ڊي آءِ جي پوليس لاڙڪاڻو پاران حضرت علي عليه جن جي يوم شهادت جي موقعي تي لاڙڪاڻو رينج جي سمورن ضلعن ۾ سيڪيورٽي انتظامن بابت سخت حڪم جاري

لاڙڪاڻو-10 مارچ (اي پي پي) ڊپٽي انسپيڪٽر جنرل آف پوليس لاڙڪاڻو ڊويزن ناصر آفتاب، 21 رمضان المبارڪ، حضرت علي عليه جن جي يوم شهادت جي موقعي تي لاڙڪاڻو رينج جي سمورن پنجن ضلعن ۾ سيڪيورٽي جي انتظامن بابت سخت حڪم جاري ڪري ڇڏيا آهن. سيڪيورٽي آرڊرز موجب، لاڙڪاڻو ڊويزن جي پنجن ضلعن اندر اٽڪل 185 مجلسون ۽ 48 جلوس نڪرندا. انهن جي سيڪيورٽي لاءِ 9,240 پوليس اهلڪار ۽ جوان فرض سرانجام ڏيندا. اجلاس ۾ ڊي آءِ جي زور ڀريو ته حضرت علي عليه جن جي شهادت واري ڏهاڙي جي موقعي تي سمورن جلوسن ۽ مجلسن کي پرامن بڻايو وڃي. سيڪيورٽي پلان تحت مسجدن، امام بارگاهن ۽ ٻين اجتماعي جڳهن جي چوڌاري خاص طور تي پوليس گشت ۽ پوليس جي نفري وڌائي ويندي. ان کان علاوه، پنجن ضلعن مان نڪرندڙ سمورن ماتمي جلوسن جي گذرگاهن ۽ مجلسن جي احاطن کي سي سي ٽي وي ڪيمرائن ذريعي مانيٽر ڪيو ويندو. ڪنهن به اڻ وڻندڙ واقعي کي روڪڻ لاءِ، سمورن جلوسن ۽ مجلسن جي شروعات کان اڳ، بم ڊسپوزل اسڪواڊ طرفان علائقن جي تلاشي ۽ اسنيپ چيڪنگ ڪئي ويندي. ڊي آءِ جي آفيس لاڙڪاڻي سميت پنجن ضلعن ۾ ڪنٽرول روم قائم ڪيا ويا آهن، جيڪي صورتحال تي مسلسل نظر رکندا. شهرين جي سهولت لاءِ متبادل ٽريفڪ رستن جو پلان پڻ جوڙيو ويو آهي، ته جيئن ڪنهن به ايمرجنسي جي صورت ۾ شهرين کي اسپتالن تائين پهچڻ ۾ ڪا به دقت پيش نه اچي.