پنجاب جي وزيراعلى مريم نواز شريف جي ويزن موجب صوبي ۾ راندين جي فروغ جي لاءِ منظم ۽ عملي قدم کنيا پيا وڃن: بئريسٽر دانيال چوڌري

راولپنڊي – 30 اپريل (اي پي پي) اطلاعات ۽ نشريات واري وفاقي پارلياماني سيڪريٽري بئريسٽر دانيال چوڌري چيو آهي ته پنجاب جي وزيراعلى مريم نواز شريف جي ويزن موجب صوبي ۾ راندين جي فروغ جي لاءِ منظم ۽ عملي قدم کنيا پيا وڃن، اسپورٽس بورڊ ان ويزن کي زميني حقيقتن ۾ بدلائڻ جي لاءِ سرگرم عمل آهي، نوجوانن کي اڳتي آڻڻ ۽ انهن کي عالمي معيار موجب موقعا فراهم ڪرڻ حڪومت جي اولين ترجيح آهي. اهڙن خيالن جو اظهار هن راولپنڊي ۾ اسپورٽس بورڊ جي اهتمام هيٺ منعقد ڪٻڊي مئچ جي پڄاڻي واري تقريب کي خطاب ڪندي ڪيو. هن چيو ته ڪٻڊي ايونٽ نه رڳو ڪامياب ۽ منظم هو پر اهو ان ڳالهه جو واضح ثبوت آهي ته پنجاب ۾ راندين جي فروغ جي لاءِ عملي قدم کنيا پيا وڃن. هن راندين کي سماجي اصلاح ۽ نوجوانن جي مثبت رخ ۾ رهنمائي جو موثر ذريعو قرار ڏيندي چيو ته اهي معاشرا خوشحال ۽ محفوظ هوندا آهن جتي راندين جا ميدان آباد هجن. سندس موجب راند نه رڳو جسماني صحت پر نظم ۽ ضبط، ٽيم ورڪ ۽ مقابلو ڪرڻ جي صلاحيت کي پڻ مضبوط ڪري ٿي. هن اعلان ڪيو ته ايندڙ ڏينهن ۾ راولپنڊي ۾ پنجاب ڪرڪيٽ بورڊ جي ٽرائلز جي شروعات ڪئي پئي وڃي، جن ۾ مختلف عمر جي رانديگرن جي چونڊ شفاف بنيادن تي ڪئي ويندي. منصوبي تحت انڊر 23 جا 10 رانديگر، انڊر 19 جا 2 رانديگر ۽ لو ايج گروپ جا 4 رانديگر چونڊيا ويندا. هن چيو ته ان پوري نظام جو مقصد نئون ۽ باصلاحيت ٽيلينٽ سامهون آڻڻ آهي ته جيئن هر سطح تي نوجواننک ي هڪ جهڙا موقعا ملن.