اي سي سي پاران پاسڪو جي 5 لک ميٽرڪ ٽن ڪڻڪ جي ذخيرن کي چٽاڀيٽي ٻوليءَ ذريعي وِڪري جي منظوري

اسلام آباد-28 جنوري (اي پي پي) ڪابينه جي اقتصادي رابطا ڪميٽي (اي سي سي) پاسڪو جي 5 لک ميٽرڪ ٽن ڪڻڪ جي ذخيرن کي چٽاڀيٽي واڪ ذريعي وڪري جي منظوري ڏئي ڇڏي آهي. اجلاس ۾ ڪيترن ئي وزارتن ۽ ڊويزنن لاءِ فني ضمني گرانٽس جي به منظوري ڏني وئي. اقتصادي رابطا ڪميٽيءَ جو اجلاس ڪالهه ناڻي وزارت ۾ وفاقي وزير سينيٽر محمد اورنگزيب جي صدارت هيٺ منعقد ٿيو جنهن ۾ اهم معاشي، مالي ۽ شعبي جاتي معاملن جو جائزو ورتو ويو. اجلاس جو مقصد معيشت جي استحڪام کي يقيني بڻائڻ، صارفين جي مفادن جو تحفظ ڪرڻ، سماجي خدمتن کي مضبوط بڻائڻ ۽ اهم سرڪاري ادارن جي آپريشنل ضرورتن کي پورو ڪرڻ هو. اجلاس ۾ قومي غذائي تحفظ ۽ تحقيق واري وفاقي وزير رانا تنوير حسين ۽ سيڙپڪاري بورڊ واري وفاقي وزير قيصر احمد شيخ کان علاوه لاڳاپيل وزارتن، ڊويزنن، ريگيوليٽري ادارن جي وفاقي سيڪريٽريز ۽ سينيئر عملدارن شرڪت ڪئي. اجلاس ۾ پاسڪو جي 5 لک ميٽرڪ ٽن ڪڻڪ جي ذخيرن کي چٽاڀيٽي واڪ ذريعي وڪري جي منظوري ڏني وئي، ان قدمن جو مقصد واڌو ذخيرن جو مؤثر انتظام، ذخيرو ڪرڻ ۽ سارسنڀال جي خرچن ۾ گهٽتائي، ملڪي ڪڻڪ مارڪيٽ ۾ قيمتن جي استحڪام کي يقيني بڻائڻ ۽ غذائي تحفظ جي گُهرجن جو تحفظ ڪرڻ آهي. ان سلسلي ۾ ڪميٽي پنجاب حڪومت جي خوراڪ ۽ صارفين جي تحفظ کي پاسڪو جي 3 لک ميٽرڪ ٽن ڪڻڪ فراهم ڪرڻ جي منظوري به ڏني ته جيئن اٽو ملز لاءِ مناسب ڪڻڪ جي فراهمي برقرار رهي، قيمتن ۾ استحڪام اچي ۽ صارفين کي اٽي جي بنا رڪاوٽ دستيابي يقيني بڻائي سگهجي. اجلاس ۾ پاڪستان پوسٽ آفيس ڊپارٽمينٽ جي ذمي يوٽيلٽي ڪمپنين جي بقايائن جي ادائگيءَ لاءِ گهربل فنڊز جو جائزو ورتو ويو ۽ ڪيترن ئي سالن کان جمع ٿيل بقايائن جي ادائگيءَ لاءِ 10.98 ارب رپين جي فني ضمني گرانٽ جاري ڪرڻ جي منظوري ڏني وئي. اجلاس ۾ قومي صحت واري وزارت خدمتن ضابطن تحت وفاقي ڊائريڪٽوريٽ آف اميونائزيشن لاءِ 29.663 ارب رپين جي فني ضمني گرانٽ جي منظوري ڏني ته جيئن حفاظتي ٽُڪن واري توسيع پروگرام تحت ويڪسين ۽ سرنجن جي بنا رڪاوٽ خريداريءَ کي يقيني بڻائي سگهجي. ان قدمن جو مقصد سڄي ملڪ ۾ معمول جي حفاظتي ٽُڪن جي ڪوريج کي برقرار رکڻ، ويڪسين سان بچاءُ جي قابل بيمارين جي پکيڙ روڪڻ ۽ صحت جي حوالي سان پاڪستان جي عالمي ذميدارين کي پورو ڪرڻ آهي. اجلاس ۾ واپار واري وزارت جي درخواست تي درآمدي يوريا تي ڏني ويندڙ سبسڊيءَ کي وفاقي حڪومت ۽ صوبائي حڪومتن وچ ۾ برابريءَ جي بنياد تي ورهائڻ جي پڻ منظوري ڏني وئي جنهن لاءِ 23.42 ارب رپين جي فني ضمني گرانٽ جي منظوري ڏني وئي، ان مان 15 ارب رپيا ناڻي واري وزارت طرفان جاري ڪيا ويندا، جڏهن ته باقي رقم مالي گنجائش جي دستيابيءَ لاءِ مشروط هوندي. اجلاس ۾ پائيدار ترقياتي هدفن اچيومينٽ پروگرام تحت خيبر پختونخوا ۾ ترقياتي منصوبن تي عملدرآمد جي سلسلي ۾ هائوسنگ واري وزارت لاءِ 1.9 ارب رپين جي فني ضمني گرانٽ جي منظوري ڏني وئي. هي منصوبا پاڪستان انفراسٽرڪچر ڊولپمينٽ ڪمپني لميٽيڊ ذريعي مڪمل ڪيا ويندا، جن جو مقصد بنيادي ڍانچي جي ترقيءَ کي تيز ڪرڻ ۽ خدمتن جي فراهميءَ کي بهتر بڻائڻ آهي. اجلاس ۾ تعليم ۽ پيشيوراڻي تربيت واري وزارت جي درخواست تي حسن ابدال جي ڪيڊٽ ڪاليج لاءِ 150 ملين رپين جي ضمني فني گرانٽ جي منظوري ڏني وئي. ان گرانٽ جو مقصد اداري جي انتظامي ۽ ترقياتي ضرورتن کي پورو ڪرڻ ۽ معاملن جي بنا رڪاوٽ انجام دهي کي يقيني بڻائڻ آهي. اجلاس ۾ فيڊرل بورڊ آف روينيو طرفان ضبط ٿيل سولر پينلز کي گلگت بلتستان ۾ ورهائڻ جي منظوري ڏني وئي جنهن سان گڏوگڏ انهن جي رسد ۽ ورهاست جي منصوبي جي پڻ منظوري ڏني وئي. ان قدمن جو مقصد خطي ۾ بجلي جي کوٽ تي ضابطو آڻڻ، تجديد جوڳي توانائي جي حل کي هٿي ڏيڻ ۽ پائيدار بجلي جي پيداوار ذريعي عوامي خدمتون فراهم ڪندڙ ادارن جي معاونت ڪرڻ آهي.