ڪيمپ روڊ جي توسيع ۽ بحالي جي هڪ تجويز پڻ پيش ڪئي وئي، سيد ناصر حسين شاهه ۽ ميئر ان منصوبي جي حمايت ڪئي ۽ وڏي وزير کي ٻڌايو ته ان سان مسافرن ۽ بندرگاهه سان لاڳاپيل ٽرئفڪ جي آسان رواني ۾ مدد ملندي ۽ مائي ڪولاچي ۽ ڀرپاسي جي واپاري علائقن تائين پهچ بهتر ٿيندي. اجلاس ۾ اضافي طور تي جناح ايوينو کي گلزار هجري ۾ يار محمد ڳوٺ سان ڳنڍيندڙ منصوبن ۽ نادرن باءِ پاس کي سپر هاءِ وي سان ڳنڍيندڙ حاجي ابراهيم عيسيٰ روڊ جي بهتري جو به جائزو ورتو ويو، ٻنهي جو مقصد مال برداري جي چرپر ۽ شهري رابطي کي بهتر بڻائڻ آهي. مراد علي شاهه ڪي ڊي اي ۽ لوڪل گورنمينٽ کاتي کي هدايت ڪئي ته اسڪيمن جي عملدرآمد ۾ دير ڪندڙ رڪاوٽن کي ختم ڪيو وڃي ۽ آفيسرن کي هدايت ڪئي ته هو سمورن منصوبن جي شفافيت، مناسب نگراني ۽ وقت تي مڪمل ٿيڻ کي يقيني بڻائين. هن چيو ته ڪراچي پاڪستان جو معاشي انجڻ آهي ۽ ان جي روڊن جي نيٽ ورڪ ۽ شهري انفراسٽرڪچر کي بهتر بڻائڻ اسان جي اولين ترجيحن ۾ شامل آهي. هر منصوبي مان شهرين کي سفر جو وقت گهٽائڻ، حفاظت کي بهتر بڻائڻ ۽ معاشي سرگرمين کي آسان بڻائڻ ذريعي سڌو سنئون فائدو ملڻ گهرجي. سيد ناصر شاهه چيو ته ماتحت ادارا جهڙوڪ ڪي ايم سي، ڪي ڊي اي وڏي وزير جي سوچيل شهري بهتري جي هڪ جامع حڪمت عملي تحت سڄي ڪراچي ۾ ترقياتي منصوبا هلي رهيا آهن. وڏي وزير چيو ته اهي اسڪيمون ڪراچي جي رهائشين کي درپيش ڊگهي عرصي کان هلندڙ ٽرئفڪ ۽ انفراسٽرڪچر جي مسئلن کي حل ڪرڻ لاءِ ڊيزائن ڪيون ويون آهن. اسان انهن منصوبن کي ڪارائتي ۽ شفاف طريقي سان مڪمل ڪرڻ لاءِ پرعزم آهيون ته جيئن ماڻهو پنهنجي روزانو جي زندگي ۾ عملي بهتري ڏسي سگهن. وڏي وزير وڌيڪ چيو ته حڪومت نه صرف روڊن جي تعمير تي پر نيڪال، سيوريج، ٽرئفڪ جي انتظاميا ۽ خوبصورتي تي به ڌيان ڏئي رهي آهي ته جيئن سڄي شهر ۾ انفراسٽرڪچر جي ترقي جي ڊگهي مدي واري پائيداري کي يقيني بڻائي سگهجي. اجلاس ۾ لوڪل گورنمينٽ وزير ناصر شاهه، پلاننگ اينڊ ڊيولپمينٽ وزير ڄام خان شورو، ميئر ڪراچي مرتضيٰ وهاب، چيف سيڪريٽري آصف حيدر شاهه، وڏي وزير جو پرنسپل سيڪريٽري آغا واصف، ڪمشنر ڪراچي حسن نقوي، چيئرمين پي اينڊ ڊي نجم شاهه، سيڪريٽري لوڪل گورنمينٽ وسيم شمشاد، سيڪريٽري ناڻو فياض جتوئي، سي اي او واٽر بورڊ احمد صديقي، ڊي جي ڪي ڊي اي آصف ۽ ٻين سينئر عهديدارن شرڪت ڪئي.