صدر آصف علي زرداري پاران جمهوريه قازقستان جي قيادت ۽ عوام کي ملڪ جي 34هين آزادي جي ڏهاڙي جي موقعي تي مبارڪباد

اسلام آباد – 16 ڊسمبر (اي پي پي) صدر آصف علي زرداري جمهوريه قازقستان جي قيادت ۽ عوام کي ملڪ جي 34هين آزادي جي ڏهاڙي جي موقعي تي دلي مبارڪباد ڏني آهي. ايوان صدر جي پريس ونگ پاران جاري جمهوريه قازقستان جي آزادي جي ڏهاڙي جي موقعي تي پنهنجي پيغام ۾ صدر چيو ته هي موقعو 1991ع ۾ آزادي جي قانون ۽ رياستي خودمختياري جي منظوري جي ياد ڏياري ٿو، هڪ اهڙو تاريخي سنگ ميل جنهن قازقستان کي هڪ جديد قوم بڻجڻ جي راهه تي گامزن ڪيو. هن چيو ته آزادي کانپوءِ قازقستان جو سفر ان جي عوام جي حوصلي ۽ مسلسل ترقي جو عڪاس آهي، هي ڏينهن قازقستان جي هڪ خودمختيار جمهوري رياست جي طور تي اعلان جي ياد پڻ تازي ڪري ٿو. ان سان گڏ ئي 1986ع ۾ الماتي ۾ ٿيندڙ زيلتوڪسان مظاهرن کي پڻ خراج تحسين پيش ڪرڻ جو ڏينهن آهي، جڏهن قازقستان جي نوجوانن سوويت پاليسين جي خلاف احتجاج ڪيو جيڪو آزادي جي لاءِ عوام جي عزم جي علامت بڻيو. صدر چيو ته پاڪستان ۽ قازقستان جي وچ ۾ ويجها ۽ دوستاڻا لاڳاپا قائم آهن جيڪي گڏيل قدرن ۽ گڏيل احترام تي ٻڌل آهن، اسان گڏيل قومن ۽ اسلامي تعاون تنظيم سميت عالمي فورمز تي قازقستان جي مستقل حمايت کي قدر جي نگاهه سان ڏسون ٿا، واپار، توانائي ۽ علائقائي رابطن جي شعبن ۾ اسان جو تعاون مسلسل مضبوط ٿي رهيو آهي جڏهن ته سي پيڪ جي ذريعي اميد جوڳا موقعا پڻ سامهون اچي رهيا آهن. هن چيو ته آئون صدر قاسم جومارت توقايف ۽ قازقستان جي عوام جي لاءِ خوشحالي ۽ استحڪام جي دلي خواهش جو اظهار ڪريان ٿو ۽ ان ڳالهه جو ورجاءُ پڻ ڪيو ته پاڪستان علائقائي امن ۽ ترقي حاصل ڪرڻ جي لاءِ قازقستان سان پنهنجي حصيداري کي وڌيڪ گهرو ڪرڻ جو عزم رکي ٿو.