پاڪستان خطي ۾ جاري بحران کي گهٽ ڪرڻ ۽ ايران ۽ آمريڪا جي وچ ۾ ڳالهه ٻولهه جي لاءِ راهه هموار ڪرڻ لاءِ ڀرپور سفارتي ڪوششون ڪيون آهن: اسحاق ڊار

اسلام آباد  -07 اپريل (اي پي پي) نائب وزيراعظم ۽ پرڏيهي وزير محمد اسحاق ڊار چيو آهي ته پاڪستان خطي ۾ جاري بحران کي گهٽ ڪرڻ ۽ ايران ۽ آمريڪا جي وچ ۾ ڳالهه ٻولهه جي لاءِ راهه هموار ڪرڻ جي لاءِ ڀرپور سفارتي ڪوششون ڪيون آهن. سينيٽ جي اجلاس ۾ خطي جي موجوده صورتحال تي ڳالهائيندي هن مخالف ڌر اڳواڻ سينيٽر راجا ناصر عباس جا ٿورا ادا ڪيا جنهن حڪومت جي ڪوششن کي ساراهيو. اسحاق ڊار چيو ته پاڪستان شروع کان ئي ان بحران ۾ سرگرم رهيو آهي. هن ٻڌايو ته جڏهن ايران تي پهريون حملو ٿيو ته هو مدينه منوره ۾ او آءِ سي اجلاس کانپوءِ موجود هو جتان هن فوري طور تي پرڏيهي آفيس سان رابطو ڪيو ۽ هڪ خودمختيار ملڪ تي اسرائيلي حملي جي سخت مذمت جي هدايت ڪئي. اسحاق ڊار موجب هن فوري طور تي ايراني پرڏيهي وزير سان پڻ رابطو ڪيو ۽ پاڪستان جي حمايت ۽ همدرديءَ جو پيغام ڏنو، گڏ ئي خطي جي ملڪن کي ڇڪتاڻ گهٽ ڪرڻ جي لاءِ متحرڪ ڪرڻ جو يقين ڏياريو.  هن چيو ته پاڪستان مسلسل خطي ۽ ٻين ملڪن بشمول چين، جاپان، برطانيا، ڪئناڊا ۽ ڪيترن ئي يورپي ملڪن سان رابطي ۾ رهيو ته جيئن تحمل ۽ ڇڪتاڻ ۾ گهٽتائي کي فروغ ڏئي سگهجي. نائب وزيراعظم چيو ته پاڪستان هڪ سهولتڪار ۽ ثالث جي طور تي ڪم ڪري رهيو آهي ۽ حساس سفارتي ڪوششن کي متاثر ٿيڻ کان بچائڻ جي لاءِ احتياط سان قدم کنيا پيا وڃن. هن ٻڌايو ته وزيراعظم محمد شهباز شريف، فيلڊ مارشل سيد عاصم منير ۽ پرڏيهي آفيس ان عمل ۾ مڪمل طور تي متحرڪ آهن. اسحاق ڊار چيو ته سعودي عرب 19 مارچ تي 12 ملڪن جو اجلاس رياض ۾ منعقد ڪيو جنهن ۾ پاڪستان پنهنجو موقف پيش ڪيو ۽ هڪ متوازن گڏيل پڌرنامو جاري ڪرائڻ ۾ ڪردار ادا ڪيو جنهن ۾ اسرائيل جي مذمت پڻ شامل هئي. هن وڌيڪ ٻڌايو ته سعودي عرب، مصر، ترڪيه ۽ پاڪستان تي ٻڌل چار ملڪي گروپ به امن جي لاءِ ڪم ڪري رهيو آهي ۽ ان جو ايندڙ اجلاس جيڪو اڳ ۾ استنبول ۾ ٿيڻو هو هاڻي اسلام آباد منتقل ڪيو ويو آهي. هن چيو ته انهن ٽن ملڪن جي پرڏيهي وزيرن 29 مارچ تي پاڪستان جو دورو ڪيو جتي ٻطرفي ۽ چار ڌريي ملاقاتون ٿيون. هن وڌيڪ ٻڌايو ته چين سان به اعليٰ سطحي رابطا ٿيا ۽ 31 مارچ جي دوري ۾ پنج نقاطي امن منصوبي تي ڳالهه ٻولهه ڪئي وئي جيڪو بعد ۾ منظرعام تي آندو ويو. اسحاق ڊار چيو ته گڏيل قومن جي سيڪريٽري جنرل پڻ پاڪستان جي ڪردار کي ساراهيو ۽ تعاون جي آڇ ڪئي. هن چيو ته پاڪستان آخري لمحي تائين ڪوشش ڪئي ته ڌرين جي وچ ۾ ڳالهه ٻولهه ۽ وقفي جي گنجائش پيدا ڪئي وڃي جڏهن ته تازي اڳڀرائي صورتحال کي وڌيڪ ڏکيو بڻائي ڇڏيو آهي. هن خبردار ڪيو ته خطي ۾ ڊگهو تڪرار دنيا ۽ پاڪستان ٻنهي جي لاءِ سنگين نتيجن جو سبب بڻجي سگهي ٿو خاص طور تي تيل جي قيمتن ۽ معيشت تي اثر پئجي سگهن ٿا. هن اميد ظاهر ڪئي ته سفارتي ڪوششون خطي ۾ امن جي بحالي ۽ باعزت حل طرف وٺي وينديون.