سنڌ حڪومت جي ترجمان سکديو ھيمناني پاران هندو برادري کي هوليءَ جي موقعي تي مُبارڪُون

ڪراچي-02 مارچ (اي پي پي) سنڌ حڪومت جي ترجمان سکديو ھيمناني سنڌ جي هندو برادري کي هوليءَ جي موقعي تي دل جي گهراين سان مبارڪباد ڏني آهي ۽ هن تهوار کي هم آهنگي ۽ سنڌ جي گڏيل ثقافتي ورثي جو جشن قرار ڏنو آهي. پنهنجي جاري ڪيل بيان ۾ هن چيو ته صدر آصف علي زرداري جي اپيل تي ۽ موجوده صورتحال کي نظر ۾ رکندي، سنڌ جي هندو برادري هن سال هولي جون تقريبون منسوخ ڪرڻ جو فيصلو ڪيو آهي، جيئن مسلمان ڀائرن سان هڪجهڙائي ڏيکاري وڃي ۽ رمضان جي حرمت جو احترام ڪيو وڃي. هن چيو ته آءِ جي سنڌ پوليس هولي دوران هندو برادري جي عبادتگاهن ۽ گڏيل هنڌن تي مڪمل سيڪيورٽي، جنهن ۾ حفاظتي ۽ خاص قدم شامل آهن، يقيني بڻائڻ لاءِ هدايتون پڻ جاري ڪيون آھن. هن چيو ته سنڌ حڪومت هندو برادري لاءِ 3 ۽ 4 مارچ تي سرڪاري موڪل جو به اعلان ڪيو آهي. هن چيو ته ”سنڌ پاڪستان جي هندو آبادي جو وڏو مرڪز آهي ۽ هي تنوع اسان جي گڏيل سڃاڻپ جو حصو آهي“. هن وڌيڪ چيو ته پ پ پ چيئرمين بلاول ڀٽو زرداري جي اڳواڻي ۾ سنڌ حڪومت برابري، وقار ۽ شموليت جي قدرن کي هٿي ڏئي ٿي. ان نظرئي مطابق، پاڪستان پيپلز پارٽي غير امتيازي پاليسين ۽ قانونن ذريعي اقليتن جي حمايت کي يقيني بڻايو آهي. ھيمناني زور ڏنو ته پي پي پي اقليتن جي سياسي شموليت کي يقيني بڻايو آهي، جنهن ۾ عام سيٽن تي اميدوار کڻي اچڻ، سينيٽ ۾ نمائندگي وڌائڻ ۽ 11 آگسٽ کي اقليتن جو قومي ڏينھن قرار ڏيڻ شامل آهن.