يوڪرين، آمريڪا ۽ روس وچ ۾ ڳالهيون مارچ جي شروع ۾ ٿي سگهن ٿيون: ولاديمير زيلينسڪي

ڪيف-26 فيبروري (اي پي پي) يوڪرين جي صدر ولاديمير زيلنسڪي چيو آهي ته يوڪرين، آمريڪا ۽ روس وچ ۾ ڳالهيون مارچ جي شروع ۾ ٿي سگهن ٿيون. پرڏيهي ميڊيا مطابق يوڪريني صدر چيو ته يوڪرين، آمريڪا ۽ روس جي وفدن وچ ۾ ڳالهين جو ايندڙ دور مارچ جي شروع ۾ متوقع آهي، ڳالهين کان اڳ يوڪرين جو چيف ڳالهيون ڪندڙ ۽ قومي سلامتي ۽ دفاع ڪائونسل جو سيڪريٽري رستم عمروف آمريڪي نمائندن اسٽيووٽڪوف ۽ جيرڊڪشنز سان ملاقات ڪندو. هن ٻڌايو ته ٻطرفي ملاقات ۾ ايندڙ ٽه ڌري ڳالهين جي تياري، يوڪرين جي نئين سر تعمير جي پيڪيج ۽ يوڪرين ۽ روس وچ ۾ امڪاني قيدين جي ڏي وٺ تي خيالن جي ڏي وٺ ڪئي ويندي. ان کان اڳ يوڪرين، روس ۽ آمريڪا جي وفدن وچ ۾ ڳالهين جا ٻه دور 23 کان 24 جنوري ۽ 4 کان 5 فيبروري تي ابوظهبي ۾ ٿيا هئا جڏهن ته ان کانپوءِ 17 کان 18 فيبروري تي جنيوا ۾ هڪ ٻيو دور منعقد ڪيو ويو هو.