ڊپٽي ڪمشنر لاڙڪاڻو جي صدارت ۾ سنڌ سالڊ ويسٽ مئنيجمينٽ بورڊ لاڙڪاڻي جي ڪم ۽ ڪارڪردگيءَ جو جائزو وٺڻ لاءِ اجلاس

لاڙڪاڻو- 13 مئي (اي پي پي) ڊپٽي ڪمشنر لاڙڪاڻو طارق منظور چانڊيو جي صدارت ۾ ڊپٽي ڪمشنر آفيس لاڙڪاڻي ۾ سنڌ سالڊ ويسٽ مئنيجمينٽ بورڊ لاڙڪاڻي جي ڪم ۽ ڪارڪردگيءَ جو جائزو وٺڻ لاءِ اجلاس منعقد ڪيو ويو. اجلاس ۾ مئنيجر آپريشنز گانسو لاڙڪاڻو حامد خان، ڊپٽي ڊائريڪٽر سنڌ سالڊ ويسٽ مئنيجمينٽ بورڊ لاڙڪاڻو گل محمد شيخ، اسسٽنٽ ڪمشنر لاڙڪاڻو راجا قريشي ۽ اسسٽنٽ ڪمشنر (U/T) ڊاڪٽر رابعه اڪرام شرڪت ڪئي. سنڌ سالڊ ويسٽ مئنيجمينٽ بورڊ لاڙڪاڻو جي عھديدارن ڊپٽي ڪمشنر کي لاڙڪاڻي شھر ۾ ڊور ٽو ڊور ڪليڪشن، ميڪينيڪل سوئپنگ ۽ ويسٽ ڊسپوزل آپريشنز بابت بريفنگ ڏني. ھن وقت سنڌ سالڊ ويسٽ مئنيجمينٽ بورڊ لاڙڪاڻو اٽڪل لاڙڪاڻي ميونسپل ڪارپوريشن جي 20 يو سيز مان 42 گاڏين ۽ 650 سينيٽري اسٽاف ذريعي روزانو 380 ٽن سولڊ ويسٽ کڻي رھيو آھي. گند ڪچرو ھن وقت رشيد وڳڻ روڊ تي لينڊ فل سائيٽ تي ڦِٽو ڪيو پيو وڃي. سنڌ سالڊ ويسٽ مئنيجمينٽ بورڊ لاڙڪاڻو ٽيم نئين قائم ٿيل علائقن ۾ خدمتن جي توسيع جو مستقبل جو منصوبو شيئر ڪيو، جن کي تازي حدبندي بعد ميونسپل ڪارپوريشن لاڙڪاڻي جي حدن ۾ شامل ڪيو ويو آھي. ڊي سي، سنڌ سالڊ ويسٽ مئنيجمينٽ بورڊ لاڙڪاڻي کي ھدايت ڪئي ته يو سي وار مقرري پلان، گاڏين جي ضرورت ۽ اضافي افرادي قوت ھڪ ھفتي اندر جمع ڪرائي ته جيئن معاملو لوڪل گورنمينٽ کاتي وٽ اٿارِيو وڃي. اجلاس ۾ سڀني تعلقي ھيڊ ڪوارٽرز يعني لاڙڪاڻو، رتوديرو، ڏوڪري ۽ باقراڻي ۾ ميونسپل ڪچري کي مناسب طريقي سان ختم ڪرڻ لاءِ سائنسي طور تيار ڪيل لينڊ فل سائيٽس جي فوري ضرورت تي ڳالھه ٻولھه ٿي. ھن وقت کليل ڊمپنگ ٿي رھي آھي، جنھن سبب ماحولياتي ۽ صحت کي خطرو لاحق آھي. ڊي سي لاڙڪاڻي سڀني اي سيز کي ھدايت ڪئي ته پنھنجي لاڳاپيل تعلقي ۾ لينڊ فل سائيٽس لاءِ 25 کان 30 ايڪڙ تي مشتمل سرڪاري زمين جي نشاندهي ڪن، جيڪا آبادي ۽ واٽر چينلز کان پري ھجي. تجويز کي ٽيڪنيڪل فيزيبلٽي ۽ EPA جي منظوري لاءِ SEPA ۽ سنڌ سالڊ ويسٽ مئنيجمينٽ بورڊ ڏانھن موڪليو ويندو. ڊي سي لاڙڪاڻو طارق منظور چانڊيو چيو ته صفائي جو سڌو تعلق عوامي صحت ۽ لاڙڪاڻي جي اميج سان آھي. سنڌ سالڊ ويسٽ مئنيجمينٽ بورڊ لاڙڪاڻي کي زمين تي ڪم جي نمائش کي بھتر بڻائڻ گھرجي. ھن خدمتن جي توسيع ۽ لينڊ فل سائيٽس جي قيام لاءِ ضلعي انتظاميا جي مڪمل تعاون جويقين ڏياريو. ھن وڌيڪ چيو ته سخت نگراني ڪئي ويندي ۽ لاپرواهي ڪندڙ ٺيڪيدارن کي معاھدي تحت ڏنڊ کي منھن ڏيڻو پوندو.