وفاقي وزير احسن اقبال سان پهرين جوڙ جي ايف ڪلاس شوٽر محسن نواز جي ملاقات

اسلام آباد-15 جنوري (اي پي پي) رٿابندي، ترقي ۽ سڌارن واري وفاقي وزير احسن اقبال سان پاڪستان جي پهرين جوڙ جي ايف ڪلاس شوٽر محسن نواز ملاقات ڪئي، جنهن ۾ هن نوجوانن لاءِ اسپورٽس ڊولپمينٽ بابت پنهنجو ويزن پيش ڪيو ۽ غير روايتي راندين ۾ درپيش انفراسٽرڪچر جي مسئلن جي نشاندهي ڪئي. محسن نواز جيڪو ايف ڪلاس شوٽنگ ۾ 10 عالمي انفرادي تمغن سان ڪنهن به پاڪستاني شوٽر کان وڌيڪ اعزاز رکندڙ آهي. وفاقي وزير کي ٻُڌايو ته هو ايندڙ نسل جي رانديگرن جي تربيت لاءِ هڪ جامع پليٽ فارم قائم ڪرڻ چاهي ٿو. هن چيو ته ٻن ڏهاڪن تي ٻَڌل پنهنجي ڪيريئر ۾ حاصل ڪيل مهارتن ۽ تجربن مان نوجوانن کي مستفيد ڪرڻ سندس مقصد آهي جنهن لاءِ حڪومتي سرپرستي اڻٽر آهي ته جيئن نوجوانن ۾ صحتمند اسپورٽس سرگرمين کي هٿي ڏئي سگهجي ۽ ان جي نمايان ڪاميابين ۾ 2024ع يورپي لانگ رينج شوٽنگ چيمپئن شپ ۾ سلور ۽ برائونز ميڊلز ۽ 155هين اين آر اي يو ڪي امپيريئل چيمپئن شپ ۾ سلور ميڊل شامل آهن. هو برطانيه ۽ آمريڪا جي نيشنل رائفل ايسوسيئيشن جو لائيف ميمبر بڻيل پهريون پاڪستاني آهي ۽ کيس تمغه امتياز لاءِ نامزد ڪيو ويو آهي جيڪو ملڪي تاريخ ۾ ڪنهن به شوٽر لاءِ پهرين نامزدگي آهي. راندين سان گڏ محسن نواز هڪ مستند اسپورٽس سائيڪالوجسٽ ۽ـ ايموشنل ويل بينگ ڪوچ پڻ آهي. هن زور ڀريو ته راندين جي ترقيءَ لاءِ جسماني سهولتن سان گڏوگڏ نفسياتي انفراسٽرڪچر به ضروري آهي. سندس چوڻ موجب ذهني مضبوطي ئي اصل هٿيار آهي ۽ عالمي مقابلن ۾ رانديگرن کي ناڪاري دٻاءُ کان بچائڻ لاءِ سپورٽ سسٽمز اڻٽر آهي. ملاقات ۾ پاڪستان ۾ شوٽنگ جي عملي مسئلن تي به ڳالهه ٻولهه ٿي جنهن ۾ جديد اوزارن تي ٻَڌل ڳري درآمدي ڊيوٽيز ۽ مناسب تربيتي سهولتن جي گهٽتائي شامل آهي. محسن نواز تجويز ڏني ته وڏن شهرن ۾ 50 ميٽر رينجز قائم ڪيون وڃن ۽ پاليسي سڌارن ذريعي اوزارن جي درآمد کي آسان بڻايو وڃي. وفاقي وزير احسن اقبال، محسن نواز جي پاڻمرادو ڪاميابيءَ کي نوجوان رانديگرن لاءِ مثال قرار ڏنو ۽ پاليسي آپشنز تي غور جي خاطري ڪرائي. هي ملاقات ڪرڪيٽ ۽ هاڪي کان هٽي ڪري ٻين راندين تي حڪومتي توجهه جي امڪاني رُخ جو اشارو ڏئي ٿي، جڏهن ته عملي قدمن جو اعلان اڃا باقي آهي.