وفاقي وزير سردار اويس احمد خان لغاري جي يورپي يونين وفد کي سڌارن بابت بريفنگ

اسلام آباد- 27 اپريل (اي پي پي) پاور ڊويزن واري وفاقي وزير سردار اويس احمد خان لغاري يورپي يونين جي پاڪستان جو دؤرو ڪندڙ وفد کي پاور سيڪٽر ۾ جامع سڌارن کان آگاهه ڪيو. هن ان سلسلي ۾ چئن اهم قدمن تي روشني وڌي ۽ ملڪ ۾ جاري نجڪاري ۽ بنيادي ڍانچي جي منصوبن ۾ يورپي يونين جي سيڙپڪارن جي شرڪت جي دعوت به ڏني. وزارت طرفان جاري بيان موجب وفاقي وزير ٻُڌايو ته پاور ڊويزن قومي گرڊ جي ڊجيٽلائيزيشن کي پهرين ترجيح ڏني آهي، جنهن تحت سمارٽ ميٽرن کي وڏي پيماني تي لڳائڻ، ٽرانسميشن لائنن جي واڌ ۽ اپ گريڊيشن، وڏي پيماني تي بيٽري اسٽوريج سسٽم لڳائڻ ۽ پاور سيڪٽر جي اوزارن جي مقامي طور تي تياريءَ تي خاص ڌيان ڏنو ويو آهي. هن وڌيڪ آگاهه ڪيو ته حڪومت بجلي ورڇيندڙ ڪمپنين (ڊسڪوز) جي نجڪاريءَ جي عمل کي تيز ڪري رهي آهي، جنهن ۾ يورپي ڪمپنين لاءِ پُرڪشش موقعا موجود آهن. سردار اويس احمد ٻين سڌارن جو پڻ ذڪر ڪيو جن ۾ پُراڻا ۽ غير مؤثر آر ايف او (ريزيوئل فيول آئل) تي هلندڙ پاور پلانٽس جو وِڪرو شامل آهي. هن واضح ڪيو ته آءِ جي سي اي پي (Indicative Generation Capacity Expansion Plan) سان تقريبن 7 هزار ميگاواٽ جا مهانگا پاور پابند پاور پلانٽ کي خارج ڪري پاڪستان 17 ارب ڊالرن جي ذڪر جوڳي بچت حاصل ڪئي آهي. يورپي يونين جي وفد ۾ ٿرايا تريمو، ڊائرڪيٽر يورپي انويسٽمينٽ بئنڪ، راموناس ڪاروبليس، پاڪستان بابت يورپي يونين جي سفير ۽ ٻيا معزز ميمبر شامل هئا. وفد پاور ڊويزن طرفان شروع ڪيل سڌارن کي ڀرپور ساراهيندي چيو ته انهن قدمن سان سيڙپڪاريءَ جو ماحول نمايان طور تي بهتر ٿيو آهي، جنهن جي نتيجي ۾ ڪيترائي يورپي سيڙپڪار هاڻ پاڪستان جي پاور شعبي ۾ مختلف منصوبن ۾ مالي سهڪار ۽ عملي ڀائيواري ڪرڻ چاهين ٿا.