ڊپٽي ڪمشنر لاڙڪاڻو جي صدارت ۾ اجلاس، ڪڻڪ خريداري مهم جو جائزو ورتو

لاڙڪاڻو- 05 مئي (اي پي پي) لاڙڪاڻو جي ڊپٽي ڪمشنر طارق منظور چانڊيو جي صدارت هيٺ ضلعي ۾ جاري ڪڻڪ خريداري مهم 2026ع جي جائزي لاءِ گڏجاڻي منعقد ٿي. گڏجاڻي ۾ ايڊيشنل ڊپٽي ڪمشنر ون سيد غضنفر علي شاهه، ڊسٽرڪٽ فوڊ ڪنٽرولر نذاقت علي عباسي، سمورن اسسٽنٽ ڪمشنرن، ايڊيشنل ڊائريڪٽر زراعت توسيع ۽ خوراڪ کاتي جي نمائندن شرڪت ڪئي، ايڊشنل ڊپٽي ڪمشنر ون ۽ سمورن اسسٽنٽ ڪمشنرن پنهنجن پنهنجن ڪڻڪ خريداري مرڪزن ۾ اڳڀرائي ۽ مسئلن بابت ڊپٽي ڪمشنر کي بريفنگ ڏني. ڊي ايف او لاڙڪاڻو مرڪزوار خريداري جي انگن اکرن، بارداڻي جي ورڇ ۽ ادائيگي جي صورتحال پيش ڪئي. زراعت کاتي ڪڻڪ جي هارين جو تصديق ٿيل ڊيٽا شيئر ڪيو، جنهن ۾ ننڍن هارين جي فهرست به شامل آهي، جن هاري ڪارڊ جي سبسڊي حاصل ڪئي. تفصيلي جائزي کان پوءِ ڊپٽي ڪمشنر هدايتون جاري ڪندي چيو ته ڊي ايف او لاڙڪاڻو اهو يقيني بڻائي ته هارين کي ڪڻڪ جي خريداري جي 48 ڪلاڪن اندر سمورن مرڪزن تي ادائيگي ڪئي وڃي، ڪنهن به قسم جي دير برداشت نه ڪئي ويندي. روزانو ادائيگي جي رپورٽ ڊپٽي ڪمشنر آفيس ۾ جمع ڪرائي وڃي. ڊي سي وڌيڪ چيو ته ترجيحي بنيادن تي ضلعي خريداري جو هدف پورو ڪيو وڃي. ننڍن هارين کان ڪڻڪ کڻڻ تي خاص ڌيان ڏنو وڃي، جيڪي هاري ڪارڊ سبسڊي اسڪيم جا مستحق آهن، ته جيئن انهن کي دلالن جي استحصال کان بچائي سگهجي. ڊي سي چيو ته فوڊ ڊپارٽمينٽ نقصانن کان بچڻ لاءِ نمي جي مناسب جاچ، فيوميگيشن ۽ سائنسي اسٽيڪنگ کي يقيني بڻائي. غير معياري ڪڻڪ قبول نه ڪئي ويندي. ڊپٽي ڪمشنر طارق منظور چانڊيو چيو ته سنڌ حڪومت هارين کي منصفاڻو فائدو ڏيڻ لاءِ ڪڻڪ جي حمايتي قيمت تي خريداري لاءِ پرعزم آهي. هن خبردار ڪيو ته بدعنواني، دير يا هارين کان ھٿرادو ڪڻڪ خريد ڪرڻ ۾ ملوث ڪنهن به آفيسر يا ايجنٽ خلاف سخت ڪارروائي ڪئي ويندي.